ಕವಿತೆ ಎಂದು ಹೆಸರಿಟ್ಟೆ…ನಿಟ್ಟುಸಿರಿಟ್ಟೆ !!

ಮನಸಿನ ಪುಟಗಳ ನಡುವೆ
ಖಾಲಿ ಹಾಳೆಗಳಿವೆ ಕೆಲವು..
ನೀ ಬರೆಯದೇ ಹೋದ
ಒಲವಿನ ಸಾಲುಗಳವು…
————————————
ನಿನ್ನ ನೆನಪುಗಳಿಂದ
ನನ್ನಲಿ ಮೂಡಿದ ಸಂಚಲನಗಳ ಸಂಕಲಿಸಿ
ಕವಿತೆ ಎಂದು ಹೆಸರಿಟ್ಟೆ…
ನಿಟ್ಟುಸಿರಿಟ್ಟೆ !!
————————————-
ಈ ಹನಿಗಳೆಲ್ಲ ನನ್ನವಲ್ಲ ಗೆಳತಿ,
ನೀನೇ ಬರೆಸಿದ್ದು…ಮತ್ತು ನೀನೇ ಬರಿಸಿದ್ದು                             
ನಾನೋ ಬರಿ ನೆಪಮಾತ್ರದವ
ಬರೆದಿದ್ದು ಮತ್ತು ಭರಿಸಿದ್ದು !!
————————————
ನಾನೇ ಬಯಸಿ ಪಡೆದರೆ ಅದು
ದಿವ್ಯ ಏಕಾಂತ…
ನೀನಿಲ್ಲದ ಒಂಟಿತನದಲಿ ಅನಿಸೋದು
ಈ ಬದುಕು ಏಕಂತ?
————————————
ಬರೆದು ಬರಿದಾಗಿಹೆನು ನಾ,
ಬರಿದೆ ನೆನಪಾಗುತಿಹೆ ನೀ,
ಬರದೆ ಹೋದರಿನ್ನು ನೀ,
ಬರದ ಬಯಲಂತೆ  ನಾ
—————————————-

ಹನಿ ಹನಿ ಕೂಡಿ ಈ ಕಣ್ಣೇ ಹಳ್ಳ …!!

ಮೊದಲ 5 ಹನಿಗಳು  ಇವತ್ತಿನ ವಿ.ಕೆ. ಯ ಸಿಂಪ್ಲಿಸಿಟಿಯ ಅಂಗಳದಲ್ಲಿ ಬಿದ್ದಿವೆ…

ಹಿಂದಿರುಗಿ ನೀ ಬರಲಾರೆಯೆಂದು 
ನನಗೂ ಗೊತ್ತಿದೆ ಗೆಳತಿ
ಹಿಂದುರುಗಿ ನೋಡಿಬಿಡು ಸಾಕು
ಕಣ್ತುಂಬಿಕೊಳ್ಳುವೆ ಒಂದು ಸರ್ತಿ
————————————
 ಪ್ರೀತಿ ಹಣತೆಗೆ ನೀನೆ ಎಣ್ಣೆ
ನಾ ಉರಿಯುವ ಬತ್ತಿ,
ಎಣ್ಣೆ ತೀರಿದರೂ ಉರಿಯುತಿದೆ
ನನ್ನೀ ದೇಹವೇ ಹೊತ್ತಿ…
ಅದೇ ಕಣೇ ಈ ಪ್ರೀತಿಯ ಶಕ್ತಿ
———————————-
ಮಾತೇ ಇಲ್ಲದೆ ಮುಗಿದೇ ಹೋಯ್ತು
ನಮ್ಮ ಪ್ರೀತಿ ನಾಟಕದ ಏಕಾಂಕ,
ತೆರೆ ಸರಿಯುವ ಮೊದಲೇ ತೆರೆ ಬಿತ್ತು
ಉಳಿದಿದ್ದು ಬರೀ ಏಕಾಂತ
———————————–
ಆಸೆಯೇನೋ ಇದೆ ಗೆಳತಿ ನಿನ್ನ ಮೇಲೆ
ಮುಗಿಲು ಮುಟ್ಟುವಷ್ಟು…
ಕೈಗೆಟುಕಬೇಕಲ್ಲ ಬಯಸಿದ್ದೆಲ್ಲ
ನನ್ನ ಪ್ರಾಪ್ತಿ ಎಷ್ಟೋ ಅಷ್ಟು
————————————
ಮುರಿದೇನೆ ಹೊರತು ಮಣಿಯಲಾರೆ
ಈ ಮುನಿಸು ಹಠ ನಿನಗೆ ತರವೇ ನೀರೆ?
ಮುರಿದೆರಡು ತುಂಡಾದ ಮೇಲೆ ಈ ನಂಟು
ಬದುಕಲಿ ನಮ್ಮ ಪಾಲಿಗೇನುಂಟು ?
ಜೋಡಿಸಬಹುದೇನೆ ಸುರಿದ್ಯಾವ ಅಂಟು?
————————————
ಬಾರದಿರು ಗೆಳತಿ ಮನಸಿನ ಕನಸಿನಂಗಳಕೆ ಆಡಲು
ಬರುವ ಮುನ್ನ ಹುಟ್ಟಿಸಿ ನಿರೀಕ್ಷೆಯ ಕಡಲು
ಬಳಿಕ ಹಿಂದಿರುಗಿ ಮರೀಚಿಕೆಯಂತೆ ಕಾಡಲು
ಸಾಕಿನ್ನು ಭರಿಸಲಾರದೀ ಒಡಲು
ಬರುವೆಯಾದರೆ ಬಾ ಇಲ್ಲೇ ಠಿಕಾಣಿ ಹೂಡಲು
ಮರಳುವ ಮಾತೇ ಇಲ್ಲದೆ ಕೂಡಲು..
ಎದೆಯ ಈ  ಪುಟ್ಟ  ಗೂಡೊಳು

ಎರಡೇ ಎರಡು ಹನಿ…

ಎದೆಯ ಕನ್ನಡಿ ಒಡೆದು ಚೂರಾಗಿ..

ಎದೆಯೂಳಗಿದ್ದ ನಿನ್ನ  ಬಿಂಬ ನೂರಾಯಿತು

ಕನ್ನಡಿ ಚೂರುಗಳಲ್ಲಿದ್ದ ನಿನ್ನ ಮುಖಗಳು

ಪಿಸು ನುಡಿದಂತಾಯ್ತು ನಿನ್ನನಿಸಿಕೆಗಳ..

“ಇಡಿಯಾಗಿ ದಕ್ಕದೇ ಹೋದ ಅದ್ಯಾವ ಭಾವಗಳ

ಬಿಡಿ ಬಿಡಿಯಾಗಿ ಬಿಡಿಸಿಟ್ಟಾವು ಒಡಕಲು ಬಿಂಬಗಳು”

—————————————–

ಈಗಲೂ ಅಡ್ಡಾಡುವೆ ಕಡಲ ತೀರದಲಿ,

ನೀ ಮರಳುವೆಯೇನೋ ಎಂಬ ಮರುಳಿನಲಿ…

ಉಕ್ಕಿ ಬರುವ ನೆನಪಿನಲೆಗಳ ನಡುವೆ,

ಹೆಜ್ಜೆ ಗುರುತ ಹುಡುಕುತ್ತ ಮರಳಿನಲಿ