ಕವಿತೆ ಎಂದು ಹೆಸರಿಟ್ಟೆ…ನಿಟ್ಟುಸಿರಿಟ್ಟೆ !!

ಮನಸಿನ ಪುಟಗಳ ನಡುವೆ
ಖಾಲಿ ಹಾಳೆಗಳಿವೆ ಕೆಲವು..
ನೀ ಬರೆಯದೇ ಹೋದ
ಒಲವಿನ ಸಾಲುಗಳವು…
————————————
ನಿನ್ನ ನೆನಪುಗಳಿಂದ
ನನ್ನಲಿ ಮೂಡಿದ ಸಂಚಲನಗಳ ಸಂಕಲಿಸಿ
ಕವಿತೆ ಎಂದು ಹೆಸರಿಟ್ಟೆ…
ನಿಟ್ಟುಸಿರಿಟ್ಟೆ !!
————————————-
ಈ ಹನಿಗಳೆಲ್ಲ ನನ್ನವಲ್ಲ ಗೆಳತಿ,
ನೀನೇ ಬರೆಸಿದ್ದು…ಮತ್ತು ನೀನೇ ಬರಿಸಿದ್ದು                             
ನಾನೋ ಬರಿ ನೆಪಮಾತ್ರದವ
ಬರೆದಿದ್ದು ಮತ್ತು ಭರಿಸಿದ್ದು !!
————————————
ನಾನೇ ಬಯಸಿ ಪಡೆದರೆ ಅದು
ದಿವ್ಯ ಏಕಾಂತ…
ನೀನಿಲ್ಲದ ಒಂಟಿತನದಲಿ ಅನಿಸೋದು
ಈ ಬದುಕು ಏಕಂತ?
————————————
ಬರೆದು ಬರಿದಾಗಿಹೆನು ನಾ,
ಬರಿದೆ ನೆನಪಾಗುತಿಹೆ ನೀ,
ಬರದೆ ಹೋದರಿನ್ನು ನೀ,
ಬರದ ಬಯಲಂತೆ  ನಾ
—————————————-

ಹನಿ ಹನಿ ಕೂಡಿ ಈ ಕಣ್ಣೇ ಹಳ್ಳ …!!

ಮೊದಲ 5 ಹನಿಗಳು  ಇವತ್ತಿನ ವಿ.ಕೆ. ಯ ಸಿಂಪ್ಲಿಸಿಟಿಯ ಅಂಗಳದಲ್ಲಿ ಬಿದ್ದಿವೆ…

ಹಿಂದಿರುಗಿ ನೀ ಬರಲಾರೆಯೆಂದು 
ನನಗೂ ಗೊತ್ತಿದೆ ಗೆಳತಿ
ಹಿಂದುರುಗಿ ನೋಡಿಬಿಡು ಸಾಕು
ಕಣ್ತುಂಬಿಕೊಳ್ಳುವೆ ಒಂದು ಸರ್ತಿ
————————————
 ಪ್ರೀತಿ ಹಣತೆಗೆ ನೀನೆ ಎಣ್ಣೆ
ನಾ ಉರಿಯುವ ಬತ್ತಿ,
ಎಣ್ಣೆ ತೀರಿದರೂ ಉರಿಯುತಿದೆ
ನನ್ನೀ ದೇಹವೇ ಹೊತ್ತಿ…
ಅದೇ ಕಣೇ ಈ ಪ್ರೀತಿಯ ಶಕ್ತಿ
———————————-
ಮಾತೇ ಇಲ್ಲದೆ ಮುಗಿದೇ ಹೋಯ್ತು
ನಮ್ಮ ಪ್ರೀತಿ ನಾಟಕದ ಏಕಾಂಕ,
ತೆರೆ ಸರಿಯುವ ಮೊದಲೇ ತೆರೆ ಬಿತ್ತು
ಉಳಿದಿದ್ದು ಬರೀ ಏಕಾಂತ
———————————–
ಆಸೆಯೇನೋ ಇದೆ ಗೆಳತಿ ನಿನ್ನ ಮೇಲೆ
ಮುಗಿಲು ಮುಟ್ಟುವಷ್ಟು…
ಕೈಗೆಟುಕಬೇಕಲ್ಲ ಬಯಸಿದ್ದೆಲ್ಲ
ನನ್ನ ಪ್ರಾಪ್ತಿ ಎಷ್ಟೋ ಅಷ್ಟು
————————————
ಮುರಿದೇನೆ ಹೊರತು ಮಣಿಯಲಾರೆ
ಈ ಮುನಿಸು ಹಠ ನಿನಗೆ ತರವೇ ನೀರೆ?
ಮುರಿದೆರಡು ತುಂಡಾದ ಮೇಲೆ ಈ ನಂಟು
ಬದುಕಲಿ ನಮ್ಮ ಪಾಲಿಗೇನುಂಟು ?
ಜೋಡಿಸಬಹುದೇನೆ ಸುರಿದ್ಯಾವ ಅಂಟು?
————————————
ಬಾರದಿರು ಗೆಳತಿ ಮನಸಿನ ಕನಸಿನಂಗಳಕೆ ಆಡಲು
ಬರುವ ಮುನ್ನ ಹುಟ್ಟಿಸಿ ನಿರೀಕ್ಷೆಯ ಕಡಲು
ಬಳಿಕ ಹಿಂದಿರುಗಿ ಮರೀಚಿಕೆಯಂತೆ ಕಾಡಲು
ಸಾಕಿನ್ನು ಭರಿಸಲಾರದೀ ಒಡಲು
ಬರುವೆಯಾದರೆ ಬಾ ಇಲ್ಲೇ ಠಿಕಾಣಿ ಹೂಡಲು
ಮರಳುವ ಮಾತೇ ಇಲ್ಲದೆ ಕೂಡಲು..
ಎದೆಯ ಈ  ಪುಟ್ಟ  ಗೂಡೊಳು

ಹನಿ + ಹನಿ = ಕಂಬನಿ ?

(ಮೊದಲಿನ 7 ಹನಿಗಳು ಇವತ್ತಿನ ವಿಜಯ ಕರ್ನಾಟಕದ ಸಿಂಪ್ಲಿಸಿಟಿ ಪುಟದಲ್ಲಿ ಇಣುಕಿವೆ..)

 ಸಣ್ಣಗೆ ಮಳೆ ಜಿನುಗುತ್ತಿತ್ತು

ತಣ್ಣಗೆ ನಿನ್ನ ನೆನಪಿನ ಸೋನೆಯಂತೆ

ತಂಪಾದ ನೆಲವು ಮಿದುವಾಗುತ್ತಿತ್ತು

ನಿನ್ನ ಒಲವುಕ್ಕಿ ಹರಿದ ಎದೆಯಂತೆ

——————————–

ನಿನ್ನ ನೆನಪಿನ ಮಳೆಯಲಿ ನಿನ್ನೆ ನಾ ನೆನೆದು

ರಾತ್ರಿ ಪೂರ್ತಿ ಒದ್ದೆಮುದ್ದೆ

ಎದೆಯ ಬೆಚ್ಚನೆ ಕವಾಟದೊಳಗೆ ನಿನಗೆ

ಬಂತೇನೆ ಸುಖವಾಗಿ ನಿದ್ದೆ?

——————————–

ದಾರಿ ಕವಲಾಗುವ ಮುನ್ನ ಜೊತೆಯಾಗಿ ನಡೆದೆವು

ಮೂಡಿಲ್ಲವೇನೆ ಹೆಜ್ಜೆ ಗುರುತು?

ಅರಸಿ ಅಲೆದು ದಾರಿ ತಪ್ಪಿರುವೆ ಎನ್ನರಸಿ

ಯಾರು ನೆರವಾದಾರು ನಿನ್ನ ಹೊರತು?

——————————–

ಕುಡಿ ನೋಟದಲೆ

ಕುಡಿಯೊಡೆದ ಒಲವು ಕವಲಾಯಿತು;

ನೋಟ ಕಿಡಿಯಾಯಿತು..

ಕನಸು ಪುಡಿಯಾಯಿತು..

ಮನಸು ಒಡೆದ ಕನ್ನಡಿಯಾಯಿತು..

——————————–

ನನಸಾಗುವ ಮೊದಲೇ ಕೈಜಾರಿಹೋದ

ಅಪೂರ್ಣ ಕನಸಿನದೊಂದು  ಮೆಲುಕು…

ಹಸಿವೆ ತೀರುವ ಮುನ್ನವೇ ಮುಗಿದ

ಅನಾಥ ಕೂಸಿನ ಕೈಯ್ಯ ರೊಟ್ಟಿ ತುಣುಕು…

——————————–

ಹೆಜ್ಜೆ ಮೂಡದ ಹಾದಿಯಲ್ಲಿ

ನಿನ್ನ ಗೆಜ್ಜೆ ದನಿಯ ಕೇಳಲೆಂದೇ

ಹೊರಟಿರುವೆ ನಿನ್ನ ಅರಸಿ

ಲಜ್ಜೆ ಮರೆತು ಬಿಗುಮಾನ ತೊರೆದು

ಹೆಜ್ಜೆಯೊಂದಿಗೆ ಹೆಜ್ಜೆ ಹಾಕುತಾ

ಬರಲಾರೆಯಾ ಎನ್ನರಸಿ?

——————————–

ಬೊಗಸೆ ಕಂಗಳ ಹುಡುಗಿ ಅಂದು

ಮೊಗೆಮೊಗೆದು ಕೊಟ್ಟಳು

ಬೊಗಸೆ ತುಂಬಾ ಕನಸುಗಳ ಸುರಿದು..

ಭರವಸೆಯ ಪಾತ್ರೆಯಲಿ ಕೂಡಿಟ್ಟ ಕನಸೆಲ್ಲ

ಆವಿಯಾಗುತ್ತಿವೆ ಕಣ್ಣಿಂದ ಹೊರ ಹರಿದು

 ——————————–

 ನಿನ್ನ ಬಿಟ್ಟು ನಾನಿರಲಾರೆ ಅಂದವಳು

ನನ್ನ ಬಿಟ್ಟು ಹೋಗುವಾಗ

ಬಿಟ್ಟು ಹೋದ ನೆನಪುಗಳೇ ಯಾಕೆ

ಬಿಟ್ಟೂ ಬಿಡದೆ ಕಾಡುತಾವೆ?

——————————–

ಓ ತರಳೆ… ನಿನ್ನ ಪ್ರೇಮ ಸುಳಿಗಾಳಿ

ನಾನದಕೆ ಸಿಕ್ಕಿಬಿದ್ದ ತರಗೆಲೆ…

ಎಲ್ಲಿಗೊಯ್ಯುವುದೋ ಅರಿಯೆ ನೆನಪಿನ ಚಕ್ರಸುಳಿ

ಇನ್ನೆಷ್ಟು ಹೊತ್ತು ತಿರುಗಲೇ?