Archive for ಮೇ 10, 2008

ಬಾಲಿವುಡ್ಡಲ್ಲಿ ಕರಣ್ ಜೋಹರ್ ಮತ್ತು ಏಕ್ತಾ ಕಪೂರ್‌ಗೆ ಅನ್ನೋ ಅಕ್ಷರದ ಮೇಲೆ ಅದೇನೋ ಪ್ರೀತಿ. ಜೊತೆಗೆ ಅದು ಅದೃಷ್ಟ ತರುತ್ತೆ ಅನ್ನೋ ನಂಬಿಕೆ. ಹಾಗೇನೆ ನಮ್ಮ ಮಮತೆಯ ನಿರ್ದೇಶಕ ಟಿ.ಎನ್.ಎಸ್ ಅರ್ಥಾತ್ ಟಿ.ಎನ್.ಸೀತಾರಾಂ ಅವರಿಗೆ ಅಕ್ಷರದ ಮೇಲೆ ಇನ್ನಿಲ್ಲದ ಮೋಹ, ಮಮತೆ, ಮಮಕಾರ, ಮೆಚ್ಚುಗೆ, ಮುದ್ದು, ಮೋಕೆ(ತುಳು ಶಬ್ದ). ಇದೀಗ ಈ ಟಿ.ವಿ ಕನ್ನಡ ವಾಹಿನಿಯ ಮುಖಾಂತರ ಕನ್ನಡದ ಮನೆ-ಮನೆಗಳ ಮಹಿಳೆಯರು-ಮಹನೀಯರು-ಮಕ್ಕಳು-ಮುದುಕರು ಎಲ್ಲರ ಮೇಲೂ ತಮ್ಮ ಮೋಡಿ ಮಾಡಲು, ಮನಸೂರೆಗೊಳ್ಳಲು ಮನರಂಜಿಸಲು ಮತ್ತೊಂದು ಮೆಗಾ ಧಾರಾವಾಹಿಯೊಂದಿಗೆ ಕಿರುತೆರೆಗೆ ಮತ್ತೆ ಮರಳುತ್ತಿದ್ದಾರೆ. ಹಿಂದಿನ ಯಶಸ್ವೀ ಧಾರಾವಾಹಿಯಾದ ಮುಕ್ತದ ಜನಪ್ರಿಯ ಹೆಸರಿನ ದ್ವಿರುಕ್ತಿಯನ್ನೇ ತನ್ನ ಶೀರ್ಷಿಕೆಯಾಗಿಸಿಕೊಂಡಿರುವ ಈ ಧಾರಾವಾಹಿ ಶೀಘ್ರದಲ್ಲೇ ಬರಲಿದೆ ಅಂತ ಈ ಟಿ.ವಿ.ಯವರು ಈಗಾಗಲೇ ಪ್ರಕಟಿಸಿದ್ದಾರೆ.

 

ಈ ಧಾರಾವಾಹಿಯಲ್ಲಿ ಸೀತಾರಾಂ ಬಳಗದಲ್ಲಿ ಖಾಯಂ ಆಗಿ ಕಾಣಿಸಿಕೊಳ್ಳುವ ಮಾಳವಿಕ ಅವಿನಾಶ್ ಇದ್ದಾರಂತೆ. ಜೊತೆಗೆ ಕಿರುತೆರೆಯಲ್ಲಿ ಮೊತ್ತ ಮೊದಲನೆ ಬಾರಿಗೆ ಖ್ಯಾತ ಬರಹಗಾರ ಬರಗೂರು ರಾಮಚಂದ್ರಪ್ಪ ಕಾಣಿಸಿಕೊಳ್ಳಲಿದ್ದಾರಂತೆ. ಎಂದಿನಂತೆ ಟಿ.ಎನ್.ಎಸ್. ನ್ಯಾಯವಾದಿಗಳಾಗಿ ತಮ್ಮ ವಿಶಿಷ್ಟ ವಾಗ್ಝರಿಯಲ್ಲಿ ಎಲ್ಲರನ್ನೂ ಮುಳುಗೇಳಿಸುವುದಂತೂ ಖಂಡಿತ.

 

ಆದರೆ ಒಂದು ಅಚ್ಚರಿಯ ಸಂಗತಿಯೆಂದರೆ ಕಿರುತೆರೆಯಲ್ಲಿ ಗೆಲುವು ತಂದು ಕೊಟ್ಟ ಕಾರದ ಮೋಡಿ ಸಿನೆಮಾದಲ್ಲಿ ಸೀತಾರಾಂ ಕೈ ಹಿಡಿಯಲಿಲ್ಲ ಅನ್ನುವುದು. ಮತದಾನ ಅತ್ಯುತ್ತಮ ಚಿತ್ರವಾಗಿದ್ದರೂ ಕೂಡಾ ಜನರ ಮನಸೆಳೆಯುವಲ್ಲಿ ವಿಫಲವಾಯ್ತು. ಇತ್ತೀಚೆಗೆ ಬಂದ ಮೀರಾ ಮಾಧವ ರಾಘವ ಕೂಡಾ ಚೆನಾಗಿದ್ರೂ ಕೂಡಾ ಕಾಸು ಹುಟ್ಟಿಸಲಿಲ್ಲ ಅನ್ನುವುದು ಅಷ್ಟೇ ವಾಸ್ತವ. ಧಾರಾವಾಹಿಗಳನ್ನು ನೋಡಿ ಮೆಚ್ಚಿಕೊಂಡವರೆಲ್ಲ ಕನಿಷ್ಟ ಒಂದು ಬಾರಿ ನೋಡಿದರೂ ಕೂಡಾ ಅವರಿಗೆ ಚಿತ್ರಕ್ಕೆ ಹಾಕಿದ ಕಾಸು ಹುಟ್ಟಿ ಮೇಲಿಷ್ಟು ಕೊಸರೂ ಬರುವುದರಲ್ಲಿ ಅನುಮಾನವಿರಲಿಲ್ಲ. ಆದ್ರೆ ಹಾಗಾಗಲಿಲ್ಲ. ಸೀತಾರಾಂ ಧಾರವಾಹಿಯ ಅಭಿಮಾನಿಗಳು ಚಿತ್ರ ನೋಡೋಲ್ವ? ಹಾಗಿರಲಾರದು. ಬಹುಶಃ ಕಿರುತೆರೆಯ ವ್ಯಾಕರಣಕ್ಕೆ ಒಗ್ಗಿದ ಸೀತಾರಾಂಗೆ ಹಿರಿತೆರೆಯ ಸೂತ್ರಗಳು ಅಷ್ಟಾಗಿ ಸಿದ್ಧಿಸಿಲ್ಲ ಇರಬಹುದೇನೋ.

 

ತಮ್ಮ ಪ್ರತೀ ಧಾರಾವಾಹಿಯಲ್ಲೂ ಮಧ್ಯಮ ವರ್ಗದ ಮನೆಗಳ ಸಮಸ್ಯೆ, ಸಮಾಧಾನ, ಸಿಡುಕು, ಸಿಟ್ಟು, ಸರಸ-ವಿರಸ, ಹೋರಾಟ, ಆಸೆ-ನಿರಾಸೆ, ಮೌಲ್ಯಗಳ ಜೊತೆಗೆ ಸಾಮಾಜಿಕ ಸಮಸ್ಯೆಯೊಂದನ್ನು ಕೂಡಾ ಬಿಂಬಿಸುವ ಸೀತಾರಾಂ ಈ ಬಾರಿ ಯಾವ ವಿಷಯ ಆರಿಸಿಕೊಂಡಿದ್ದಾರೆ ಅನ್ನೋದು ಸಧ್ಯಕ್ಕೆ ಕುತೂಹಲ. ಮುಕ್ತ-ಮುಕ್ತ ಯಶಸ್ವಿಯಾಗಲಿ ಅನ್ನೋದು ಹಾರೈಕೆ....ವಿಭಿನ್ನವಾಗಿರಲಿ ಅನ್ನೋದು ನಿರೀಕ್ಷೆ.

Advertisements

ಓ ಮನಸೇ ನೀ ಯಾಕೆ ಮಾತಾಡ್ತಿಲ್ಲ….??

ನೀನು ಮಾತು ನಿಲ್ಲಿಸಿ ಎಷ್ಟು ಕಾಲ ಆಯ್ತು? ತಿಂಗಳುಗಳು ಉರುಳಿ ಹೋಗ್ತಾ ಇವೆ. ನಿನ್ನ ಸದ್ದೂ ಇಲ್ಲ ಸುದ್ದಿಯೂ ಇಲ್ಲ. ಯಾಕೆ ಮೂಕವಾದೆ ಓ ಮನಸೇ.ನೀ ಹೀಗೇಕೆ ಮರೆಯಾದೆ? ಹೀಗೇಕೆ ಮುನಿಸಿಕೊಂಡು ಕುಂತು ಬಿಟ್ಟಿದ್ದೀಯ? ಮೊದಲೆಲ್ಲ ನೀನು ಎರಡು ವಾರಕ್ಕೊಮ್ಮೆ ಮಾತಾಡ್ತಾ ಇದ್ದೆ. ಆಮೇಲಾಮೇಲೆ ತಿಂಗಳಿಗೊಂದ್ಸಲ ಮಾತಾಡ್ತಿದ್ದೆ. ಅದ್ರೂ ನಮ್ಮ ಮನಸು ಅಲ್ವಾ ಪರ್ವಾಗಿಲ್ಲ ಬಿಡಿ ಅಂತ ಸುಮ್ಮನಿದ್ರೆ…ನೀ ಹಿಂಗೆ ಮಾಡಬಹುದಾ? ನಿನ್ನ ಪಿಸುಮಾತುಗಳಿಗೆ ಕಿವಿಯಾಗಲು ನಾವೇನೋ ತುದಿಗಾಲಲ್ಲಿ ನಿಂತಿದ್ದೀವಿ. ಅದ್ರೆ ನಿಂದೇ ತಕರಾರು. ಹಿಂದೊಮ್ಮೆ ನೀ ಹಿಂಗೇ ಮೌನವಾದಾಗ ಹತ್ರತ್ರ ವರ್ಷದವರೆಗೆ ಮಾತೇ ಆಡ್ಲಿಲ್ಲ. ಆಗ ಎಷ್ಟು ಬೇಜಾರು ಆಯ್ತು ಗೊತ್ತಾ? ಎಂದು ನಿನ್ನನ್ನು ಕಂಡೆನೋ ಯಾವಾಗ ನಿನ್ನ ಮಾತು ಕೇಳೋದು ಅಂತ ಕಾದು ಕೂತ್ಕೊಂಡ್ರೆ ನಿನ್ನ ಪತ್ತೇನೆ ಇಲ್ಲ. ಎತ್ಲಾಗ್ ಹೋದೆ ನೀ?

 

ನಿನ್ನ ಕಾಣಬೇಕೆಂದು ನಾ ಸುತ್ತಿದ ಪುಸ್ತಕದ ಅಂಗಡಿಗಳ ಲೆಕ್ಕ ಇಟ್ಟಿದ್ರೆ… ಮನಸೆ ಬಂದಿಲ್ಲ ಕಣ್ರಿ ಅಂತ ಅಂಗಡಿಯಾತ ಇವನದ್ಯಾವ ರಗಳೆ ಇದು ಅನ್ನೋ ತರ ಮುಖ ಮಾಡಿ ಹೇಳಿದಾಗ ಬೇಸರವಾದೂ ನಗುನಗುತ್ತ ನುಂಗಿದ ಮಾತುಗಳ ಲೆಕ್ಕ ಇಟ್ಟಿದ್ರೆ… ಅದೇ ಗಿನ್ನಿಸ್ ರೆಕಾರ್ಡ್ ಆಗ್ತಿತ್ತೇನೋ. ಪಾಪ ಅಂಗಡಿಯಾತ ತಾನೆ ಏನು ಮಾಡ್ತಾನೆ. ನಿನ್ನನ್ನು ಹುಡುಕಿಕೊಂಡು ಬರೋವ್ರೇನು ಒಬ್ರಾ ಇಬ್ರಾ? ಆದ್ರೂ ನೀ ಮಾತಾಡ್ತಿಲ್ಲ. ನಿಂಗೆ ಸತಾಯಿಸೋದು ಅಂದ್ರೆ ಇಷ್ಟಾನ?

 ಹೂಂ…ನಿನ್ನ ಬಗ್ಗೇನೆ ಇಷ್ಟೊತ್ತಿಂದಾ ಹೇಳ್ತಾ ಇರೋದು…ಮನಸು ಮನಸುಗಳ ಪಿಸುಮಾತು ಕೇಳಿಸ್ತಿಲ್ಲ ಅನ್ನೋ ಬೇಸರದಲ್ಲಿ ನನ್ನ ಮನಸಿನ ಮಾತು ಹೇಳಿದ್ದೀನಿ. ಇಷ್ಟರ ಮೇಲೂ ನೀ ಮಾತೇ ಆಡೋಲ್ಲ ಅನ್ನೋದಾದ್ರೆ ನಿನ್ನ ಚಾಳಿ ಟೂ… 🙂

 

ನಿನ್ನ ಮನಸಿನ್ಯಾಗಿನ ಮಾತು..ಹೊಟ್ಟೆಯೊಳಗಿನ ಗುಟ್ಟು, ಸಮಾಧಾನ, ಕಥೆ ಇದನ್ನೆಲ್ಲ ಎಷ್ಟು ಮಿಸ್ಸ್ ಮಾಡ್ಕೋತಿದಿನಿ ಗೊತ್ತಾ? ಸೈನ್ಸ್ ಪೇಜ್, ಆರ್ಟ್ ಪೇಜ್ , ಹೀಗೊಂದು ಕಥೆ…ಜೊತೆಗೆ ಅಲ್ಲಿಷ್ಟು ಇಲ್ಲಿಷ್ಟು ಅಂತ ಸಿಗೋ ನಮಗೆ ತಿಳಿಯದ ವಿಷ್ಯಗಳು..ಜೋಕ್ಸು, ಪದ್ಯ, ಎಲ್ಲದಕ್ಕೂ ಕಳಶವಿಟ್ಟಂತ ಮನಸಿಗೆ, ಪ್ರೀತಿಗೆ ಸಂಬಂದಿಸಿದ ಮುಖ್ಯ ಲೇಖನ… ಎಲ್ಲಾನು ನಾವು ಮಿಸ್ ಮಾಡ್ಕೋತಾ ಇದ್ರೆ ನೀನು ಸೈಡ್‌ವಿಂಗಲ್ಲಿ ನಿಂತ್ಕೊಂಡು ನಗ್ತಿದೀಯಾ?

 

ಒಂದ್ಸಲ ಹೀಗೆ ಮನಸಿನಲ್ಲಿ 2 ಸಾಲುಗಳು ಹೊಳೀತು. ಅದನ್ನು ನನ್ನ ಪತ್ರಕರ್ತ ಮಿತ್ರನ ಜೊತೆ ಹೀಗೆ ಹಂಚಿಕೊಂಡಿದ್ದೆ. ಅದು ಹಾಯ್ ಬೆಂಗಳೂರು ಮತ್ತು ಓ ಮನಸೆ ಪತ್ರಿಕೆಯ ಬಗ್ಗೆ…

 

ಹಾಯ್ ಬೆಂಗಳೂರು ಪ್ರತೀ ವಾರದ ಅಚ್ಚರಿ…!!

ಓ ಮನಸೇ ಎರಡು ತಿಂಗಳಿಗೊಂದು ಬಂದ್ರೆ ಅದೇ ಹೆಚ್ಚೂರೀ…!!

 

ಬೇಜಾರಾಯ್ತಾ? ಹೀಗೆ ಚುಚ್ಚಿದ್ರಾದ್ರೂ ಬೇಗ ಬರ್ತೀಯೇನೋ ಅಂತ ದೂರದ ಆಸೆ!

 

ನಿನ್ನ ಮೌನ ಮುರಿದು ಈಗಲಾದ್ರೂ ಬಾ ಮನಸೆ… ನಿನಗೆ ಪಿಸುಮಾತು ಕಲಿಸಿದನು ಹೇಳುವಂತೆ ತಡೆದ ಮಳಿ ಜಡಿದು ಬರುವ ಹಾಗೆ ಬಂದು ನಮ್ಮ ಮಾನಸಿಗೆ ಮುಂಗಾರಿನ ಮೊದಲೇ ತಂಪು ಹುಟ್ಟಿಸುತ್ತೀಯ ಅಂತ ನಂಬಿದ್ದೇನೆ. ಬರ್ತೀಯಾ ಅಲ್ವಾ?

 

ಮೊನ್ನೆ ಎಂದಿನಂತೆ ನನ್ನ ಅಚ್ಚುಮೆಚ್ಚಿನ ಪುಸ್ತಕ ಮಳಿಗೆಗೆ ಗಾಂಧಿಬಜಾರಿನ ಅಂಕಿತ ಪುಸ್ತಕ ಮಳಿಗೆಗೆ ಹೋಗಿದ್ದೆ – ವಾರಾಂತ್ಯದ ಖರ್ಚಿಗೆ ಏನಾದ್ರೂ ಬೇಕಲ್ಲ ಓದೋಕೆ ಅಂತ. ಹೊಸ- ಹಳೆ ಪುಸ್ತಕಗಳ ಮೇಲೆಲ್ಲ ಒಂದ್ಸಲ ಕಣ್ಣುಹಾಯಿಸಿ ೨-೩ ಪುಸ್ತಕವನ್ನು ಪ್ರೀತಿಯಿಂದ ಕೈಗೆತ್ತಿಕೊಂಡೆ. ಪುಸ್ತಕದ ಹಣ ಕೊಟ್ಟು ಇನ್ನೇನು ಹೊರಡಬೇಕೆನ್ನುವಷ್ಟರಲ್ಲಿ ಪ್ರಕಾಶ್ ಕಂಬತ್ತಳ್ಳಿ ಅವ್ರು ಕೇಳಿದ್ರು… ತೇಜಸ್ವಿಯವರ ಹೊಸ ಪುಸ್ತಕ ಬಂದಿದೆ ನೋಡಲಿಲ್ವ? ಅರೆ ಏನು ಹೇಳ್ತಾ ಇದ್ದಾರೆ ಇವ್ರು ಅಂಬಂತೆ ಇಡೀ ಮುಖವನ್ನೇ ಪ್ರಶ್ನೆ ಮಾಡಿಕೊಂಡು ನಿಂತೆ. ಅವ್ರು ನಗುನಗುತ್ತಾ ಪುಸ್ತಕ ಕೈಗಿಟ್ಟರು. ಹೌದು ಅನುಮಾನವೇ ಇಲ್ಲ. ತನ್ನ ವಿಶಿಷ್ಟ ವಿನ್ಯಾಸದಿಂದಲೇ ಮನ ಸೆಳೆಯುವ ಪುಸ್ತಕ ಪ್ರಕಾಶನದ ಪುಸ್ತಕ. ಹೆಸರು ಪಾಕ ಕ್ರಾಂತಿ ಮತ್ತು ಇತರ ಕತೆಗಳು. ಪುಟ ತೆರೆದಂತೆ ನನ್ನ ಸಂಶಯಗಳೆಲ್ಲ ಮರೆಯಾಯ್ತು. ಅದು ತೇಜಸ್ವಿಯವರ ನೆನಪಿನಲ್ಲಿ ಹೊರಬಂದ ಅವರ ಹಳೆಯ ಬರಹಗಳ ಸಂಗ್ರಹ. (ಅರೆ, ತೇಜಸ್ವಿ ಮರೆಯಾಗಿ ಆಗಲೇ ಒಂದು ವರ್ಷ ಆಯ್ತೆ!) ವಿವಿಧ ಪತ್ರಿಕೆಗಳಲ್ಲಿ ಅಚ್ಚಾದ ಆದರೆ ಪುಸ್ತಕ ರೂಪದಲ್ಲಿ ಬಾರದಿರುವ ಕಥೆ, ಲಲಿತ ಪ್ರಬಂಧ, ಲೇಖನಗಳು ಹೀಗೆ ಯಾವ ಹೆಸರಿಟ್ಟರೂ ಒಪ್ಪಿಕೊಳ್ಳಬಹುದಾದ ಬರಹಗಳ ಸಂಗ್ರಹ.

 

ತೇಜಸ್ವಿಯವರ ಬರಹಗಳು ಅಂದ್ರೆ ಹಾಗೆ. ಹೇಳಬೇಕಾದುದನ್ನು ಆಪ್ತವಾಗುವ ಹಾಗೆ ಹಾಸ್ಯದ ಎಳೆಯೊಂದು ಬರಹದುದ್ದಕ್ಕೂ ಹರಿಸುತ್ತ ಓದುಗರನ್ನು ತಮ್ಮ ಮಾಯಾಲೋಕದೆಳೊಗೆ ಎಳೆದೊಯ್ಯುವ ಪರಿಯೇ ಅವರ ಬರಹ ನಂಗೆ ಇಷ್ಟವಾಗಲು ಕಾರಣ. ಉದಾಹರಣೆ ಬೇಕಿದ್ರೆ ಈ ಪುಸ್ತಕದಲ್ಲಿರುವ ಪಾಕಕ್ರಾಂತಿ ಬರಹವನ್ನು ಓದಿ ನೋಡಿ. ಪಾಕಶಾಸ್ತ್ರದ ಪ್ರಯೋಗಗಳನ್ನು ಮಾಡುವ ಕಥೆ ಹೇಳುತ್ತ, ಇವರ ಪಾಕ ಪ್ರಯೋಗಕ್ಕೆ ಹೆದರಿದ ನಾಯಿ ಅನ್ನದ ತಟ್ಟೆ ಕಂಡ ಕೂಡಲೆ ಭಯೋತ್ಪಾದಕರನ್ನು ಕಂಡಷ್ಟೇ ವೇಗವಾಗಿ ಕಾಲಿಗೆ ಬುದ್ದಿ ಹೇಳುವ ಪ್ರಸಂಗ, ಹೇಗಾದರೂ ಮಾಡಿ ನಾಯಿ ತಿನ್ನುವಂತೆ ಮಾಡುವ ಪ್ರಯತ್ನದಲ್ಲಿ ಒಣಮೀನು ತಂದು ಪಡುವ ಪಚೀ(ಜೀ)ತಿ, ಸ್ನೇಹಿತನ ಸಲಹೆಯಂತೆ ಕುಕ್ಕರ್‌ನಲ್ಲಿ ಅಡುಗೆ ಮಾಡೋದು ನೀರು ಕುಡಿದಷ್ಟೇ ಸುಲಭ ಅಂತ ಹೋಗಿ ಅದು ಒಂದಕ್ಕೆರಡಾಗಿ ಸ್ಫೋಟವಾಗಿ ಪೋಲಿಸರು ಬಾಂಬು ತಯಾರಿ ನಡೀತಿದೆ ಅನ್ನೋ ಅನುಮಾನದಲ್ಲಿ ತಪಾಸಣೆಗೆ ಹೋಗಿ ಅಲ್ಲಿ ಜಾರಿ ಬೀಳುವಲ್ಲಿಗೆ ಪರ್ಯಾವಸಾನಗೊಳ್ಳುವ ಈ ಕಥಾನಕದ ಮಜ ಓದಿಯೇ ತಿಳಿಯಬೇಕು…ತೇಜಸ್ವಿಯವರಿಗೇ ಮೀಸಲಾದ ಅವರದ ಆದ ಬರಹದ ಶೈಲಿಯಲ್ಲಿ. ಇದಲ್ಲದೆ ಇನ್ನು ಹಲವು ಪತ್ರಿಕೆಗಳಲ್ಲಿ ಪ್ರಕಟವಾದ ವಿವಿಧ ಬರಹಗಳ ಸಂಗ್ರಹವಿದೆ. ಒಮ್ಮೆ ಓದಿ ನೋಡಿ.

 

ತೇಜಸ್ವಿಯವರ ಮಿಕ್ಕ ಪುಸ್ತಕಗಳ ಬಗ್ಗೆ ಇನ್ಯಾವತ್ತಾದ್ರೂ ಬರೆದೇನು.

 

ಪಾಕ ಕ್ರಾಂತಿ ಮತ್ತು ಇತರ ಕತೆಗಳು

ಬೆಲೆ           ೬೦ ರೂಪಾಯಿಗಳು

ಪ್ರಕಾಶನ       – ಪುಸ್ತಕ ಪ್ರಕಾಶನ ಮೂಡಿಗೆರೆ

ಲೇಖಕರು      – ಕೆ.ಪೂಚಂತೆ