Archive for ಸೆಪ್ಟೆಂಬರ್, 2008

ನಿನ್ನೆ(29 ಸೆಪ್ಟಂಬರ್, 2008) ವಿಜಯ ಕರ್ನಾಟಕದ ಸಿಂಪ್ಲಿಸಿಟಿ ಪುಟದಲ್ಲಿ ಬಂದ ನನ್ನ ಹನಿಗಳು…..

* * * * * * * * * * * * * * * * * *

ಮರೆತು ಕೂಡ ನಿನ್ನ ನೆನಪಾಗದಿರಲಿ ಅಂತ

ಮೊನ್ನೆ ದೇವರನ್ನು ಬೇಡುತ್ತಿದ್ದೆ

ಅಷ್ಟರಲ್ಲಿ ನಿನ್ನ ನೆನಪಾಯ್ತು ನೋಡು

ಏನು ಬೇಡುತ್ತಿದ್ದೆ ಅನ್ನೋದನ್ನೇ ಮರೆತುಬಿಟ್ಟಿದ್ದೆ

* * * * * * * * * * * * * * * * * *

ಮೊನ್ನೆ ಸಿಕ್ಕಾಗ ನೀ

ಗುರುತೇ ಇಲ್ಲದವಳಂತೆ

ಮುಖ ತಿರುಗಿಸಿ ಹೋದೆಯಲ್ಲ

ನಿಜ ಹೇಳಬೇಕೆಂದ್ರೆ

ನನಗೂ ನಿನ್ನ ಈ ಮುಖದ

ಪರಿಚಯವೇ ಇರಲಿಲ್ಲ

* * * * * * * * * * * * * * * * * *

ನೀ ತೊರೆದು ಹೋದೆ ಅಂತ

ನನಗೆ ಬೇಜಾರೇನಿಲ್ಲ

ಆದರೆ ಹೋಗುವ ಮುನ್ನ

ನಿನ್ನ ಮರೆಯೋದು

ಹೇಗೆ ಅಂತಾದ್ರೂ ಕಲಿಸಬಹುದಿತ್ತಲ್ಲ

 

* * * * * * * * * * * * * * * * * *

 

ಅಳುವಿನ ಹಿಂದಿರುವ

ನಗೆಯ ಹುಡುಕ ಹೊರಟವನ

ನಗೆಯ ಹಿಂದಿದ್ದ ಅಳು

ಯಾರಿಗೂ ಕಾಣಲೇ ಇಲ್ಲ

* * * * * * * * * * * * * * * * * *

 

ಹೆಣ್ಣಿನಲ್ಲಿ ಇರುತ್ತಂತೆ

ಸಹನೆ ಪ್ರೀತಿ ಕರುಣೆ

ಜೊತೆಗೆ ಮೋಸ ಕೂಡಾ ಇರುತ್ತೇಂತ

ತಿಳಿಸಿದ್ದು ನೀನೇ ಕಣೆ

* * * * * * * * * * * * * * * * * *

Advertisements

ಒಂದೇ ಮಾತಲ್ಲಿ ಹೇಳ್ತೀನಿ ಕೇಳಿ. ಇದು ಉಪ್ಪಿಯ ಕಟ್ಟಾ ಅಭಿಮಾನಿಗಳಿಗೆ ಮಾತ್ರ ತಯಾರಾದ ಚಿತ್ರ. ಉಪ್ಪಿಯ ಹಳೆಯ ಚಿತ್ರಗಳ ಮಟ್ಟಕ್ಕೆ ಮುಟ್ಟುವ ಮಾತು ಬದಿಗಿರಲಿ…ಅದರ ಸನಿಹ ಕೂಡಾ ಸುಳಿಯಲು ಯೋಗ್ಯತೆ ಇಲ್ಲದ, ಅಸಲಿಗೆ ಕಥೆ ಅಂತ ಕರೆಸಿಕೊಳ್ಳಲೇ ಅಯೋಗ್ಯವೆನ್ನಿಸುವ ವಿಷಯವನ್ನಿಟ್ಟುಕೊಂಡು ಇಂತದ್ದೊಂದು ಚಿತ್ರವನ್ನು ಅಭೂತಪೂರ್ವ ಚಿತ್ರ ಅನ್ನುವ ರೀತಿಯಲ್ಲಿ ಪ್ರಚಾರ ಕೊಡುತ್ತಿರುವ ಚಿತ್ರತಂಡ, ಅವರು ಬಯಸಿದಂತೆ ಹಾಡಿ ಹೊಗಳಿದ ಮಾಧ್ಯಮಗಳು….ಇವರೆಲ್ಲ ಬುದ್ಧಿವಂತರೇ… ಅವರು ಹೇಳಿದ್ದನ್ನು ನಂಬಿಕೊಂಡು ಓಂ, , ರಕ್ತಕಣ್ಣೀರು ಚಿತ್ರಗಳ ಉಪ್ಪಿಯನ್ನು ಹುಡುಕಲು ಹೋಗೋ ನಾವೇ ದಡ್ಡರು. ಮೂಲ ತಮಿಳು ಚಿತ್ರ ನಾನು ನೋಡಿಲ್ಲ. ಅದು ಹೇಗಿದೆಯೋ ಗೊತ್ತಿಲ್ಲ. ಇದು ಮಾತ್ರ ಪಂಚಾಮೃತದ ಹೆಸರಲ್ಲಿ ಹಳಸಲು ಚಿತ್ರಾನ್ನಕ್ಕೆ ಬರೇ ಉಪ್ಪಿನ ಒಗ್ಗರಣೆ ಹಾಕಿದ್ದಾರೆ. ಉಪ್ಪಿಗಿಂತ ರುಚಿ ಬೇರೆ ಇಲ್ಲ ಅಂತ ತಿಳ್ಕೊಂಡು ಬರೀ ಉಪ್ಪು ಸುರಿದು ಮಾಡಿದ ಈ ಚಿತ್ರ ಉಪ್ಪಿಯ ಪ್ಲಾಪ್ ಚಿತ್ರಗಳ ಹನುಮಂತನ ಬಾಲದಂತಹ ಪಟ್ಟಿಗೆ ಇನ್ನೊಂದು ಚಿತ್ರವಾಗುತ್ತಾ….ಅಥವಾ ಬರೀ ಉಪ್ಪಿ ಅಭಿಮಾನಿಗಳೇ ಚಿತ್ರವನ್ನು ದಡ ಹತ್ತಿಸುತ್ತಾರಾ ಕಾದು ನೋಡಬೇಕು.

 

ನಿಜ ಹೇಳ್ಬೇಕಂದ್ರೆ ಈ ಚಿತ್ರ ನೋಡಿ ಬಂದ ಮೇಲೆ ಈ ಚಿತ್ರಕ್ಕೊಂದು ವಿಮರ್ಶೆ ಬರೆಯೋ ಸಹನೆ, ಮನಸ್ಸು ಎರಡೂ ನನ್ನಲ್ಲಿ ಇದ್ದಿರಲಿಲ್ಲ. ಆದರೆ ಪತ್ರಿಕೆಗಳಲ್ಲಿ ಬಂದ ವಿಮರ್ಶೆಗಳನ್ನು ಓದಿದ ಮೇಲೆ ಬರೆಯಲೇಬೇಕು ಅನ್ನುವ ನಿರ್ಧಾರ ಮಾಡಿದೆ. ಇಡೀ ಚಿತ್ರದಲ್ಲಿ ಎಲ್ಲೂ ಹುಡುಕಿದರೂ ಸಿಗದ ಅದ್ಯಾವ ಪಂಚಾಮೃತದ ಸವಿಯನ್ನು ಇವರೆಲ್ಲ ಉಂಡಿದ್ದಾರೋ ಅನ್ನೋದು ಆ ಭಗವಂತನೇ ಬಲ್ಲ. ಚಿತ್ರದಲ್ಲಿ ಒಳ್ಳೆಯ ಅಂಶವನ್ನು ಭೂತಗಾಜಿನಲ್ಲಿಟ್ಟು ಹುಡುಕಿದರೂ ಕೂಡಾ ಕಾಣ ಸಿಗೋದು ಇಷ್ಟೇ… ಮಂಗಳೂರು ಶೈಲಿಯ ಕನ್ನಡದಲ್ಲಿ ಉಪ್ಪಿ ಹೇಳಿದ ಎರಡ್ಮೂರು ಡೈಲಾಗುಗಳು, ಎರಡು ಹಾಡುಗಳು. ಅಷ್ಟು ಬಿಟ್ರೆ ಕ್ಯಾಮರಾಮನ್, ನಾಯಕಿಯರು, ಪೋಷಕ ಪಾತ್ರಗಳು ಯಾರಿಗೂ ಇಲ್ಲೇನು ಕೆಲಸವೇ ಇಲ್ಲ. ಬರೀ ಚಿತ್ರವಿಚಿತ್ರ ಸ್ಟಂಟುಗಳು, ಅದೇ ಅದೇ ಕೋರ್ಟಿನ ದೃಶ್ಯಗಳು, ನಡುವೆ ಒಂದೆರಡು ಡೈಲಾಗುಗಳು. ಮೊನ್ನೆ ಯಾವುದೋ ವಾಹಿನಿಯೊಂದರ ಸಂದರ್ಶನ ಕಾರ್ಯಕ್ರಮದಲ್ಲಿ ಉಪ್ಪಿ ಹೇಳ್ತಾ ಇದ್ದರು. ನಾನು ಚಿತ್ರವನ್ನು 10 ವರ್ಷ ಮುಂಚೆ ಮಾಡಿಬಿಟ್ಟೆ. ಆ ಕಾಲಕ್ಕೆ ಅದು ತುಂಬಾ ಅಡ್‌ವಾನ್ಸ್‌ಡ್ ಆಗಿತ್ತು. ಅದು ಈಗ ಬಂದಿದ್ರೆ ಇನ್ನೂ ಹೆಚ್ಚು ಜನ ಇಷ್ಟ ಪಡ್ತಾ ಇದ್ರೆನೋ ಅಂತ. ಇರಬಹುದೇನೋ..ಉಪ್ಪಿ. ಆದರೆ ಬುದ್ಧಿವಂತ ಮಾತ್ರ ಖಂಡಿತ ಹಾಗಲ್ಲ ಬಿಡಿ. ಅದು ಯಾವ ಕಾಲಕ್ಕೂ ಬರಬಾರದಂತ ಚಿತ್ರ. ಈ ಭಾಗ್ಯಕ್ಕೆ ತಮಿಳಿಂದ ಕತೆ ಬರಬೇಕಿತ್ತಾ?

 

ಸಾಕು ಈ ಚಿತ್ರಕ್ಕೆ ಇದಕ್ಕಿಂತ ಹೆಚ್ಚು ಬರೆಸಿಕೊಳ್ಳುವ ಯೋಗ್ಯತೆ ಖಂಡಿತ ಇಲ್ಲ. ಅಥವ ಈ ಚಿತ್ರದ ಬಗ್ಗೆ ಬರೆಯುವಷ್ಟು, ಇದರಲ್ಲಿ ಪಂಚಭಕ್ಷ ಪರಮಾನ್ನ ಹುಡುಕುವಷ್ಟು ಬುದ್ಧಿವಂತಿಕೆ ನನಗೆ ಇಲ್ಲವೇನೋ. ನಾನು ಓದಿದ ಪತ್ರಿಕೆಗಳಲ್ಲಿ ಟೈಮ್ಸ್ ಆಫ್ ಇಂಡಿಯಾ ಕನ್ನಡದಲ್ಲಿ ಮಾತ್ರ ಚಿತ್ರದ ಸರಿಯಾದ ವಿಮರ್ಶೆಯನ್ನು ಬರೆದಿತ್ತು. ಉಪ್ಪಿಯ ಚಿತ್ರ ಅಂತ ನಿರೀಕ್ಷೆ ಇಟ್ಟುಕೊಂಡು ಹೋಗುವವರಿಗಾಗುವ ನಿರಾಸೆಯನ್ನು ಸರಿಯಾಗಿ ಗುರುತಿಸಿತ್ತು. ಚಿತ್ರ ಮುಗಿದ ಮೇಲೆ ಉಪೇಂದ್ರ ಹೇಳುತ್ತಿದ್ದ ಒಂದೇ ಡೈಲಾಗು ಕಿವಿಯಲ್ಲಿ ಅನುರಣಿಸುತ್ತಿತ್ತು… ನಾನು ಅವನಲ್ಲ… ನಾನು ಅವನಲ್ಲ. ಹೌದು ಉಪ್ಪಿ ಸರಿಯಾಗಿಯೇ ಹೇಳಿದ್ದೀಯ…ನೀನು ಖಂಡಿತ ಆ ಹಳೆಯ ಉಪ್ಪಿಯಲ್ಲ.

ಈ ಸಲ ಸ್ವಲ್ಪ ಸುಲಭವಾಗಿರುವ ಒಂದಿಷ್ಟು ಒಗಟು ಕೇಳ್ತಾ ಇದ್ದೇನೆ. ಉತ್ತರ ನಿಮಗೆ ಖಂಡಿತವಾಗಿಯೂ ಗೊತ್ತಿರುತ್ತೆ ಬಿಡಿ. ಹಾಗಾಗಿ ಒಗಟು ನೋಡಿದ ತಕ್ಷಣ ಉತ್ತರ ಕೊಟ್ಟು ಬಿಡಿ

 

೧.         ದೇವರಿಲ್ಲದ ಗುಡಿಗೆ ಬಗ್ಗಿ ಬಗ್ಗಿ ಸಲಾಮು

೨.         ಕಪ್ಪೆ ಮುಟ್ಟದ ಕೈಲಾಸದ ನೀರು

೩.         ಅಜ್ಜನ ಹೊಟ್ಟೆ ಹಿಡ್ಕೊಂಡು ಮೊಮ್ಮಗ ನೇತಾಡ್ತಾನೆ

೪.         ಕಾಸಿನ ಕುದುರೆಗೆ ಮಾರುದ್ದ ಲಗಾಮು

೫.         ಕೈ ಹಿಡಿತಾನೆ ಗಂಡನಲ್ಲ. ಬಟ್ಟೆ ಹರಿಯುತ್ತಾನೆ ಹುಚ್ಚನಲ್ಲ

 

ಉತ್ರ ಗೊತ್ತಾಯ್ತಲ್ವಾ? ಬೇಗ ಬೇಗ ಹೇಳಿ….

ನನ್ನ ಒಗಟಿಗೆ ಉತ್ತರ…

Posted: ಸೆಪ್ಟೆಂಬರ್ 26, 2008 in ಹಾಗೆ ಸುಮ್ಮನೆ
ಟ್ಯಾಗ್ ಗಳು:, ,

ಈ ವಾರದ ಶುರುವಿನಲ್ಲಿ ಒಂದು ಒಗಟು ಪೋಸ್ಟ್ ಮಾಡಿದ್ದೆ. ನಿಮ್ಮಲ್ಲಿ ಕೆಲವರು ಉತ್ತರ ನೀಡಲು ಪ್ರಯತ್ನ ಪಟ್ಟರೂ ಸರಿ ಉತ್ತರ ಹೇಳಿದ್ದು ಇಬ್ಬರು. ಅವರಲ್ಲಿ ಪವನ್ ಮಾತ್ರ ಸಮರ್ಪಕ ವಿವರಣೆಯೊಂದಿಗೆ ಸರಿ ಉತ್ತರ ನೀಡಿದ್ದಾರೆ. ನೀಲಗಿರಿ ಅವರು ಉತ್ತರ ಕೊಟ್ಟಿದ್ದರೂ ಅನುಮಾನದಲ್ಲಿ ಹೇಳಿದ್ದಾರೆ.

 

ನಿಮ್ಮ ಉತ್ತರಗಳು ಹಾಗೂ ಸರಿಯುತ್ತರ ಕೆಳಗಿದೆ ನೋಡಿ…

 

 ಕತ್ತಲೆ ಮನೆಯೊಳಗಿದ್ದಾತನ ಕೊಂದಾತನ ಅಗ್ರಜನ ಪಿತನ ವಾಹನದಂತೆ ಇದ್ದೀಯಲ್ಲೋ..

ಸರಿಯುತ್ತರ ಕೋಣ

ಹೇಗೆ ಅಂತ ಕೇಳ್ತೀರಾ?

 

ಕತ್ತಲೆ ಮನೆಯೊಳಗಿದ್ದಾತಕೀಚಕ

ಕೀಚಕನ ಕೊಂದಾತ – ಭೀಮ

ಭೀಮನ ಅಗ್ರಜ ಧರ್ಮರಾಯ

ಅವನ ಪಿತ ಯಮ

ಯಮನ ವಾಹನ ಕೋಣ

 

ರಂಜಿತ್

ಹೊಳೆಯುತಿಲ್ಲ.. L ಆದರೆ ಕ್ಲೂ ಕೊಡದೇ ಹೋದರೆ ಹೇಗೆ?

 

ಸುಶ್ರುತ ದೊಡ್ಡೇರಿ

ನಂಗೊತ್ತು ಆದ್ರೆ ಹೇಳೊಲ್ಲ J

 

ನೀಲಗಿರಿ

ಎಮ್ಮೆ ಅಥವಾ ಕೋಣ ಇರಬಹುದಾ??!!

 

ಪವನ್

ಕತ್ತಲೆ ಕೋಣೆಯಲ್ಲಿದ್ದವನು ಕೀಚಕ. ಅವನನ್ನು ಕೊಂದವನು ಭೀಮ. ಅವನ ಅಗ್ರಜ ಧರ್ಮರಾಯ. ಅವನ ಪಿತ ಯಮ. ಯಮನ ವಾಹನ ಕೋಣ. ಸರೀನಾ?

 

ಅನುಪಮ

 ಗರುಡ ಇರಬಹುದೇ?

 

ಶಿಶಿರ ಕನ್ನಂತ

ಗೂಬೆಇರಬಹುದೇ?

 

ನವಿಲುಗರಿ ಸೋಮು

ಹಂದೀನಾ ಗುರುಗಳೇ?

 

ವಿಕಾಸ್

ಕತ್ತಲೆ ಮನೆಯಾವುದು ಅಂತ ಗೊತ್ತಾಗ್ತಿಲ್ಲ!

ಅದು ಗೊತ್ತಾದ್ರೆ ಉತ್ರ ಗೊತ್ತಾದಂಗೆ.

 

ಉತ್ತರಿಸಲು ಯತ್ನಿಸಿದ ಎಲ್ಲರಿಗೂ ಧನ್ಯವಾದ. ಸರಿ ಉತ್ತರ ನೀಡಿದ ಪವನ್ ಮತ್ತು ನೀಲಗಿರಿಯವರಿಗೆ ಅಭಿನಂದನೆಗಳು

ನಿಮ್ಮಲ್ಲೂ ಈ ತರಹದ ಒಗಟು ಇದ್ದರೆ ಹಂಚಿಕೊಳ್ಳಿ. ಎಲ್ಲ ಸೇರಿ ಬಿಡಿಸೋಣ.

ಮನಸಿನ ಮರ್ಮರದಲ್ಲಿ ನಾನು ಬರೆಯುತ್ತಿರುವ ನೂರನೇ ಲೇಖನವಿದು. ಸರಿಯಾಗಿ ಆರು ತಿಂಗಳ ಹಿಂದೆ ಮಾರ್ಚ್ 24ರಂದು ಮನಸಿನ ಗರ್ಭದಲ್ಲಿದ್ದ ಮಾತುಗಳು ಶಿಶುವೊಂದು ಅಕ್ಷರರೂಪದಲ್ಲಿ ಬ್ಲಾಗಿನಂಗಳದಲ್ಲಿ ಜನ್ಮತಾಳಿತ್ತು. ಆರು ತಿಂಗಳೆಂದರೆ ಮಗು ಅಂಬೆಗಾಲಿಡಲು ಶುರು ಮಾಡುವ ಮುಂಚಿನ ಕಾಲ. ಈ ಅವಧಿಯಲ್ಲಿ ಮಗು ತೆವಳುತ್ತಾ, ಹೊರಳಾಡುತ್ತಾ ನೂರು ಲೇಖನಗಳ ಹೊಸ್ತಿಲು ದಾಟಿದ್ದಕ್ಕೆ ಇವತ್ತು ಪಾಯಸ ಮಾಡಬೇಕೋ ಏನೋ

 

ನೂರು ಲೇಖನಗಳನ್ನೇನೋ ಬರೆದದ್ದಾಯ್ತು. ಮಕ್ಕಳು ಏನು ಮಾಡಿದ್ರು ಚೆಂದ ಅನ್ನುತ್ತಾರಲ್ಲ ಆ ರೀತಿ ನಿಮ್ಮಲ್ಲನೇಕರು ನನ್ನ ಬರವಣಿಗೆಯ ಶಿಶುವಿನ ಬಾಲಲೀಲೆಗಳನ್ನು ಮೆಚ್ಚಿದ್ದೀರಿ. ಬ್ಲಾಗ್ ಲೋಕದ ದಿಗ್ಗಜರ ಎಡೆಯಲ್ಲಿಯೂ ನನ್ನ ಬ್ಲಾಗಿಗೂ ಒಂಚೂರು ಜಾಗ ಕೊಟ್ಟಿದ್ದೀರಿ. ನಿಮ್ಮ ಮೆಚ್ಚುಗೆಯ ಚಪ್ಪಾಳೆಯನ್ನು ಪ್ರತಿಕ್ರಿಯೆಗಳ ರೂಪದಲ್ಲಿ ನೀಡಿ ಹುರಿದುಂಬಿಸಿದ್ದೀರಿ. ಈ ಪ್ರೋತ್ಸಾಹ ಮುಂದೆಯೂ ಜಾರಿಯಲ್ಲಿರುವ ವಿಶ್ವಾಸ ನನಗಿದೆ. ನಾನು ಇಷ್ಟೆಲ್ಲ ಬರೆಯುತ್ತೇನೆಂದು ಎಣಿಸಿರಲಿಲ್ಲ ಮುಂತಾದ ಕ್ಲೀಷೆಯ ಮಾತುಗಳೆಲ್ಲ ಬದಿಗಿರಲಿ ಬಿಡಿ. ಬ್ಲಾಗಿನಲ್ಲಿ ನಿಮಗೇನು ಇಷ್ಟವಾಯ್ತು, ಏನು ಇಷ್ಟವಾಗಲಿಲ್ಲ, ಏನೇನು ವಿನೂತನ ಪ್ರಯೋಗಗಳನ್ನು ಮಾಡಬಹುದು, ಯಾವ ರೀತಿಯ ಬರವಣಿಗಳು ಇದ್ದರೆ ಚೆಂದ… ಹೀಗೆ ನಾಲ್ಕು ಮಾತು ಹೇಳಿದ್ರೆ ತುಂಬಾ ಒಳ್ಳೇದಿತ್ತು.

 

ಬ್ಲಾಗೊಂದರಲ್ಲಿ ನೂರು ಬರಹಗಳು ಬರುವುದು ತೀರಾ ಹೇಳಿಕೊಳ್ಳುವಂತ ಮಹತ್ಸಾಧನೆಯೇನೂ ಅಲ್ಲವೆಂಬ ಸ್ಪಷ್ಟ ಅರಿವು ನನಗಿದೆ. ಆದರೆ ಬದುಕಲ್ಲಿ ಹೀಗೆ ಸಣ್ಣ-ಪುಟ್ಟ ಸಂಭ್ರಮಗಳನ್ನು ಆಸ್ವಾದಿಸಿ ಖುಷಿಯಾಗಿರಲು ನಯಾ ಪೈಸಾ ಖರ್ಚಿಲ್ಲದಿರುವಾಗ ನಿಮ್ಮೊಂದಿಗೆ ಈ ಸಂಭ್ರಮವನ್ನು ಹಂಚಿಕೊಳ್ಳೋ ಆಸೆಯಿಂದ ಇದನ್ನೆಲ್ಲ ಬರೆಯಲು ಹೊರಟೆ. ಅಲ್ಲದೆ ಇಲ್ಲಿನ ಲೇಖನಗಳು ಎಷ್ಟು ಮಾಹಿತಿಪೂರ್ಣವಾಗಿವೆ, ಮುದನೀಡುವಂತಿದೆ ಅನ್ನೋದೆ ಯಶಸ್ಸಿನ ನಿಜವಾದ ಮಾನದಂಡ ಎಂಬ ಎಚ್ಚರಿಕೆ ಕೂಡಾ ಇದೆ. ಹಾಗಾಗಿ ನಿಮಗನ್ನಿಸಿದ್ದನ್ನು ನೇರವಾಗಿ, ಯಾವ ಸಂಕೋಚವು ಇಲ್ಲದೆ ತಿಳಿಸಿದರೆ, ಹಾಗೆ ಬರೆಯುವಂತೆ ಪ್ರಯತ್ನವನ್ನು ಮಾಡುವ ಉತ್ಸಾಹವಂತೂ ನನ್ನಲ್ಲಿದೆ.

 

ಈ ಪಯಣದಲ್ಲಿ ಇನ್ನೂ ಹೆಚ್ಚು ಹೆಚ್ಚು ಬರೆಯುವಂತೆ ಪ್ರೋತ್ಸಾಹ ನೀಡಿದ ಎಲ್ಲರನ್ನೂ ಕೃತಜ್ಞತೆಯಿಂದ ಸ್ಮರಿಸುತ್ತೇನೆ. ವಿಶೇಷವಾಗಿ ನನ್ನ ಬರವಣಿಗೆಯನ್ನು ಮೆಚ್ಚಿ ಪ್ರತಿಕ್ರಿಯೆಯನ್ನು ನೀಡಿದ ಭಾಗ್ವತ್ರು, ವಿಕಾಸ್, ಸುಶ್ರುತ, ಹರೀಶ್ಸೋಮು,  ಶ್ರೀನಿಧಿ, ಚೇತನಾ, ಟೀನಾ, ನೀಲಾಂಜಲ, ಮಾಲಾರಾವ್, ನಾವಡ, ಮಣಿಕಾಂತ್, ರಂಜಿತ್, ಸಂದೀಪ್ ಕಾಮತ್, ಚಿತ್ರಾ, ಸುನಾಥ್, ಅರೇಹಳ್ಳಿ ರವಿ, ಗಣೇಶ್, ಶಾನಿ, ಶಂಕರ್, ಜೋಮನ್, ವಿಶಾಲ್,  ಭೀಮೇಶ್, ಸಂತು, ವಿಶಾಲಮತಿ, ಹೊಳ್ಳ, ಶಿಶಿರ, ರಾಜಣ್ಣ, ಮಯ್ಯ, ಯೊಗೀಶ, ಗುರುಪ್ರಸಾದ್, ಗುರು, ಸುನಿಲ್, ರಘು, ಸುಹಾಸ್, ವಿಮಲ ನಾವುಡ, ಯೋಗಾನಂದ, ಶ್ರೀಪ್ರಕಾಶ್, ಸತ್ಯ, ಲಕ್ಷ್ಮಿಕೃಷ್ಣ, ಅನುಪಮ, ಆನಂದ್,ಶ್ರೀರಾಮ್, ವಿನಯ ಉಡುಪ, ಯು.ಎನ್.ಶೆಟ್ಟಿ, ಲೊಡ್ಡೆ, ಯಶೋದ, ಉಶಾರಾಣಿ,ಸ್ವಾಮಿ, ವಿಘ್ನೇಶ್, ರವೀಂದ್ರ ಭಟ್, ವಿಜಯ್ ಕುಮಾರ್, ಜಗದೀಶ್…..ಹೀಗೆ ಪಟ್ಟಿ ಇನ್ನೂ ಉದ್ದಕ್ಕಿರುವುದರಿಂದ ಸರ್ವರಿಗೂ… ಹಾಗೂ ವರ್ಡ್‌ಪ್ರೆಸ್‌ನ ಸರ್ವರ್ಗೂ ನನ್ನ ಧನ್ಯವಾದ.

 

ನನ್ನ ಎರಡೂ ಬ್ಲಾಗ್ ಬಗ್ಗೆ ಬರೆದ ಕೆಂಡಸಂಪಿಗೆ, ನನ್ನ  ‘ಕುಂದಾಪ್ರ ಕನ್ನಡ’ ಬ್ಲಾಗ್ ಪರಿಚಯಿಸಿದ ಅವಧಿ, ಕನ್ನಡ ಪ್ರಭ ಗಳಿಗೆ ನೂರರ ಸಂಭ್ರಮದ ಸಾವಿರ ನಮನ

 

ಈ ಬರಹ ಬರೆಯುವ ಹೊತ್ತಿನಲ್ಲಿ ಇಲ್ಲಿನ ಬರಹಗಳು 5989ಕ್ಕೂ ಹೆಚ್ಚು ಸಲ ಓದಲ್ಪಟ್ಟಿವೆ. ಇದು ಇನ್ನೂ ಹೆಚ್ಚು ಜನರನ್ನು ಮುಂಬರುವ ದಿನಗಳಲ್ಲಿ ತಲುಪುತ್ತದೆ ಎನ್ನುವ ನಿರೀಕ್ಷೆ, ತಲುಪಬೇಕೆಂಬ ಆಸೆ ಎರಡೂ ಇದೆ.

 

ಮುಗಿಸುವ ಮುನ್ನ ನನ್ನ ನೂರು ಬರಹಗಳಲ್ಲಿ ನನಗೆ ಇಷ್ಟವಾದ / ತೃಪ್ತಿಕೊಟ್ಟ ಹತ್ತು ಬರಹಗಳು ಮತ್ತು ಇಲ್ಲಿಯ ತನಕ ಹೆಚ್ಚು ಮಂದಿ ಒದಿ ಇಷ್ಟಪಟ್ಟ ಹತ್ತು ಬರಹಗಳ ಪಟ್ಟಿಯೊಂದನ್ನು ನಿಮ್ಮ ಮುಂದಿರಿಸುತ್ತಿದ್ದೇನೆ. ಈ ತನಕ ನೀವು ಓದಿರದಿದ್ದಲ್ಲಿ ಓದಿ.. ಹೇಗಿದೆ ಹೇಳಿ.

 

ನನ್ನಿಷ್ಟದ ಬರಹಗಳು

ಮಾಧವಿಹೊರಟಳು ಕಾನನಕೆ

ಮೂಕಜ್ಜಿಯ ಕನಸು.. ಮೂಕವಾಯ್ತು ಮನಸು

ಮತ್ತೆ ನೆನಪಾಯಿತು ಕಮಲಶಿಲೆ ಹಬ್ಬ

ನಿರೀಕ್ಷೆಯಲ್ಲಿನ ಸುಖ ನಿಜದಲ್ಲಿಲ್ಲ !!

ಕಂಚಿನ ಕಂಠದೊಡನೆ ಮಿಂಚಿನ ಸಂವಾದ – ಭಾಗವತ ಹೊಸಂಗಡಿ ರವೀಂದ್ರ ಶೆಟ್ಟಿ ಅವರೊಂದಿಗೆ

ನಂಬಿಕೆದ್ರೋಹ ಅನ್ನೋದು ರಿಲೇಟಿವಾ?

ಸಾಫ್ಟ್ವೇರ್ ಕಂಪೆನೀಲಿ ಏನು ಮಾಡ್ತಾರೆ…?

ಬೇಕೇ ಹೇಳಿಈ ಪರಿಯ ದ್ವೇಷ…?

ಬದುಕಿನ ಆಟೋಗ್ರಾಫ್ ತುಂಬೆಲ್ಲಾ ಖಾಲಿ ಹಾಳೆಗಳು..

ಕುವೆಂಪು ಮಲೆನಾಡಿನಲ್ಲಿ ಒಂದು ಸುತ್ತು..

 

ಓದುಗರ ಅಚ್ಚುಮೆಚ್ಚು….

ಸಾಫ್ಟ್ವೇರ್ ಕಂಪೆನೀಲಿ ಏನು ಮಾಡ್ತಾರೆ…?

ತೀರ್ಥಳ್ಳಿ ಸಿಡಿಲು, ಕಾರ್ಕಳ ಗುಡುಗು, ತೊಂಬಟ್ಟು-ಕೊಳಲಿ ಮಿಂಚು

ದಂಗೆಯ ದಿನಗಳು

ಮಾಧವಿಹೊರಟಳು ಕಾನನಕೆ

ಕಂಚಿನ ಕಂಠದೊಡನೆ ಮಿಂಚಿನ ಸಂವಾದ – ಭಾಗವತ ಹೊಸಂಗಡಿ ರವೀಂದ್ರ ಶೆಟ್ಟಿ ಅವರೊಂದಿಗೆ

ಈ ಮಂಡೇ ಯಾಕಾಗಿದೆ

ಯಾದ್ ವಶೇಮ್ – ಯಹೂದಿಗಳ ಇತಿಹಾಸದ ಬೆನ್ಹತ್ತಿ…..

ಮೊಗ್ಗಿನ ಮನಸುಅರಳಿ ನಿಂತ ಸೊಗಸು

ಯಾವ ಸಾಫ್ಟ್ವೇರ್ ಕಂಪೆನಿ ಕರೆಯಿತು

ಸಾಫ್ಟ್ವೇರ್-ಮನೆ .. ಬಗ್ಸ್ ತುಂಬಿದ ಪ್ರತೀ ಕೋಡೂ ಕರಮಾನೇ

 

ಮಗು ಬೆಳೆದರೂ ಸಹ ಮಗು ಮನಸಿನ ಮುಗ್ಧತೆ ಮತ್ತು ಬೆರಗು ಮನಸಿನ ಮರ್ಮರದಿಂದ ಮರೆಯಾಗದು ಅನ್ನೋದನ್ನು ನಿಮಗೆ ನೆನಪಿಸುತ್ತಾ, ನಿಮ್ಮ ಅಭಿಪ್ರಾಯದ ನಿರೀಕ್ಷೆಯಲ್ಲಿ

                                                            ವಿಜಯ್‌ರಾಜ್ ಕನ್ನಂತ್.