Archive for ಸೆಪ್ಟೆಂಬರ್ 10, 2008

ಗಿರೀಶ್ ಕಾಸರವಳ್ಳಿಯವರ ಗುಲಾಬಿ ಟಾಕೀಸು ಬಿಡುಗಡೆಯಾಗಿದೆ. ಈ ಚಿತ್ರ ಅನೇಕ ಕಾರಣಗಳಿಂದ ಆಸಕ್ತಿ ಕೆರಳಿಸುತ್ತಿದ್ದು ಅದರಲ್ಲಿ ಮುಖ್ಯವಾದುವೆಂದರೆ ಕಾಸರವಳ್ಳಿ ನಿರ್ದೇಶನ, ಉಮಾಶ್ರೀ ಅಭಿನಯ ಹಾಗೂ ನನ ಅಚ್ಚುಮೆಚ್ಚಿನ ಲೇಖಕಿ ವೈದೇಹಿ ಯಾನೆ ಜಾನಕಿ(ವೈದೇಹಿಯವರ ಒರಿಜಿನಲ್ ನಾಮಧೇಯ) ಯವರ ಕಥೆ ಇರೋದು.

 

ಆದರೆ ಬೇಸರದ ಸಂಗತಿಯೆಂದರೆ, ಬೆಂಗಳೂರಿನಲ್ಲಿ ಬರೀ ಪಿ.ವಿ.ಆರ್.ನಲ್ಲಿ ಮಾತ್ರ ಈ ಚಿತ್ರ ತೆರೆ ಕಂಡಿದ್ದು, ದಿನಕ್ಕೆ ಬರೀ ಒಂದು ಶೋ ಮಾತ್ರ ಇದೆ. ಈ ಬೇಸರದ ನಡುವೆಯೂ ಒಂದು ಸಂತೋಷ ಅಂದ್ರೆ ರೆಡಿಫ್ ಚಿತ್ರ ವಿಮರ್ಶೆಯಲ್ಲಿ ಈ ಚಿತ್ರಕ್ಕೆ ಲಭ್ಯವಿರುವ ಗರಿಷ್ಠ *****(5 Star) ಆತಿಥ್ಯ ಸಿಕ್ಕಿದೆ.

http://www.rediff.com/movies/2008/sep/08ssg.htm

 

ಏನ್ ಸಿಕ್ಕಿದ್ರೆ ಏನ್ ಬಂತು, ಜನ ನೋಡದಿದ್ದ ಮೇಲೆ ಅಂತೀರಾ? ಹಂಗಿದ್ರೆ ಈ ವೀಕೆಂಡ್ ಆದ್ರೂ ಈ ಚಿತ್ರ ನೋಡೋಕೆ ಹೋಗಿ ಬನ್ನಿ. ನಾನಂತೂ ಹೋಗ್ತೀನಪ್ಪ.

 

 

Advertisements

ಬರಹಗಾರನೊಬ್ಬನ ಮನಸ್ಸಿನ ಆಂದೋಳನದ ಹಾದಿಯಲ್ಲಿ ಜೋಗಿ-ಜಂಗಮನಂತೆ ಸುತ್ತಿ ಸುಳಿವ ಅವನ ಮನೋಲಹರಿಯ ಗೊಂದಲ-ದ್ವಂದ್ವ-ತಳಮಳ-ಜಿಜ್ಞಾಸೆಗಳ ಜಾಡು ಹಿಡಿಯುತ್ತಾ ಯಾಮಿನಿ ಬಂದಿದ್ದಾಳೆ. ಜೋಗಿಯ ಬರಹಗಳ ವಿಶೇಷತೆ ಅಂದ್ರೆ ಕಥೆಯೊಳಗೊಂದು ಕಥೆಯ ತರಹದ ಪುಟ್ಟ-ಪುಟ್ಟ ಅಧ್ಯಾಯಗಳ ಈ ಪುಟ್ಟ ಕಾದಂಬರಿಯನ್ನು ಕಥಾ ಸಂಕಲನ ಅಂದ್ಕೊಂಡು ಬೇಕಿದ್ರೆ ಓದಬಹುದು. ಪ್ರತಿ ಅಧ್ಯಾಯವೂ ಒಂದು ಸಣ್ಣ ಕಥೆಯೊಂತಿದೆ. ಆ ಅಧ್ಯಾಯಗಳಿಗೆ ಬಹುತೇಕ ಜನಪ್ರಿಯ ಕವನಗಳ ಸಾಲುಗಳನ್ನು ತಲೆಬರಹವಾಗಿ ಬಳಸಿದ್ದು ಮಾತ್ರವಲ್ಲದೆ ಆ ಅಧ್ಯಾಯದ ಅರ್ಥವನ್ನು ಬಿಂಬಿಸುವಂತೆ ಅದನ್ನು ಆರಿಸಿರುವುದು ಕೂಡಾ ಮೆಚ್ಚಿಕೊಳ್ಳಲೇಬೇಕು.

 

ಚಿರಾಯು ಎಂಬ ಜನಪ್ರಿಯ ಲೇಖಕನಿಗೆ ಅತಿ ಕಿರಿಯ ವಯಸ್ಸಿನಲ್ಲೇ ಜ್ಞಾನಪೀಠ ಪ್ರಶಸ್ತಿ ಬಂದಿರುತ್ತೆ. ಅವನಿಗೆ ಭಾರಿ ಮೊತ್ತದ ಆಮಿಶವೊಡ್ಡಿ ಅವನಿಂದ ಕಾದಂಬರಿಯೊಂದನ್ನು ಬರೆಯಿಸಲು ಪ್ರಕಾಶಕ ಕಂಪೆನಿಯೊಂದು ನಿರ್ಧರಿಸುತ್ತದೆ. ಅದನ್ನು ಒಪ್ಪಿಕೊಂಡು ಬರೆಯಲು ಕುಳಿತ ಚಿರಾಯುವಿನ ಚಿತ್ತಪಟದಲ್ಲಿ ನಡೆಯುವ ವ್ಯಾಪಾರಗಳನ್ನು ಬಿಚ್ಚಿಡುತ್ತಾ ಸಾಗುವ ಈ ಕಥೆಯ ಹಾದಿಯಲ್ಲಿ ಸರಸ್ವತಿ, ರೋಹಿಣಿ, ಊರ್ಮಿಳಾ, ಶ್ರದ್ಧಾ ಹೀಗೆ ಅವನ ಬದುಕಿನ ವಿವಿಧ ಕಾಲಘಟ್ಟಗಳಲ್ಲಿ ಮುಖಾಮುಖಿಯಗಿ ಅವನ ಕಥೆಯ ಪಾತ್ರಗಳಾಗಿ ಹೋಗುತ್ತಾರೆ. ಚಿರಾಯುವನ್ನು ಟೀಕಿಸುತ್ತಲೇ ಮೆಚ್ಚಿಕೊಳ್ಳುವ ಯಾಮಿನಿ ಒಂದರ್ಥದಲ್ಲಿ ಅವನ ಸಾಕ್ಷಿಪ್ರಜ್ಞೆಯ ಭಾಗವೇ ಆಗಿರುತ್ತಾಳೆ. ಜಗತ್ತಿಗೆ ಬೇರೆಯೆ ಆಗಿ ಕಾಣಿಸುವ ಚಿರಾಯು ಯಾಮಿನಿಯ ಎದುರು ತೆರೆದ ಪುಸ್ತಕದಂತೆ; ಯಾಮಿನಿ ಅವನ ಪಾಲಿಗೆ ಅವನೊಳಗನ್ನು ಅವನಿಗೇ ಕಾಣಿಸುವ ಕನ್ನಡಿಯಂತೆ.

 

ಈ ಕಾದಂಬರಿಯುದ್ದಕ್ಕೂ ಬರುವ ಚಿರಾಯುವಿನ ಚಿಂತನೆಯ ಝಲಕ್ ನೋಡಿ – ಬರೀ ಮಾಹಿತಿಯನ್ನು ತುಂಬಿಸಿಟ್ಟರೆ ಅದು ಕಲಾಕೃತಿಯಾಗದು. ತನ್ನ ತಿಳುವಳಿಕೆ, ಅರಿವಿನಿಂದ ಆ ಬರಹಕ್ಕೊಂದು ಒಳನೋಟ, ಬೆರಗು ಇದ್ದಾಗಲಷ್ಟೇ ಆ ಕೃತಿಗೊಂದು ಮೌಲ್ಯ ಬರುತ್ತದೆ ಅನ್ನುವ ಯೋಚನೆ ಮಾಡುತ್ತಾ ಕುವೆಂಪು, ಲಂಕೇಶ್ ಬರಹದ ಎದುರು ಕಾರಂತರ ಕಾದಂಬರಿ ಕಾದಂಬರಿ ಕಂಡದ್ದನ್ನು ಕಂಡ ಹಾಗೆ ಬರೆಯುವ ಡಾಕ್ಯುಮೆಂಟರಿ ತರಹ ಕಾಣಿಸಿ ಸಪ್ಪೆ ಆನ್ನಿಸಿಕೊಳ್ಳುತ್ತದೆ.

 

ದಿನೇದಿನೇ ಸಂಕೀರ್ಣವಾಗುವ ಬದುಕು, ಅದರಲ್ಲಿನ ಸಂಬಂಧಗಳ ಜಿಡುಕು ಹೀಗೆ ತಮ್ಮ ಪಾತ್ರಗಳ ಮೂಲಕವೇ ಇವೆಲ್ಲವನ್ನು ಹೇಳುತ್ತಾ ಹೋಗುವ ಯಾಮಿನಿ ಆಪ್ತವಾಗುತ್ತಾಳೆ. ಇನ್ನು ನೀವುಂಟು…. ನಿಮ್ಮ ಯಾಮಿನಿಯುಂಟು…. ಓದುವ ಸುಖ ನಿಮ್ಮದಾಗಲಿ.

 

ಪುಸ್ತಕ                               : ಯಾಮಿನಿ ( ಕಾದಂಬರಿ )

ಲೇಖಕರು                         : ಜೋಗಿ

ಬೆಲೆ                                 :  80 ರೂ.

ಪುಟಗಳು                           114

ಪ್ರಕಾಶನ್                          ಅಂಕಿತ ಪ್ರಕಾಶನ, ಗಾಂಧಿಬಜಾರ್