Archive for ಏಪ್ರಿಲ್, 2009

ಕಲಾಕ್ಷೇತ್ರಕ್ಕೆ ಈ ಭಾನುವಾರ (ಏಪ್ರಿಲ್ 24) ತಪ್ಪದೆ ಬರ್ತೀರಿ ಅಲ್ವಾ?

ನೆಪ ಹೇಳದೆ ಬಂದ್ಬಿಡಿ… ಅಷ್ಟೆ!!book-1
ಯಾಕಂದ್ರೆ ನಮ್ಮ ನಿಮ್ಮೆಲ್ಲರ ಪ್ರೀತಿಯ ಮಣಿಕಾಂತ್ ಬರೆದ ಮುದ್ದಾದ ಪುಸ್ತಕವೊಂದು ಆವತ್ತು ಬಿಡುಗಡೆಯಾಗಲಿದೆ…
ಪುಸ್ತಕದಷ್ಟೇ ಮುದ್ದಾದ ಹೆಸರೊಂದನ್ನು ಮಣಿ ತಮ್ಮ ಪುಸ್ತಕಕ್ಕೆ ಕೊಟ್ಟಿದ್ದಾರೆ…”ಅಮ್ಮ ಹೇಳಿದ 8 ಸುಳ್ಳುಗಳು…”

ಆವತ್ತು ಪ್ರಕಾಶ್ ರೈ, ರವಿ ಬೆಳಗೆರೆ, ಕೃಷ್ಣೇಗೌಡ್ರು ಎಲ್ಲಾ ಬರ್ತಾರೆ…
ಜೊತೆಗೆ ಉಪಾಸನ ತಂಡದ ಇಂಪಾದ ಗಾಯನ ಕೂಡಾ ಇದೆ…

ತಪ್ಪದೆ ಎಲ್ಲರೂ ಬನ್ನಿ…  ನಿಮ್ಮ ಸ್ನೇಹಿತರಿಗೊ ಹೇಳಿ ಅವರನ್ನೂ ಕರೆತನ್ನಿ

Advertisements

ಸಾಮಾನ್ಯವಾಗಿ ನಾನು ಪುಸ್ತಕಗಳ ಪರಿಚಯ ಮಾಡುವಾಗ ಒಂದು ನಿಯಮವನ್ನಿಟ್ಟುಕೊಂಡಿದ್ದೆ. ನಾನು ಓದಿದ ಪುಸ್ತಕಗಳಲ್ಲಿ ನನಗಿಷ್ಟವಾದ ಪುಸ್ತಕಗಳನ್ನು ಬೇರೆಯವರೂ ಸಹಾ ಓದಲಿ ಅನ್ನುವ ಉದ್ದೇಶದಿಂದ ಅಂತಹ ಪುಸ್ತಕಗಳ ಬಗ್ಗೆ ಒಂದು ಪರಿಚಯ ನೀಡುವ ಪರಿಪಾಠವನ್ನಿಟ್ಟುಕೊಂಡಿದ್ದೆ. ವಿಮರ್ಶೆಗಿಮರ್ಶೆ ಬರೆಯಲು ನನಗೆ ಬರುವುದಿಲ್ಲ ಅನ್ನುವುದು ನನಗೆ ನೂರಕ್ಕೆ ನೂರು ಖಾತ್ರಿಯಿದೆಯಾದ್ದರಿಂದ, ಪುಸ್ತಕ ಚೆನ್ನಾಗಿದೆಅದು ನನಗೆ ಯಾಕೆ ಇಷ್ಟವಾಯ್ತು ಅನ್ನೋದನ್ನು ಸಂಕ್ಷಿಪ್ತವಾಗಿ ಒಂದೆರಡು ಸಾಲು ಬರೆದುನೀವೂ ಓದಿ ಅನ್ನುವ ತರಹದ ನಾಲ್ಕು ಸಾಲು ಬರೆಯುತ್ತಿದ್ದೆ. ಈಗ ಆ ನಿಯಮವನ್ನು ಮೀರುತ್ತಿದ್ದೇನೆ. ನನಗೆ ತೀರಾ ಹಿಡಿಸದೇ ಹೋದರೂ ಈ ಪುಸ್ತಕದ ಬಗ್ಗೆ ನಾಲ್ಕು ಮಾತು ಬರೆಯಲು ಕುಳಿತಿದ್ದೇನೆ. ಆ ಪುಸ್ತಕವೇ ಪ್ರಕಟವಾಗುವ ಮೊದಲು ಅಪಾರ ನಿರೀಕ್ಷೆಯನ್ನು ಹುಟ್ಟುಹಾಕಿದ್ದ ಕಡಲ ತಡಿಯ ತಲ್ಲಣ.

 

ಮೊತ್ತಮೊದಲನೆಯದಾಗಿ ಈ ಪುಸ್ತಕದ ವಿಷಯದಲ್ಲಿ ಹೇಳಬೇಕಾದುದು ಮುದ್ರಣ ದೋಷಗಳ ಕುರಿತು!! ಕನ್ನಡ ಕಾಗುಣಿತ ತೀರಾ ಹೊಸದಾಗಿ ಕಲಿತವರೇನಾದರೂ ಅಪ್ಪಿ ತಪ್ಪಿ ಈ ಪುಸ್ತಕ ಓದಿಬಿಟ್ಟರೆ, ಖಂಡಿತವಾಗಿಯೂ ಅವರಿಗೆ ತಾವು ಕಲಿತ ಅಕ್ಷರಗಳೆಲ್ಲ ಮರೆತು ಹೋಗುವ ಮಟ್ಟಿಗೆ ಅಚ್ಚಿನ ದೋಷಗಳಿವೆ.  ಏಪ್ರಿಲ್ 19ರಂದು ಕನ್ನಡ ಪ್ರಭದ ಸಾಪ್ತಾಹಿಕ ಪ್ರಭದಲ್ಲಿ ಪುಸ್ತಕ ವಿಮರ್ಶೆಯ ಕಾಲಂನಲ್ಲಿ ಬಂದ ಒಂದು ಸಾಲನ್ನು ಕೊಟ್ಟರೆ ನಿಮಗೆ ಅರ್ಥವಾಗುತ್ತೆ. ಅದರಲ್ಲಿ ಕವನ ಸಂಕಲನವೊಂದರಲ್ಲಿರುವ ಅಕ್ಷರಗಳ ತಪ್ಪನ್ನು ಉಲ್ಲೇಖಿಸುತ್ತ, ಈ ಪುಸ್ತಕದಲ್ಲಿ ಅನೇಕ ಮುದ್ರಣದೋಷಗಳಿದ್ದರೂ ಸಹಾ, ಕಡಲ ತಡಿಯ ತಲ್ಲಣವನ್ನು ಮೀರಿಸುವಷ್ಟಿಲ್ಲ ಅಂದಿದ್ದಾರೆ. ಅಂದರೆ ಮುದ್ರಣ ದೋಷಗಳು ಎಷ್ಟಿದ್ದಾವೋ ಎಂದು ನೀವೆ ಲೆಕ್ಕ ಹಾಕಿ. ( ಅದು ಹತ್ತು ನೂರುಗಳಲ್ಲಿಲ್ಲಸಾವಿರಾರು ಇದೆ). ಇದರಿಂದಾನೇ ಅರ್ಥವಾಗುತ್ತೆ ಎಷ್ಟು ಮುತುವರ್ಜಿಯಿಂದ ಈ ಪುಸ್ತಕಗಳನ್ನು ಹೊರತಂದಿದ್ದಾರೆ ಎಂದು. ಬರೆಯುವಾಗ ಕೆಲವೊಮ್ಮೆ ತಪ್ಪುಗಳಾಗೋದು ಸಹಜ. ನನ್ನ ಬ್ಲಾಗಿನ ಬರಹಗಳಲ್ಲೇ ಲೇಖನವೊಂದರಲ್ಲಿ ತಪ್ಪು ಅಕ್ಷರಗಳು ನುಸುಳುವುದೂ ಉಂಟು.  ತೀರಾ ಆ ಪರಿಯ(ಪುಸ್ತಕ ಪ್ರಕಾಶನದ ಎಲ್ಲಾ ದಾಖಲೆಗಳನ್ನು ಮುರಿಯುವಷ್ಟು) ತಪ್ಪುಗಳಾಗದೇ ಇದ್ದಿದ್ದರೆ ಅದನ್ನು ನಾನೂ ಕೂಡಾ ಮೊದಲಿಗೇ ಪ್ರಸ್ತಾಪಿಸಲು ಬಯಸುತ್ತಿರಲಿಲ್ಲ.

 

ಮುದ್ರಣದೋಷಗಳ ಮಾತು ಪಕ್ಕಕ್ಕಿಟ್ಟು ಪುಸ್ತಕದಲ್ಲಿನ ಲೇಖನಗಳ ವಿಷಯಕ್ಕೆ ಬರೋಣ. ಇಡೀ ಪುಸ್ತಕವು 34 ಬಿಡಿ ಲೇಖನಗಳ ಸಂಗ್ರಹ. ಈ ಲೇಖನಗಳ ವಿಷಯ ವ್ಯಾಪ್ತಿಯು ಕರಾವಳಿಯ ಅದರಲ್ಲೂ ವಿಶೇಷವಾಗಿ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಯ ಸಂಸ್ಕೃತಿ, ಪದ್ಧತಿ, ಜನಜೀವನ, ಭಾಷೆ, ಮತ, ಧರ್ಮ, ಇವುಗಳಲ್ಲಾದ ಸ್ಥಿತ್ಯಂತರ, ಕೋಮು ಸಂಘರ್ಷಗಳು, ರಾಜಕೀಯಗಳ ಸುತ್ತ ಸುತ್ತುತ್ತದೆ. ತುಳುನಾಡಿನ ಅನೇಕ ಲೇಖಕರ ಬರಹಗಳು, ಕೆಲವು ಕವನಗಳು, ಕತೆಹೀಗೆ ವಿವಿಧ ಪ್ರಕಾರಗಳಲ್ಲಿ ಅಭಿಪ್ರಾಯಗಳು ವ್ಯಕ್ತವಾಗಿವೆ. ಇಲ್ಲಿನ ಅನೇಕ ಲೇಖನಗಳು ವಿವಿಧ ಪತ್ರಿಕೆ ಪುಸ್ತಕಗಳಲ್ಲಿ ಈ ಮೊದಲೇ ಪ್ರಕಟವಾಗಿವೆ. ಶಿವರಾಮ ಕಾರಂತರು ಹುಚ್ಚು ಮನಸ್ಸಿನ ಹತ್ತು ಮುಖಗಳು ಪುಸ್ತಕದ ಮುನ್ನುಡಿಯಲ್ಲಿ ಬರೆದ ಸಾಲುಗಳು ಇಲ್ಲಿವೆ. ವಡ್ಡರ್ಸೆ ರಘುರಾಮ ಶೆಟ್ಟರು ದ.. ಜಿಲ್ಲೆ ರಾಜಕೀಯವಾಗಿ ಹೇಗೆ ಮೂಲೆಗುಂಪಾಗುತ್ತಿದೆ ಎಂದು ಎಂಬತ್ತರ ದಶಕದ ಉತ್ತರಾರ್ಧದಲ್ಲಿ ಬರೆದ ಲೇಖನವಿದೆ. ಗಾಯತ್ರಿ ನಾವಡ, ನಾಗವೇಣಿ, ಎಸ್.ಡಿ.ಶೆಟ್ಟಿ, ಎಸ್.ಆರ್.ವಿಜಯಶಂಕರ್, ಪುರುಷೋತ್ತಮ ಬಿಳಿಮಲೆ, ಫಕೀರ್ ಮುಹಮ್ಮದ್ ಕಟ್ಪಾಡಿ, ಬಿ.ಎಂ.ಇಚ್ಲಂಗೋಡು ಮೊದಲಾದರು ತುಳುನಾಡಿನ ಸಂಸ್ಕೃತಿಯ ಮಗ್ಗುಲುಗಳತ್ತ ಬೆಳಕು ಚೆಲ್ಲುವ ಪ್ರಯತ್ನ ಮಾಡಿದ್ದಾರೆ. ಇಲ್ಲಿನ ಶಿಕ್ಷಣ, ಭಾಷೆ, ಬ್ಯಾರಿಗಳು, ವ್ಯಾಪಾರ, ಗೇಣಿವಕ್ಕಲು ವ್ಯವಸ್ಥೆಹೀಗೆ ಜನಜೀವನದ ಅನೇಕ ಮುಖಗಳ ಪರಿಚಯ ನೀಡುವ ಪ್ರಯತ್ನ ಇಲ್ಲಿದೆ. ಜೊತೆಗೆ  ಜಿ.ಎನ್.ಮೋಹನ್, ಕೆ.ವಿ.ತಿರುಮಲೇಶ್, ಯು.ಆರ್.ಅನಂತಮೂರ್ತಿ, ಸಾರಾ ಅಬೂಬಕ್ಕರ್, ವಿ.ಲಕ್ಷ್ಮಿನಾರಾಯಣ, ಶಶಿಧರ ಭಟ್, ಉಷಾ ಕಟ್ಟೆಮನೆ, ಗುಲಾಬಿ ಬಿಳಿಮಲೆ ಮೊದಲಾದವರು ಮಂಗಳೂರು ಉಡುಪಿಯ ಇತ್ತೀಚಿನ ತಲ್ಲಣಗಳ ಬಗ್ಗೆ ತಮ್ಮ ಅನಿಸಿಕೆಗಳನ್ನು ಮಂಡಿಸಿದ್ದಾರೆ.

 

ಇಷ್ಟೆಲ್ಲಾ ಇದ್ದರೂ ಈ ಪುಸ್ತಕ ನನಗಂತೂ ತುಂಬಾ ನಿರಾಸೆಯನ್ನುಂಟು ಮಾಡಿದೆ. ಈ ಪುಸ್ತಕದ ಬಗ್ಗೆ ಇಟ್ಟುಕೊಂಡಿದ್ದ ಅಪಾರ ನಿರೀಕ್ಷೆಗಳು ಈ ನಿರಾಸೆಗೆ ಒಂದು ಕಾರಣವಾಗಿರಬಹುದು. ಆದರೆ ಇನ್ನೂ ಹಲವಾರು ಅಂಶಗಳು ಈ ಪುಸ್ತಕವು ಅಷ್ಟೇನೂ ಸ್ವಾರಸ್ಯಕರವಾಗಿಲ್ಲ ಅನ್ನುವುದನ್ನು ಎತ್ತಿ ತೋರಿಸುತ್ತದೆ.

1. ಮೊದಲನೆಯದಾಗಿ ಇಲ್ಲಿರುವ ವಿಷಯ ವೈವಿಧ್ಯತೆಗಳನ್ನು ಒಂದು ಸೂತ್ರಬದ್ಧ ಅನುಕ್ರಮಣಿಕೆಯಲ್ಲಿ ಪೋಣಿಸಿದ್ದರೆ ಪುಸ್ತಕದ ಧ್ವನಿಗೆ ಇನ್ನಷ್ಟು ಸ್ಪಷ್ಟತೆ ಬರುತ್ತಿತ್ತು. ಬಿಡಿಬಿಡಿಯಾಗಿರುವ ಲೇಖನಗಳನ್ನು ಅವುಗಳ ವಿಷಯಆಶಯಗಳಿಗೆ ತಕ್ಕಂತೆ ವಿಂಗಡಿಸಿ, ಕಾಲಾನುಕ್ರಮದಲ್ಲಿ ಬದಲಾಗುತ್ತಾ ಬಂದ ಕರಾವಳಿಯ ಚಿತ್ರಣ ಕೊಟ್ಟಿದ್ದರೆ ಪುಸ್ತಕದ ಒಟ್ಟು ಸ್ವರೂಪ ಇಷ್ಟು ಅಧ್ವಾನವಾಗಿರುತ್ತಿರಲಿಲ್ಲ

2. ಯಾವುದೇ ಸಮಸ್ಯೆ, ವಿವಾದ, ಘಟನೆವಿಚಾರಗಳನ್ನು ವಿಶ್ಲೇಷಿಸುವಾಗ ಆ ಸಮಸ್ಯೆಯ ಎರಡೂ ಮಗ್ಗುಲುಗಳನ್ನು ಚಿತ್ರಿಸಿ, ಮಂಡಿಸಿದ ವಿಚಾರಕ್ಕೆ ಪೂರಕ ಮಾಹಿತಿಯನ್ನು ಒದಗಿಸಿದಾಗ ಮಾತ್ರ ಓದುಗರಿಗೆ ಸಮಗ್ರ ಚಿತ್ರಣ ಸಿಗುತ್ತದೆ. ಅದರೆ ಇಲ್ಲಿನ ಬಹುಪಾಲು ಲೇಖನಗಳಲ್ಲಿ ಬಿ.ಜೆ.ಪಿ, ಸಂಘ ಪರಿವಾರಗಳಿಂದಾಗಿಯೇ ಈ ಎಲ್ಲಾ ವಿದ್ಯಮಾನಗಳು ನಡೆಯುತ್ತಿವೆ ಅನ್ನುವ ಮೂದಲಿಕೆಯನ್ನೇ ಪ್ರಮುಖವಾಗಿಸಿಕೊಳ್ಳಲಾಗಿದೆ. ಆದರೆ ವಾಸ್ತವದಲ್ಲಿ ಈ ಬೆಂಕಿ ಹೇಗೆ ಹುಟ್ಟಿಕೊಂಡಿತು, ಅದಕ್ಕೆ ಪ್ರತ್ಯಕ್ಷಪರೋಕ್ಷ ಕಾರಣಗಳೇನು ಅನ್ನುವುದನ್ನು, ಸಮಸ್ಯೆಯ ಮೂಲ ಎಲ್ಲಿದೆ ಅನ್ನುವುದನ್ನು ಗಮನಿಸುವ ಗೋಜಿಗೆ ಹೋಗದೆ, ಸಕಲ ಅನಿಷ್ಟಕ್ಕೂ ಶನೀಶ್ವರನೇ ಕಾರಣ ಅನ್ನುವರ್ಥದಲ್ಲಿ ಮಂಡಿಸುವ ವಿಚಾರಧಾರೆಗಳನ್ನು ಎಲ್ಲರೂ ಒಪ್ಪಲು ಸಾಧ್ಯವಾಗದು.

3. ಜಿಲ್ಲೆಯನ್ನು ತೀವ್ರವಾಗಿ ಬಾಧಿಸುತ್ತಿರುವ ಮತಾಂತರದ ಕುರಿತು ಬೆಳಕು ಚೆಲ್ಲುವ ಪ್ರಯತ್ನವನ್ನು ಇಲ್ಲಿನ ಯಾವ ಲೇಖನವೂ ಅಷ್ಟಾಗಿ ಮಾಡದ ಕಾರಣ ಕಡಲ ತಡಿಯ ತಲ್ಲಣವನ್ನು ಗುರುತಿಸುವ ಪುಸ್ತಕದ ಆಶಯವೇ ಪ್ರಶ್ನಾರ್ಥಕವೆನ್ನಿಸುತ್ತದೆ.

4.         ಜಿಲ್ಲೆಯ ಶಿಕ್ಷಣ ಕ್ಷೇತ್ರದಲ್ಲಿ ಕ್ರೈಸ್ತ ಮಿಶನನರಿಗಳ ಕೊಡುಗೆಯನ್ನು ಪ್ರಸ್ತಾಪಿಸುತ್ತಾ, ಕ್ರೈಸ್ತರು ಶಾಲೆ ತೆರೆಯದಿದ್ದರೆ ನಾವೆಲ್ಲ ಈಗಲೂ ಸೆಗಣಿ ಹೆಕ್ಕಿಕೊಂಡಿರಬೇಕಾಗಿತ್ತು ಅನ್ನುವ ಮಾತನ್ನು ಪುರುಷೋತ್ತಮ ಬಿಳಿಮಲೆಯವರು ಹೇಳಿದ್ದಾರೆ. ಇಂತಹ ವಿಚಾರಗಳಿಗೆ ಹೇಗೆ ಪ್ರತಿಕ್ರಿಯೆ ನೀಡಬೇಕೋ ನೀವೇ ಯೋಚಿಸಿ.

5. ಬರೀ ಬುದ್ಧಿಜೀವಿಗಳ ಅಭಿಪ್ರಾಯವನ್ನು ತುಂಬುವ ಬದಲು, ಜನಸಾಮಾನ್ಯರ ಅಭಿಪ್ರಾಯಗಳನ್ನು, ಅವರ ಒಡಲಿನ ತಲ್ಲಣಗಳನ್ನು ಧ್ವನಿಸುವ ಒಂದೆರಡು ಲೇಖನಗಳಾದರೂ ಇರದೆ ಇದ್ದರೆ ಕಡಲ ತಡಿಯ ತಲ್ಲಣವನ್ನು ಹೇಗೆ ಗುರುತಿಸಿದಂತಾಗುತ್ತದೆ ಅನ್ನುವುದು ಪ್ರಶ್ನೆ

 

ಒಟ್ಟಾರೆಯಾಗಿ ಹೇಳುವುದಾದರೆ ಈ ಪುಸ್ತಕವು, ಪ್ರಸ್ತುತ ಕರಾವಳಿ ತೀರದಲ್ಲಿನ ಕೋಲಾಹಲಗಳ ಬಗ್ಗೆ ಜನರಲ್ಲಿರುವ ಒಂದು ರೀತಿಯ ಕುತೂಹಲದ ಲಾಭವನ್ನು ಪಡೆಯಲು ಸಂತೆಯ ಹೊತ್ತಿಗೆ ಮೂರು ಮೊಳ ನೇಯ್ದು ಸಿದ್ಧಪಡಿಸಿದ ಬಾಡಿದ ಹೂಗಳ ಹಾರದಂತಿದೆ. ಅಲ್ಲಲ್ಲಿ ಒಂದೆರಡು ಒಳ್ಳೇ ಹೂವಿದ್ದರೂ ಕೂಡಾ ಮಿಕ್ಕಿದ ಬಾಡಿದ ಹೂಗಳ ದೆಸೆಯಿಂದ ಹಾರದ ಒಟ್ಟಂದ ಅಷ್ಟೇನೂ ಚೆನ್ನಾಗಿಲ್ಲ. ನಾನು ಮೊದಲೇ ಹೇಳಿದಂತೆ ಇಲ್ಲಿರುವ ಬುದ್ಧಿಜೀವಿಗಳ ಲೇಖನದ ವಿಮರ್ಶೆ ಮಾಡುವ ಯಾವ ಕನಿಷ್ಟ ಅರ್ಹತೆಯೂ ನನಗಿಲ್ಲವಾದರೂಪುಸ್ತಕ ಓದಿದ ಮೇಲೆ ನನಗನಿಸಿದ್ದು ಹೇಳಿದ್ದೇನೆಒಪ್ಪುವುದು ಬಿಡುವುದು ನಿಮಗೆ ಬಿಟ್ಟಿದ್ದು.

ಮೊನ್ನೆ ಹನ್ನೆರಡನೇ ತಾರೀಕಿಗೆ ಅಣ್ಣಾವ್ರು ಇಲ್ಲವಾಗಿ ಮೂರು ವರ್ಷ ಕಳೆಯಿತು. ನಾಡಿದ್ದು 24ರಂದು ಅಣ್ಣಾವ್ರ ಜನ್ಮದಿನ. ಈ ಸಂದರ್ಭದಲ್ಲಿ ಅಣ್ಣಾವ್ರು ನಟಿಸಿದ/ಹಾಡಿದ/ನಟಿಸಿಹಾಡಿದ ಹಾಡುಗಳನ್ನು ನೆನಪಿಸಿಕೊಳ್ಳುವ ಮೂಲಕ ಆ ಮಹಾನ್ ಚೇತನಕ್ಕೆ ನಮಿಸುವ ಒಂದು ಪ್ರಯತ್ನ ಇಲ್ಲಿದೆ. ಇಲ್ಲಿರುವ ಹತ್ತು ಪ್ರಶ್ನೆಗಳು ತೀರಾ ಸುಲಭವಾಗಿವೆನಿಮಗೆಲ್ಲರಿಗೂ ಉತ್ತರ ಖಂಡಿತವಾಗಿಯೂ ಗೊತ್ತಿರುತ್ತದೆ

 

1.          ಸಂಪತ್ತಿಗೆ ಸವಾಲು ಹಾಕುತ್ತಾ ಅಣ್ಣಾವ್ರು ಎಮ್ಮೆ ಸವಾರಿ ಮಾಡುತ್ತಿರುವ ಈ ಹಾಡನ್ನು ಎಂದಿಗಾದ್ರೂ ಮರೆಯಲಾದೀತೆ?

2.          ದೇವತಾ ಮನುಷ್ಯ ಇಲ್ಲಿ ಮಗಳು ಸುಧಾರಾಣಿಯೊಂದಿಗೆ ರಾಘವೇಂದ್ರರ ಸ್ತುತಿಸುತ್ತಿದ್ದಾರೆ

3.          ಅಶ್ವಮೇಧ ಚಿತ್ರದಲ್ಲಿ ಕುಮಾರ್ ಬಂಗಾರಪ್ಪ ರೌದ್ರಾವತಾರಕ್ಕೆ ಮೆರುಗನ್ನಿತ್ತ ಅಣ್ಣಾವ್ರ ಈ ಹಾಡು ನನ್ನ ಅಚ್ಚುಮೆಚ್ಚಿನ ಹಾಡುಗಳಲ್ಲೊಂದು

4.          ಈ ನಾಡಲ್ಲಿ ಹುಟ್ಟಿದ ನಾವು ಧನ್ಯ ಅನ್ನಿಸುವಂತೆ ಮಾಡುವ ಈ ಹಾಡು ನಾಡಗೀತೆಗೆ ಪರ್ಯಾಯವೇನೋ ಅನ್ನಿಸುವಷ್ಟು ಜನಪ್ರಿಯ

5.          ಬಹಾದ್ದೂರ್ ಗಂಡಾಗಿ ಸೊಕ್ಕಿದ ರಾಜಕುಮಾರಿ ಜಯಂತಿಯ ಪೊಗರಿಳಿಸುವ ಈ ಮುತ್ತಿನಂತಹ ಹಾಡು

6.          ಏನೇ ಆದರೂ…. ಸದಾ ನಗುತಾ ನಲಿಯುತ್ತಿರು ಅನ್ನುವ ಅರ್ಥ ಕೊಡುವ ಈ ಗೀತೆ ಜೀವನೋತ್ಸಾಹದ ಪಾಠ ಹೇಳ್ತಾ ಇದೆ

7.          ಗಂಧದ ಗುಡಿಯ ಶೀರ್ಷಿಕೆ ಗೀತೆಯಲ್ಲಿ ಕಾಡಲ್ಲಿ ಪ್ರಾಣಿಗಳ ಜೊತೆ ಖುಷಿಯಿಂದ ನಲಿಯುವ ರಾಜ್ಕುಮಾರ್ ನೋಡೋಕೆ ಎರಡು ಕಣ್ಣು ಸಾಲದು

8.          ಭಕ್ತ ಕುಂಬಾರದಲ್ಲಿ ಭಕ್ತಿಯ ಪರಾಕಾಷ್ಟೆಯಲ್ಲಿ ತನ್ಮಯನಾಗಿ ಮಗುವನ್ನೇ ತುಳಿದರೂ ತಿಳಿಯದಷ್ಟು ಮೈಮರೆವಿನಲ್ಲಿ ಹಾಡುವ ಹಾಡು

9.          ಕುರುಬ ಕಾಳಿಮಾತೆಯ ಅನುಗ್ರಹಕ್ಕೆ ಪಾತ್ರನಾಗಿ ಕಾಳಿದಾಸನಾಗುವ ಮೊದಲು ಕುರಿಗಳನ್ನು ಮೇಯಿಸಲು ಹೊರಡುವಾಗ ಹಾಡುವ ಈ ಹಾಡು ಭಾರೀ ಜನಪ್ರಿಯ

10)         ಅಭಿಮಾನಿ ದೇವರುಗಳೇ ಅಂತಲೇ ವಿನಯದಿಂದ ಜನರನ್ನು ಪ್ರೀತಿಸುವ ಅಣ್ಣವ್ರುಅವರಿಂದಲೇ ನಾನು ಮೇಲೆ ಬಂದೆಅವ್ರು ನನ್ನ ಬೆನ್ನ ಹಿಂದೆ ಇದ್ರೆ ಯಾವ ಹೋರಾಟಕ್ಕೂ ಮುನ್ನುಗ್ಗಲು ತಯಾರು ಅನ್ನುತ್ತಿದ್ದಾರೆ

ಉತ್ತರ ನಿಮಗೆ ಗೊತ್ತಿರೋದೆ ಆಗಿರೋದ್ರಿಂದ… ಎಲ್ರೂ ಉತ್ತರ ಕೊಟ್ಟೇ ಕೊಡ್ತೀರ ಬಿಡಿ…

ಲೋಕಸಭೆ ಚುನಾವಣೆ ಹತ್ತಿರವಾಗಿದೆ. ಎಲ್ಲಿನೋಡಿದರಲ್ಲಿ ಚುನಾವಣೆಯದ್ದೇ ಮಾತು. ಪ್ರಸಾರ ಮಾಧ್ಯಮಗಳು ಸಮೀಕ್ಷೆ, ಕ್ಷೇತ್ರ ಪರಿಚಯ, ಚುನಾವಣಾ ಅಕ್ರಮಗಳ ಕುರಿತು ಗಂಟೆಗಟ್ಟಲೆ ಕೊರೆಯಲಾರಂಭಿಸಿವೆ. ರೀಮುಗಟ್ಟಲೆ ಕಾಗದದ ತುಂಬೆಲ್ಲಾ ಇಲೆಕ್ಷನ್ನ ರಂಗು ರಂಗಿನ ಸುದ್ದಿ ಪ್ರಕಟಿಸಿ ಸುದ್ದಿ ಮಾಧ್ಯಮಗಳು ಕೃತಾರ್ಥವಾಗುತ್ತಿವೆ. ಬಸ್ಸುಗಳಲ್ಲಿ, ಕಛೇರಿಗಳಲ್ಲಿ, ಹೋಟೆಲುಗಳಲ್ಲಿ ಕೊನೆಗೆ ಇಂಟರ್ನೆಟ್ನಲ್ಲೂ ಚುನಾವಣೆಯದ್ದೇ ಬಿಸಿಬಿಸಿ ಚರ್ಚೆಯಾರು ಗೆಲ್ಲುವ ಕುದುರೆ ಅನ್ನೋ ಬಗ್ಗೆ ಬೆಟ್ಟಿಂಗ್ ಆಯಾ ಕ್ಷೇತ್ರಗಳಲ್ಲಿ ಬಿರುಸುಗೊಡಿದೆ. ಅಭ್ಯರ್ಥಿಗಳು ಪರಸ್ಪರ ಕೆಸರೆರಚಾಟ, ತಮ್ಮತಮ್ಮ ಪಕ್ಷದ ಸಾಧನೆಗಳ ತುತ್ತೂರಿ ಊದುತ್ತಾ ಬಿರುಸಿನ ಪ್ರಚಾರ ಕಾರ್ಯಗಳಲ್ಲಿ, ಜನರ ಮನವೊಲಿಸುವ ಸಲುವಾಗಿ ಭರವಸೆಗಳ ಮಹಾಪೂರ ಹರಿಸುವುದರಲ್ಲಿ, ಹಣಹೆಂಡಸೀರೆಯ ಆಮಿಷಗಳ ಬಲೆ ಬೀಸುವುದರಲ್ಲಿ ಮಗ್ನರಾಗಿದ್ದಾರೆ. ಈ ಹಿನ್ನೆಲೆಯಲ್ಲಿ ನಮ್ಮ ಉಡುಪಿ ಕ್ಷೇತ್ರದಲ್ಲಿ ಈ ಬಾರಿ ವಿಜಯಲಕ್ಷ್ಮಿ ಯಾರಿಗೆ ಮಾಲೆ ಹಾಕ್ತಾಳೆ ಅನ್ನುವ ಕುರಿತು ಒಂದಿಷ್ಟು ಅವಲೋಕನ ನಡೆಸಿದರೆ ಹೇಗೆ?

 

ಉಡುಪಿ ಕ್ಷೇತ್ರದ ಇತ್ತೀಚಿನ ಇತಿಹಾಸವನ್ನು ಗಮನಿಸಿದರೆ ಸ್ಪಷ್ಟವಾಗಿ ಅರ್ಥವಾಗುವುವ ಸಂಗತಿಯೆಂದರೆ ಇಲ್ಲಿ ಗೆಲುವು ಯಾವಾಗಲೂ ಅತ್ತಿಂದಿತ್ತ ತೂಗೂಯ್ಯಾಲೆ ಆಡುತ್ತಲೇ ಬಂದಿದೆ. ಆಸ್ಕರ್ ಫೆರ್ನಾಂಡೀಸ್ರ ಗೆಲುವಿನ ಸರಮಾಲೆಯನ್ನು ಮೊಟ್ಟ ಮೊದಲ ಬಾರಿಗೆ ಮುರಿದ ಶ್ರೇಯಸ್ಸು ಆಗ ಬಿ.ಜೆ.ಪಿ. ಯಲ್ಲಿದ್ದ ಐ.ಎಂ.ಜಯರಾಮ ಶೆಟ್ಟರಿಗೆ ಸಲ್ಲುತ್ತದೆ (ಈಗ ಅವರು ಯಾವ ಪಕ್ಷದಲ್ಲಿ ಇದ್ದಾರೆಂಬುದು ನನಗೆ ಗೊತ್ತಿಲ್ಲ ಅಂತ ಆಣೆ ಮಾಡಿ ಹೇಳ್ತೇನೆ ಬೇಕಿದ್ರೆ). ಆ ಬಳಿಕ ಮತ್ತೊಮ್ಮೆ ಕಾಂಗ್ರೆಸ್ ಮಡಿಲಿಗೆ ಈ ಕ್ಷೇತ್ರ ಬಿದ್ದಿದ್ದು ವಿನಯ ಕುಮಾರ್ ಸೊರಕೆಯಿಂದಾಗಿ.  ಕಳೆದ ಚುನಾವಣೆಯಲ್ಲಿ ಇಲ್ಲಿಂದ ಆಯ್ಕೆಯಾಗಿ ಬಂದ ಬಿ.ಜೆ.ಪಿಯ ಮನೋರಮಾ ಮಧ್ವರಾಜ್ ಈಗ ಮತ್ತೆ ತಮ್ಮ ಮಾತೃ ಪಕ್ಷ ಕಾಂಗ್ರೆಸ್ನ ಗೂಡಿಗೆ ಮರಳಿದ್ದಾರೆ. ಮೇಲಾಗಿ ಈ ಬಾರಿ ಕ್ಷೇತ್ರ ಪುನರ್ವಿಂಗಡನೆಯ ಪರಿಣಾಮವಾಗಿ ಚಿಕ್ಕಮಗಳೂರು ಕ್ಷೇತ್ರ ಮಾಯವಾಗಿ ಆ ಕ್ಷೇತ್ರದ ಬಹುಭಾಗ ಉಡುಪಿ ಕ್ಷೇತ್ರದಲ್ಲಿ ವಿಲೀನವಾಗಿದೆ. ಉಡುಪಿಯ ತೆಕ್ಕೆಯಲ್ಲಿದ್ದ ಬೈಂದೂರು ಕ್ಷೇತ್ರದ ಬಹುಭಾಗ ಶಿವಮೊಗ್ಗದ ಪಾಲಾಗಿದೆ. (ನಮ್ಮ ಊರು ಹಳ್ಳಿಹೊಳೆ ಕೂಡಾ ಈಗ ಶಿವಮೊಗ್ಗ ಕ್ಷೇತ್ರದಲ್ಲಿದೆ. ಶಿವಮೊಗ್ಗ ಕ್ಷೇತ್ರದ ಸಮೀಕರಣಗಳುಲೆಕ್ಕಾಚಾರಗಳು ನನ್ನ ಪಾಲಿಗೆ ಅಪರಿಚಿತವಾದ ಕಾರಣ ಆ ಕುರಿತು ವಿಷ್ಲೇಷಿಸುವ ಸಾಮರ್ಥ್ಯ ನನಗಿಲ್ಲ). ಅಲ್ಲದೆ ಇತ್ತೀಚಿನ ಕೆಲದಿನಗಳಲ್ಲಿ ಅವಿಭಜಿತ ದ.ಕ ಜಿಲ್ಲೆಯು ಒಂದಿಲ್ಲೊಂದು ಸಮಸ್ಯೆಯ ಸುಳಿಗೆ ಸಿಲುಕಿದ್ದು ಕ್ಷೇತ್ರದ ರಾಜಕೀಯದಲ್ಲಿ ಇದು ನಿರ್ಣಾಯಕ ಪಾತ್ರ ವಹಿಸಲಿದೆ ಎನ್ನುವ ಮಾತು ಕೇಳಿ ಬರುತ್ತಿದೆ. ಉಡುಪಿಯ ಶಾಸಕರ ವರ್ಚಸ್ಸು ಪದ್ಮಪ್ರಿಯಾ ಪ್ರಕರಣದ ನಂತರ ಕುಸಿದಿದೆ ಅಂತ ಹೇಳಲಾಗುತ್ತಿದೆಯಾದರೂ ಲೋಕಸಭೆ ಚುನಾವಣೆಯ ಫಲಿತಾಂಶ ಬಂದ ಬಳಿಕವಷ್ಟೇ ಇದರ ಸ್ಪಷ್ಟ ಚಿತ್ರಣ ಸಿಗಲಿದೆ. ಕಾಂಗ್ರೆಸ್ನಿಂದ ಈ ಬಾರಿ ನಿಂತಿರುವುದು ಮಾಜಿ ಬಂದರು ಮತ್ತು ಮೀನುಗಾರಿಕಾ ಸಚಿವರಾಗಿರುವ ಜಯಪ್ರಕಾಶ್ ಹೆಗ್ಡೆಯವರು. ಬಿ.ಜೆ.ಪಿಯು ತನ್ನ ರಾಜ್ಯಾಧ್ಯಕ್ಷರಾದ ಸದಾನಂದ ಗೌಡರನ್ನು ಕಣಕ್ಕಿಳಿಸುವುದರ ಮೂಲಕ ತನ್ನ ಪ್ರತಿಷ್ಟೆಯನ್ನು ಪಣಕ್ಕಿಟ್ಟಿದೆ.

 

ಅಭ್ಯರ್ಥಿಗಳ ಬಲಾಬಲ, ಜಾತಿವರ್ಗಗಳ ಲೆಕ್ಕಾಚಾರ ( ಎಲ್ಲಾ ಪಕ್ಷಗಳು ಎಷ್ಟೇ ನಿರಾಕರಿಸಿದರೂ ಅಂತಿಮವಾಗಿ ಚುನಾವಣೆಯಲ್ಲಿ ಜಾತಿ ವರ್ಗಗಳೇ ಪ್ರಮುಖ ವಿಷಯವಾಗುವುದು ದುರಂತವಾದರೂ ಸತ್ಯ), ಕ್ಷೇತ್ರ ಪುನರ್ ವಿಂಗಡನೆಯ ಪರಿಣಾಮಗಳನ್ನು ಒಂದಿಷ್ಟು ಗಮನಿಸೋಣ ಬನ್ನಿ. ಬಿ.ಜೆ.ಪಿ.ಯ ಮಾತಿನ ಮಲ್ಲ ಸದಾನಂದ ಗೌಡರು ಈ ಬಾರಿ ಉಡುಪಿಯಲ್ಲಿ ಸ್ಪರ್ಧಿಸುವುದರ ಮೂಲಕ ಉಡುಪಿ ಕ್ಷೇತ್ರದ ರಾಜಕೀಯಕ್ಕೆ ರಂಗು ತುಂಬಿದ್ದಾರೆ. ತಮ್ಮ ಚಿತ್ರವಿಚಿತ್ರ ಹೇಳಿಕೆಗಳ ಮೂಲಕ ಸದಾ ಮಾಧ್ಯಮಗಳಲ್ಲಿ ಸುದ್ದಿ ಮಾಡುವ ಮೂಲಕ ಬಿ.ಜೆ.ಪಿ.ಯ ಜನಾರ್ಧನ ಪೂಜಾರಿ ಎನ್ನುವ ಖ್ಯಾತಿ(?)ಗೆ ಭಾಜನರಾಗಿರುವ ಈ ಖಡಕ್ ಮಾತುಗಾರನ ವರ್ಚಸ್ಸು ಎಷ್ಟು ಖಡಕ್ಕಾಗಿದೆ ಅನ್ನೋದು ಫಲಿತಾಂಶ ಬಂದ ಬಳಿಕವಷ್ಟೇ ಗೊತ್ತಾಗಲಿದೆ. ಕಳೆದ ಬಾರಿ ಕಾಂಗ್ರೆಸ್ ತೊರೆದು ಬಿ.ಜೆ.ಪಿ ಸೇರಿ ಲೋಕಸಭೆ ಚುನಾವಣೆಯಲ್ಲಿ ಭರ್ಜರಿ ಜಯ ಸಾಧಿಸಿದ್ದ ಮನೋರಮಾ ಮಧ್ವರಾಜ್ ಈ ಬಾರಿ ಮರಳಿ ಗೂಡಿಗೆ ಸೇರಿರುವುದರಿಂದ ಬಿ.ಜೆ.ಪಿ ಈ ಬಾರಿ ಸೂಕ್ತ ಅಭ್ಯರ್ಥಿಗಾಗಿ ಹುಡುಕಾಟ ನಡೆಸುತ್ತಿತ್ತು. ಕೊನೆಗೂ ಆ ಅದೃಷ್ಟ ಸಿಕ್ಕಿದ್ದು ಸದಾನಂದ ಗೌಡರಿಗೆ. ಗೌಡರು ಉಡುಪಿ ಕ್ಷೇತ್ರಕ್ಕೆ ಹೊರಗಿನವರೇ ಅನ್ನಿಸಿದರೂ ಕೂಡಾ ಬಿ.ಜೆ.ಪಿ.ಯ ರಾಜ್ಯಾಧ್ಯಕ್ಷರು ಅನ್ನುವ ವರ್ಚಸ್ಸು ಮತ್ತು ಈ ಭಾಗದಲ್ಲಿ ಕಳೆದ ಕೆಲ ವರ್ಷಗಳಿಂದ ಬಿ.ಜೆ.ಪಿ.ಯತ್ತ ಒಲವು ತೋರಿರುವ ಜನರ ಬೆಂಬಲ ಸಿಕ್ಕಿದ್ರೆ ಮಂತ್ರಿಯಾಗೋದು ಗ್ಯಾರಂಟಿ ಅನ್ನುವ ಲೆಕ್ಕಾಚಾರದಲ್ಲಿ ಮನಸ್ಸಲ್ಲೇ ಮಂಡಿಗೆ ತಿನ್ನುತ್ತಿದ್ದಾರೆ. ಕಳೆದ ಬಾರಿ ಮನೋರಮಾ ಗೆಲುವಿನಲ್ಲಿ ಮಹತ್ವದ ಪಾತ್ರ ವಹಿಸಿದ್ದ ಮೊಗವೀರರ ಒಲವು ಯಾವ ಕಡೆಗಿದೆ ಅನ್ನುವ ವಿಚಾರ ನಿರ್ಣಾಯಕವಾಗಲಿದೆ ಅನ್ನುವ ಮಾತುಗಳು ಉಡುಪಿ ಕ್ಷೇತ್ರದಲ್ಲಿ ಕೇಳಿಬರುತ್ತಿವೆ. ಚಿಕ್ಕ ಮಗಳೂರು ಕ್ಷೇತ್ರದ ವ್ಯಾಪ್ತಿಯಲ್ಲಿ ಬಿ.ಜೆ.ಪಿಯ ಪ್ರಾಬಲ್ಯವಿರುವುದು ಮೇಲ್ನೋಟಕ್ಕೆ ಕಾಣಿಸುತ್ತದೆಯಾದರೂ ವಿಧಾನ ಸಭೆಯ ಚುನಾವಣೆಯಲ್ಲಿ ಕಾರ್ಕಳದಲ್ಲಿ ಬಿಜೆಪಿಯ ಸುನಿಲ್ಕುಮಾರ್ ಕಾಂಗ್ರೆಸ್ನ ಗೋಪಾಲ ಭಂಡಾರಿಯೆದುರು ಸೋಲು ಕಂಡಿರುವ ಸಂಗತಿ ಗೌಡರಿಗೆ ಒಳಗೊಳಗೇ ಆತಂಕಕ್ಕೆ ಕಾರಣವಾಗಿರುವುದು ಸುಳ್ಳಲ್ಲ. ಅಲ್ಲದೆ ಬಿಜೆಪಿ ಶಾಸಕರಿರುವ ಬೈಂದೂರು ಕ್ಷೇತ್ರ ಈಗ ಶಿವಮೊಗ್ಗಾ ಪಾಲಾಗಿರುವುದು ಕೂಡಾ ಇನ್ನೊಂದು ಮಹತ್ವದ ಅಂಶವಾಗಲಿದೆ. ಉಡುಪಿಯ ವಿಧಾನ ಸಭಾ ಕ್ಷೇತ್ರದ ಶಾಸಕ ರಘುಪತಿ ಭಟ್ ಹಾಗೂ ಗೃಹಸಚಿವರಾಗಿರುವ ವಿ.ಎಸ್.ಆಚಾರ್ಯರ ವರ್ಚಸ್ಸು ಗೌಡರ ಪಾಲಿಗೆ ಮತ ತಂದುಕೊಡುವ ನಿರೀಕ್ಷೆ ಇಟ್ಟುಕೊಳ್ಳೋದು ತುಂಬಾ ರಿಸ್ಕಿ. ಗೌಡರ ಪಾಲಿಗೆ ಸಮಾಧಾನ ತಂದುಕೊಡುವ ಅಂಶ ಅಂದ್ರೆ ಅವರ ಎದುರಾಳಿ ಕಾಂಗ್ರೆಸ್ ಅಭ್ಯರ್ಥಿ ಜಯಪ್ರಕಾಶ್ ಹೆಗ್ಡೆಯವರನ್ನು ಕುಂದಾಪುರದ ಹಾಲಿ ಶಾಸಕ ಹಾಲಾಡಿ ಶ್ರೀನಿವಾಸ್ ಶೆಟ್ಟಿ ವಿಧಾನ ಸಭೆ ಚುನಾವಣೆಯಲ್ಲಿ ಹೀನಾಯವಾಗಿ ಸೋಲಿಸಿರುವುದು.

 

ಇನ್ನು ಕಾಂಗ್ರೆಸ್ ಅಭ್ಯರ್ಥಿ ಜಯಪ್ರಕಾಶ್ ಹೆಗ್ಡೆಯವರ ಬಲಾಬಲಗಳತ್ತ ಕಣ್ಣು ಹಾಯಿಸಿದರೆ ಎದ್ದು ಕಾಣುವುದು ಅವರು ಮೀನುಗಾರಿಕಾ ಸಚಿವರಾಗಿದ್ದಾಗ ಅವರು ಗಳಿಸಿದ್ದ ಒಳ್ಳೆಯ ಹೆಸರು. ಜೆಡಿಎಸ್ ತೊರೆದ ಬಳಿಕವೂ ಬ್ರಹ್ಮಾವರ ವಿಧಾನಸಭಾ ಕ್ಷೇತ್ರದಿಂದ ತಮ್ಮ ಸ್ವಂತ ಬಲದ ಮೇಲೆಯೇ ಪಕ್ಷೇತರರಾಗಿ ಆಯ್ಕೆಯಾದ ಖ್ಯಾತಿ ಅವರಿಗಿದೆ. ಮೀನುಗಾರಿಕಾ ಸಚಿವರಾಗಿದ್ದಾಗ ನಡೆಸಿದ ಕಾಮಗಾರಿಗಳ ಕುರಿತು ಅವರ ವಿರೋಧಿಗಳೂ ಒಳ್ಳೆಯ ಮಾತನ್ನಾಡುತ್ತಾರೆ. ಕಳೆದ ಬಾರಿ ಬಿ.ಜೆ.ಪಿ.ಯತ್ತ ಮುಖ ಮಾಡಿದ್ದ ಬಂಟರ ವೋಟುಗಳಲ್ಲಿ ಎಷ್ಟನ್ನು ಹೆಗ್ಡೆಯವರು ಸೆಳೆಯಬಲ್ಲರು ಅನ್ನುವುದರ ಮೇಲೆ ಹೆಗ್ಡೆಯವರ ಯಶಸ್ಸು ನಿರ್ಧಾರವಾಗಲಿದೆ. ಮನೋರಮಾ ಕಾಂಗ್ರೆಸ್ಗೆ ಮರಳಿದ್ದರೂ ಅವರಿಗಾಗಲಿ ಅವರ ಮಗ ಪ್ರಮೋದ್ ಮಧ್ವರಾಜ್ಗಾಗಲಿ ಕಾಂಗ್ರೆಸ್ ಮಣೆ ಹಾಕಲಿಲ್ಲ ಅನ್ನುವ ಸಿಟ್ಟು ಮೋಗವೀರರಲ್ಲಿದ್ದರೆ ಹೆಗ್ಡೆಯವರಿಗೆ ಕಷ್ಟವಾಗಲಿದೆ. ಹೆಗ್ಡೆಯವರ ಪ್ರತಿಸ್ಪರ್ಧಿ ಸದಾನಂದ ಗೌಡರು ಎಷ್ಟೇ ಪ್ರಭಾವಿಯಾದರೂ ವೈಯುಕ್ತಿಕ ವರ್ಚಸ್ಸನ್ನು ಗಮನಿಸಿದರೆ ಹೆಗ್ಡೆಯವರದ್ದೇ ಒಂದಿಂಚಿನಷ್ಟು ಮುಂದಿದ್ದಾರೆ. ಮೇಲಾಗಿ ಕಾಂಗ್ರೆಸ್ನ ಮತಬ್ಯಾಂಕ್ನ ಮತಗಳು ಹೆಗ್ಡೆಯವರ ಪಾಲಿಗೆ ಬೋನಸ್ ಎನಿಸಲಿವೆ.  ಆದರೂ ಉಡುಪಿಯ ವ್ಯಾಪ್ತಿಗೆ ಹೊಸದಾಗಿ ಸೇರ್ಪಡೆಗೊಂಡಿರುವ ಚಿಕ್ಕಮಗಳೂರು ಕ್ಷೇತ್ರದ ಪ್ರದೇಶಗಳಲ್ಲಿ ವ್ಯಕ್ತಿಗಿಂತ ಪಕ್ಷದ ಮತಗಳೇ ನಿರ್ಣಾಯಕವೆನಿಸಲಿದೆ. ಅಲ್ಲದೆ ಕಳೆದ ಚುನಾವಣೆಯಲ್ಲಿ ತಮಗೆ ನೀರು ಕುಡಿಸಿದ ಹಾಲಾಡಿ ಶೆಟ್ಟರ ವರ್ಚಸ್ಸು ಕುಂದಾಪುರ ಭಾಗದಲ್ಲಿ ಜೋರಾಗಿರುವುದು ಹೆಗ್ಡೆಯವರ ನಿದ್ದೆ ಕೆಡಿಸಿದೆ. ಇತ್ತೀಚೆಗಷ್ಟೇ ಕಾಂಗ್ರೆಸ್ ತೊರೆದು ಬಿ.ಜೆ.ಪಿ ಸೇರಿದ ಶಂಕರ ಪೂಜಾರಿಯವರು ಸಾಂಪ್ರದಾಯಿಕವಾಗಿ ಕಾಂಗ್ರೆಸ್ ಬೆನ್ನಿಗಿರುವ ಬಿಲ್ಲವರ ಎಷ್ಟು ಮತಗಳನ್ನು ತಮ್ಮೊಂದಿಗೆ ಕೊಂಡೊಯ್ಯಲು ಶಕ್ಯರಾಗಬಹುದು ಅನ್ನುವುದು ಮಿಲಿಯನ್ ಡಾಲರ್ ಪ್ರಶ್ನೆ.

 

ಉಡುಪಿ ಕ್ಷೇತ್ರದ ಒಟ್ಟಾರೆ ಚಿತ್ರಣ ಸಾಕಷ್ಟು ಗೊಂದಲಗಳಿಂದ ಕೂಡಿದ್ದರೂ, ಮೇಲ್ನೊಟಕ್ಕೆ ಬಿ.ಜೆ.ಪಿ ಕೂದಲೆಳೆಯಷ್ಟು ಮುಂದಿರುವಂತೆ ಕಂಡುಬಂದರೂ ಕಳೆದ ಚುನಾವಣೆಯ ಬಳಿಕ ಸಾಕಷ್ಟು ನೀರು ಹೊಳೆಯಲ್ಲಿ ಹರಿದು ಹೋಗಿ ಕಡಲು ಸೇರಿರುವುದು ಎಷ್ಟು ಸತ್ಯವೋ ಉಡುಪಿಯ ರಾಜಕೀಯ ಚಿತ್ರಣದಲಿ ಅನೇಕ ಸ್ಥಿತ್ಯಂತರಗಳಾಗಿರುವುದು ಅಷ್ಟೇ ಸತ್ಯ. ಹಾಗಾಗಿ ಹೆಗ್ಡೆಯವರಿಗೆ ಈ ಬಾರಿ ಅದೃಷ್ಟ ಕುದುರಿದರೂ ಕುದುರಬಹುದು ಅನ್ನುವ ಪಿಸು ಮಾತು ಅಲ್ಲಲ್ಲಿ ಕೇಳಿ ಬರುತ್ತಿರುವುದರಿಂದ, ಒಟ್ಟಾರೆಯಾಗಿ ಹೇಳುವುದಿದ್ದರೆ ಉಡುಪಿಯಲ್ಲಿ ಸಮಬಲದ ಹೋರಾಟಕ್ಕೆ ವೇದಿಕೆ ಸಿದ್ಧವಾಗಿದೆ.

ರವಿ ಬೆಳಗೆರೆ ಪಾದರಸ ನುಂಗಿರುವುದು ಖಚಿತವಾಗಿದೆ. ಒಂದು ಪುಸ್ತಕ ಓದಿ ಪಕ್ಕಕ್ಕಿಡುವಷ್ಟರಲ್ಲೇ ಮತ್ತೊಂದು ಪುಸ್ತಕ ಕೈಯಲ್ಲಿ ಹಿಡಿದುಕೊಂಡು ತಯಾರಾಗುತ್ತಿದ್ದಾರೆ. ಚಲಂ, ದಂಗೆಯ ದಿನಗಳು, ನೀನಾ ಪಾಕಿಸ್ತಾನ, ಅವನೊಬ್ಬನಿದ್ದ ಗೋಡ್ಸೆಮತ್ತೀಗ ಮೇಜರ್ ಸಂದೀಪ್ ಹತ್ಯೆಹೀಗೆ ಸಾಲು ಸಾಲಾಗಿ ಪುಸ್ತಕಗಳನ್ನು ಪ್ರೀತಿಯಿಂದ ಕೈಗಿಡುತ್ತಿದ್ದಾರೆ. ಇವುಗಳಲ್ಲಿ ಬಹುತೇಕ ಅನುವಾದಿತ ಕೃತಿಗಳೇ ಇದ್ದರೂ ಕೂಡಾ ಇಷ್ಟೊಂದು ಕಡಿಮೆ ಅವಧಿಯಲ್ಲಿ ಲೇಖಕರೊಬ್ಬರು ಇಷ್ಟು ಪುಸ್ತಕಗಳನ್ನು ಹೊರ ತಂದಿರುವುದು ಕನ್ನಡದ ಮಟ್ಟಿಗೆ ಬಹುಷಃ ದಾಖಲೆಯೇ ಇರಬೇಕು. ಅಲ್ಲದೆ ದಿಢೀರ್ ಅಡುಗೆ ಮಾಡಿದ್ರೂ ಅಡುಗೆಯ ರುಚಿ ಎಲ್ಲೂ ಕೆಡದಂತೆ ನೋಡಿಕೊಳ್ಳುವ ಈ ಬಾಣಸಿಗನ ಕೈರುಚಿಯಿಂದಾಗಿ ಓದುಗನಿಗೆ ಪಕ್ವಾನ್ನಗಳ ತಟ್ಟೆಯಿಂದ ಯಾವುದು ಮೊದಲು ಕೈಗೆತ್ತಿಕೊಳ್ಳಲಿ ಅನ್ನುವ ಗೊಂದಲ.

 

ಗೋಡ್ಸೆಯ ಬಗ್ಗೆ ಬೆಳಗೆರೆ ಬರೆದಿರುವುದು ಇದು ಮೊದಲೇನಲ್ಲ. ಗಾಂಧಿ ಹತ್ಯೆ ಮತ್ತು ಗೋಡ್ಸೆ ಅನ್ನುವ ಪುಸ್ತಕ ಮೊದಲೇ ಬರೆದಿದ್ದಾರೆ. ಆದರೂ ಗಾಂಧೀ ಹತ್ಯೆಯ ಸಂಚು, ಅದಕ್ಕೆ ಕಾರಣವಾದ ಘಟನೆಗಳು, ಹತ್ಯೆಯ ವಿಫಲ ಪ್ರಯತ್ನಗಳು ಹಂತಕರ ಮನಸ್ಸಿನ ತಳಮಳಗಳ ಸಮಗ್ರ ವಿವರಣೆಗಳ ಜೊತೆಯಲ್ಲಿ ಪೂರಕವಾಗಿ ಅಪರೂಪದ ಫೋಟೋಗಳನ್ನು ಒಳಗೊಂಡ ಈ ಪುಸ್ತಕ ಓದುತ್ತಿದ್ದರೆ ಇತಿಹಾಸದ ಪುಟ ಸೇರಿದ ಗಾಂಧೀ ಹತ್ಯೆಯ ಸಂದರ್ಭ ಕಣ್ಣೆದುರು ಬಿಚ್ಚಿಕೊಳ್ಳತೊಡಗುತ್ತದೆ. ಅಲ್ಲದೆ ಹತ್ಯೆಯ ಸಂಚಿನ ಭಾಗವಾಗಿದ್ದ ಗೋಪಾಲ ಗೋಡ್ಸೆ, ಮದನಲಾಲ್ ಪಹವಾ, ವಿಷ್ಣು ಕರಕರೆ ಮತ್ತು ಅಪ್ರೂವರ್ ಆಗಿದ್ದ ದಿಗಂಬರ ಬಡ್ಗೆ ಜೈಲು ಶಿಕ್ಷೆ ಮುಗಿಸಿ ಹೊರಬಂದ ಬಳಿಕ ಇವರೆಲ್ಲರೊಂದಿಗೆ ಮೂಲ ಲೇಖರಾದ ಮನೋಹರ ಮಳಗಾಂವಕರ್ ಅವರು ಮುಕ್ತವಾಗಿ ಚರ್ಚಿಸಿ ಬರೆದಿರುವುದರಿಂದ ಇಲ್ಲಿನ ವಿವರಗಳು ಇನ್ನಷ್ಟು ನಿಖರವಾಗಿ ಮೂಡಿಬಂದಿವೆ. ಗೋಡ್ಸೆ ಬಂಧಿತನಾದ ಸಂದರ್ಭದ ಎಫ್..ಆರ್ ಪ್ರತಿ, ಸಾವರ್ಕರ್ ತಾವು ಹತ್ಯೆಯ ಸಂಚಿನಲ್ಲಿ ಭಾಗಿಯಾಗಿಲ್ಲ ಎಂದು ವಿವರಣೆ ನೀಡಲು ಸಲ್ಲಿಸಿದ ಅಫಿದಾವಿತ್, ಹತ್ಯೆಯ ವಿಚಾರಣೆಯ ಅಂತಿಮ ತೀರ್ಪಿನ ಪ್ರತಿ, ಗಾಂಧೀ ಹಂತಕರು ಬಳಸಿದ ವಿಮಾನಯಾನದ ಟಿಕೇಟುಗಳ ಪ್ರತಿಹೀಗೆ ಹತ್ತು ಹಲವು ಅಮೂಲ್ಯ ದಾಖಲೆಗಳು ಈ ಪುಸ್ತಕದ ಐತಿಹಾಸಿಕ ಮಹತ್ವಕ್ಕೆ ಇನ್ನಷ್ಟು ಮೆರುಗು ನೀಡಿವೆ. ಘಟನೆಗೆ ಸಂಬಂಧಿಸಿದ ವ್ಯಕ್ತಿಗಳು, ಸ್ಥಳಗಳು, ತನಿಖಾಧಿಕಾರಿಗಳು, ಗಾಂಧಿ ಅಂತಿಮ ಕ್ಷಣಗಳ ಫೋಟೋಗಳು ಹೀಗೆ ಈ ಪುಸ್ತಕ ಸಂಗ್ರಹಯೋಗ್ಯ ದಾಖಲೆಗಳ ಅಪೂರ್ವ ಭಂಡಾರವೇ ಸರಿ.

 

ಅಹಿಂಸೆಯನ್ನೇ ಪರಮಧರ್ಮ ಅನ್ನುತ್ತ ಬದುಕಿದ ಗಾಂಧೀಜಿಯ ಹತ್ಯೆ ಧರ್ಮಾಂಧ ಯುವಕರ ಕ್ಷಣಿಕ ಆವೇಶದ ಫಲವೇ, ಇಲ್ಲಾ ಅದೊಂದು ವ್ಯವಸ್ಥಿತ ಕಾರಸ್ಥಾನವಾಗಿತ್ತೇ? ದೇಶ ವಿಭಜನೆಯ ಕಾಲದಲ್ಲಿ ನಡೆದ ನರಮೇಧಗಳಲ್ಲಿ ಗಾಂಧೀ ಮುಸ್ಲಿಮರ ಪರ ವಹಿಸಿದರೆನ್ನುವ ಕಾರಣಕ್ಕೆ ಅವರ ಹತ್ಯೆಯಾಯಿತೆ ಇಲ್ಲಾ ಅವರ ಜೀವನದುದ್ದಕ್ಕೂ ಪ್ರತಿಪಾದಿಸಿಕೊಂಡು ಬಂದ ಅಹಿಂಸೆಯಂತಹ ಸಿದ್ಧಾಂತಗಳನ್ನು ಸಹಿಸದವರು ನಡೆಸಿದ ವ್ಯವಸ್ಥಿತ ಪಿತೂರಿಯೇ? ವಿಫಲ ಹತ್ಯಾ ಪ್ರಯತ್ನವದ ಬಳಿಕ ಹಂತಕರು ಹೋದಲ್ಲೆಲ್ಲಾ ತಮ್ಮ ಅಜಾಗರೂಕತೆಯಿಂದ  ಬಿಟ್ಟ ಸುಳಿವುಗಳನ್ನು ಬಳಸಿಕೊಳ್ಳದ ಭದ್ರತಾ ವ್ಯವಸ್ಥೆಯ ವೈಫಲ್ಯವೇ ಗಾಂಧೀ ಹತ್ಯೆಗೆ ಕಾರಣವಾಯಿತೆ? ಸಾವರ್ಕರ್ ನಿಜಕ್ಕೂ ಗಾಂಧೀ ಹತ್ಯೆಯ ಸಂಚಿನ ರೂವಾರಿಯಾಗಿದ್ದರೆ ಇಲ್ಲಾ ಅನಾವಶ್ಯಕವಾಗಿ ಅವರನ್ನು ರಾಜಕೀಯ ಕಾರಣಕ್ಕಾಗಿ ಈ ಗೋಜಲಿನಲ್ಲಿ ಸಿಲುಕಿಸಲಾಯಿತೆ? ಗೋಡ್ಸೆ ಮತ್ತವನ ಸಹಚರರು ಯಾವ ಕಾರಣಕ್ಕೆ ಗಾಂಧೀಜಿಯವರ ಹತ್ಯೆಯಂತಹ ಭೀಕರ ನಿರ್ಧಾರಕ್ಕೆ ಮುಂದಾದರು? ಆ ಸಂದರ್ಭದಲ್ಲಿ ಅವರ ಮನಸ್ಸಿನ ತಳಮಳ, ಭ್ರಾಂತಿ, ಗೊಂದಲಗಳೇನು…. ಹೀಗೆ ಎಲ್ಲವನ್ನೂ ಸಾದ್ಯಂತವಾಗಿ ಬಿಡಿಸುತ್ತಾ ಹೋಗುವ ಪುಸ್ತಕ ಆ ಕ್ಷಣದ ಸತ್ಯಗಳನ್ನು ಒಂದೊಂದಾಗಿ ಅನಾವರಣಗೊಳಿಸುತ್ತಾ ಹೋಗುತ್ತದೆ. ಹತ್ಯೆಯ ತನಿಖೆವಿಚಾರಣೆತೀರ್ಪುಗಳ ವಿವರಣೆಯೊಂದಿಗೆ ಮರಣದಂಡನೆಯ ತೀರ್ಪು ಹೊರಬಿದ್ದಾದ ಬಳಿಕ ಗಾಂಧೀ ಹಂತಕರ ಮನಸ್ಥಿತಿ, ವರ್ತನೆ ಹೇಗಿತ್ತು, ಅವರ ಬಂಧುಗಳ ಪ್ರತಿಕ್ರಿಯೆ ಏನಾಗಿತ್ತುಎಲ್ಲವನ್ನೂ ವಿವರವಾಗಿ ಓದಿದ ನಂತರ ನಮ್ಮ ಮನದಲ್ಲಿ ಮೂಡುವ ಒಂದು ಪ್ರಶ್ನೆಯನ್ನು ಬೆಳಗೆರೆ ತಾವೇ ಕೇಳಿದ್ದಾರೆ…. ನಾಥೂರಾಮ ಗೋಡ್ಸೆ ಮತ್ತು ನಾರಾಯಣ ಆಪ್ಟೆ ವ್ಯರ್ಥವಾಗಿ ಸತ್ತರಾ? ಉತ್ತರ ಹುಡುಕಲು ಪುಸ್ತಕವನ್ನು ನೀವೆ ಒಮ್ಮೆ ಓದಿ ನೊಡಿನಿಮಗೇನಾದರೂ ಉತ್ತರ ಹೊಳೆದರೂ ಹೊಳೆದೀತು

 

ಪುಸ್ತಕದ ಬೆಲೆ ಸ್ವಲ್ಪ ಜಾಸ್ತಿ ಅನ್ನಿಸಿದರೂ ಪುಸ್ತಕದಲ್ಲಿರುವ ಅಪರೂಪದ ದಾಖಲೆ, ಫೋಟೋ, ವಿವರಣೆಗಳಿಗೆ ತುಲನೆ ಮಾಡಿದರೆ 250 ರೂಪಾಯಿಗಳು ತೀರಾ ಜಾಸ್ತಿ ಅನ್ನಿಸೋದಿಲ್ಲ ಬಿಡಿ.

 

ಪುಸ್ತಕ                 ಅವನೊಬ್ಬನಿದ್ದ ಗೋಡ್ಸೆ

ಮೂಲ                ಮನೋಹರ ಮಳಗಾಂವಕರ್

ಕನ್ನಡಕ್ಕೆ             ರವಿ ಬೆಳಗೆರೆ

ಪ್ರಕಾಶನ            ಭಾವನಾ ಪ್ರಕಾಶನ

ಪುಟಗಳು            200

ಬೆಲೆ                   250 ರೂಪಾಯಿಗಳು