ನೀ ಬಳಿಯಲಿರಲು ಗೆಳತಿ
ಈ ಬದುಕಲಿ ಅಷ್ಟೇ ಸಾಕು
ನೀ ದೂರವಾದರೆ…
ಈ ಬದುಕು ಸಾಕು ಅಷ್ಟೇ..!!
– – – – – – – – – – – – – – – – – — – – – – – – – – – – – – – – –
ನಿನ್ನ ಮರೆಯಬೇಕೆಂಬ ಮನಸಿನ ಮನವಿಯ
ಮನ್ನಿಸಿ ನಾ ಮರೆತೇಬಿಟ್ಟೆ
ಮರುಘಳಿಗೆಯಲೇ ಮಧುರ ನೆನಪುಗಳ ಆಲಾಪವ
ಆಲಿಸುತ ಮೈ ಮರೆತೇಬಿಟ್ಟೆ
– – – – – – – – – – – – – – – – – — – – – – – – – – – – – – – – –
ಬದುಕಿನ ಕವನ ಸಂಕಲನದಲಿ..
ನೀನೊಂದು ಪುಟ್ಟ ಕವಿತೆ
ಬಾಳಿನ ಭಾವಗೀತೆಯಲಿ ನೀ
ಸ್ವರವಾಗಿ ಕುಳಿತೆ
ಪ್ರೇಮದ ಪಿಸುಮಾತಲಿ ನೀ
ಪದವಾಗಿ ಅವಿತೆ
ಬರುವೆಯ ನನ್ನ ತಮದ ಬಾಳಿಗೆ
ನೀನಾಗಿ ಒಂದು ಪುಟ್ಟ ಹಣತೆ?
– – – – – – – – – – – – – – – – – — – – – – – – – – – – – – – – –
ಚಿತ್ತ ಭಿತ್ತಿಯ ನಡುವೆ.. ಕನಸುಗಳ ಕೋಣೆಯಲಿ
ನಿನ್ನ ನೆನಪುಗಳ ಚಾದರವ ಬಿಚ್ಚಿಟ್ಟಿರುವೆ…
ಮಧುರ ಸ್ಮೃತಿಗಳ ಸುಂದರ ಮೆಲ್ವಾಸಿನಡಿಯಲಿ
ಕಣ್ಣೀರ ಕರೆಗಳನೆಲ್ಲ ಬಚ್ಚಿಟ್ಟಿರುವೆ
– – – – – – – – – – – – – – – – – — – – – – – – – – – – – – – – –
ಮರೆತೂ ಕೂಡ ಕಾಲಿಡಬೇಡ ಗೆಳತಿ
ನನ್ನೆದೆಯ ಅಂಗಳದಲಿ ..
ಹಾಳಾದೀತು ಎಂದೋ ನೀನೇ ಬಿಡಿಸಿಟ್ಟ
ಒಲವಿನ ರಂಗವಲ್ಲಿ
– – – – – – – – – – – – – – – – – — – – – – – – – – – – – – – – –
ಭಾವ ಬಿಂದಿಗೆಯ ತುಂಬೆಲ್ಲಾ ನಿನ್ನೊಲವಿನ ತಿಳಿ ನೀರು
ಸ್ಪೂರ್ತಿ ಪಾತ್ರೆಯಲೂ ಗೆಳತಿ ಭರ್ತಿ ನೀನೇ ನೀನು
ಕಣ್ಮುಚ್ಚಿಕೊಂಡರೆ ಕನಸಲಿ ಬರ್ತಿ ನೀನು
ಕಣ್ತುಂಬಿ ಬಂದಾಗ ಕಣ್ಣಂಚಿನ ಹನಿಯಲೂ ಇರ್ತಿ ನೀನು
– – – – – – – – – – – – – – – – – — – – – – – – – – – – – – – – –
Like this:
Like ಲೋಡ್ ಆಗುತ್ತಿದೆ...
