Archive for the ‘ಪುಸ್ತಕಗಳು’ Category

ರವಿ ಬೆಳಗೆರೆ ಪಾದರಸ ನುಂಗಿರುವುದು ಖಚಿತವಾಗಿದೆ. ಒಂದು ಪುಸ್ತಕ ಓದಿ ಪಕ್ಕಕ್ಕಿಡುವಷ್ಟರಲ್ಲೇ ಮತ್ತೊಂದು ಪುಸ್ತಕ ಕೈಯಲ್ಲಿ ಹಿಡಿದುಕೊಂಡು ತಯಾರಾಗುತ್ತಿದ್ದಾರೆ. ಚಲಂ, ದಂಗೆಯ ದಿನಗಳು, ನೀನಾ ಪಾಕಿಸ್ತಾನ, ಅವನೊಬ್ಬನಿದ್ದ ಗೋಡ್ಸೆಮತ್ತೀಗ ಮೇಜರ್ ಸಂದೀಪ್ ಹತ್ಯೆಹೀಗೆ ಸಾಲು ಸಾಲಾಗಿ ಪುಸ್ತಕಗಳನ್ನು ಪ್ರೀತಿಯಿಂದ ಕೈಗಿಡುತ್ತಿದ್ದಾರೆ. ಇವುಗಳಲ್ಲಿ ಬಹುತೇಕ ಅನುವಾದಿತ ಕೃತಿಗಳೇ ಇದ್ದರೂ ಕೂಡಾ ಇಷ್ಟೊಂದು ಕಡಿಮೆ ಅವಧಿಯಲ್ಲಿ ಲೇಖಕರೊಬ್ಬರು ಇಷ್ಟು ಪುಸ್ತಕಗಳನ್ನು ಹೊರ ತಂದಿರುವುದು ಕನ್ನಡದ ಮಟ್ಟಿಗೆ ಬಹುಷಃ ದಾಖಲೆಯೇ ಇರಬೇಕು. ಅಲ್ಲದೆ ದಿಢೀರ್ ಅಡುಗೆ ಮಾಡಿದ್ರೂ ಅಡುಗೆಯ ರುಚಿ ಎಲ್ಲೂ ಕೆಡದಂತೆ ನೋಡಿಕೊಳ್ಳುವ ಈ ಬಾಣಸಿಗನ ಕೈರುಚಿಯಿಂದಾಗಿ ಓದುಗನಿಗೆ ಪಕ್ವಾನ್ನಗಳ ತಟ್ಟೆಯಿಂದ ಯಾವುದು ಮೊದಲು ಕೈಗೆತ್ತಿಕೊಳ್ಳಲಿ ಅನ್ನುವ ಗೊಂದಲ.

 

ಗೋಡ್ಸೆಯ ಬಗ್ಗೆ ಬೆಳಗೆರೆ ಬರೆದಿರುವುದು ಇದು ಮೊದಲೇನಲ್ಲ. ಗಾಂಧಿ ಹತ್ಯೆ ಮತ್ತು ಗೋಡ್ಸೆ ಅನ್ನುವ ಪುಸ್ತಕ ಮೊದಲೇ ಬರೆದಿದ್ದಾರೆ. ಆದರೂ ಗಾಂಧೀ ಹತ್ಯೆಯ ಸಂಚು, ಅದಕ್ಕೆ ಕಾರಣವಾದ ಘಟನೆಗಳು, ಹತ್ಯೆಯ ವಿಫಲ ಪ್ರಯತ್ನಗಳು ಹಂತಕರ ಮನಸ್ಸಿನ ತಳಮಳಗಳ ಸಮಗ್ರ ವಿವರಣೆಗಳ ಜೊತೆಯಲ್ಲಿ ಪೂರಕವಾಗಿ ಅಪರೂಪದ ಫೋಟೋಗಳನ್ನು ಒಳಗೊಂಡ ಈ ಪುಸ್ತಕ ಓದುತ್ತಿದ್ದರೆ ಇತಿಹಾಸದ ಪುಟ ಸೇರಿದ ಗಾಂಧೀ ಹತ್ಯೆಯ ಸಂದರ್ಭ ಕಣ್ಣೆದುರು ಬಿಚ್ಚಿಕೊಳ್ಳತೊಡಗುತ್ತದೆ. ಅಲ್ಲದೆ ಹತ್ಯೆಯ ಸಂಚಿನ ಭಾಗವಾಗಿದ್ದ ಗೋಪಾಲ ಗೋಡ್ಸೆ, ಮದನಲಾಲ್ ಪಹವಾ, ವಿಷ್ಣು ಕರಕರೆ ಮತ್ತು ಅಪ್ರೂವರ್ ಆಗಿದ್ದ ದಿಗಂಬರ ಬಡ್ಗೆ ಜೈಲು ಶಿಕ್ಷೆ ಮುಗಿಸಿ ಹೊರಬಂದ ಬಳಿಕ ಇವರೆಲ್ಲರೊಂದಿಗೆ ಮೂಲ ಲೇಖರಾದ ಮನೋಹರ ಮಳಗಾಂವಕರ್ ಅವರು ಮುಕ್ತವಾಗಿ ಚರ್ಚಿಸಿ ಬರೆದಿರುವುದರಿಂದ ಇಲ್ಲಿನ ವಿವರಗಳು ಇನ್ನಷ್ಟು ನಿಖರವಾಗಿ ಮೂಡಿಬಂದಿವೆ. ಗೋಡ್ಸೆ ಬಂಧಿತನಾದ ಸಂದರ್ಭದ ಎಫ್..ಆರ್ ಪ್ರತಿ, ಸಾವರ್ಕರ್ ತಾವು ಹತ್ಯೆಯ ಸಂಚಿನಲ್ಲಿ ಭಾಗಿಯಾಗಿಲ್ಲ ಎಂದು ವಿವರಣೆ ನೀಡಲು ಸಲ್ಲಿಸಿದ ಅಫಿದಾವಿತ್, ಹತ್ಯೆಯ ವಿಚಾರಣೆಯ ಅಂತಿಮ ತೀರ್ಪಿನ ಪ್ರತಿ, ಗಾಂಧೀ ಹಂತಕರು ಬಳಸಿದ ವಿಮಾನಯಾನದ ಟಿಕೇಟುಗಳ ಪ್ರತಿಹೀಗೆ ಹತ್ತು ಹಲವು ಅಮೂಲ್ಯ ದಾಖಲೆಗಳು ಈ ಪುಸ್ತಕದ ಐತಿಹಾಸಿಕ ಮಹತ್ವಕ್ಕೆ ಇನ್ನಷ್ಟು ಮೆರುಗು ನೀಡಿವೆ. ಘಟನೆಗೆ ಸಂಬಂಧಿಸಿದ ವ್ಯಕ್ತಿಗಳು, ಸ್ಥಳಗಳು, ತನಿಖಾಧಿಕಾರಿಗಳು, ಗಾಂಧಿ ಅಂತಿಮ ಕ್ಷಣಗಳ ಫೋಟೋಗಳು ಹೀಗೆ ಈ ಪುಸ್ತಕ ಸಂಗ್ರಹಯೋಗ್ಯ ದಾಖಲೆಗಳ ಅಪೂರ್ವ ಭಂಡಾರವೇ ಸರಿ.

 

ಅಹಿಂಸೆಯನ್ನೇ ಪರಮಧರ್ಮ ಅನ್ನುತ್ತ ಬದುಕಿದ ಗಾಂಧೀಜಿಯ ಹತ್ಯೆ ಧರ್ಮಾಂಧ ಯುವಕರ ಕ್ಷಣಿಕ ಆವೇಶದ ಫಲವೇ, ಇಲ್ಲಾ ಅದೊಂದು ವ್ಯವಸ್ಥಿತ ಕಾರಸ್ಥಾನವಾಗಿತ್ತೇ? ದೇಶ ವಿಭಜನೆಯ ಕಾಲದಲ್ಲಿ ನಡೆದ ನರಮೇಧಗಳಲ್ಲಿ ಗಾಂಧೀ ಮುಸ್ಲಿಮರ ಪರ ವಹಿಸಿದರೆನ್ನುವ ಕಾರಣಕ್ಕೆ ಅವರ ಹತ್ಯೆಯಾಯಿತೆ ಇಲ್ಲಾ ಅವರ ಜೀವನದುದ್ದಕ್ಕೂ ಪ್ರತಿಪಾದಿಸಿಕೊಂಡು ಬಂದ ಅಹಿಂಸೆಯಂತಹ ಸಿದ್ಧಾಂತಗಳನ್ನು ಸಹಿಸದವರು ನಡೆಸಿದ ವ್ಯವಸ್ಥಿತ ಪಿತೂರಿಯೇ? ವಿಫಲ ಹತ್ಯಾ ಪ್ರಯತ್ನವದ ಬಳಿಕ ಹಂತಕರು ಹೋದಲ್ಲೆಲ್ಲಾ ತಮ್ಮ ಅಜಾಗರೂಕತೆಯಿಂದ  ಬಿಟ್ಟ ಸುಳಿವುಗಳನ್ನು ಬಳಸಿಕೊಳ್ಳದ ಭದ್ರತಾ ವ್ಯವಸ್ಥೆಯ ವೈಫಲ್ಯವೇ ಗಾಂಧೀ ಹತ್ಯೆಗೆ ಕಾರಣವಾಯಿತೆ? ಸಾವರ್ಕರ್ ನಿಜಕ್ಕೂ ಗಾಂಧೀ ಹತ್ಯೆಯ ಸಂಚಿನ ರೂವಾರಿಯಾಗಿದ್ದರೆ ಇಲ್ಲಾ ಅನಾವಶ್ಯಕವಾಗಿ ಅವರನ್ನು ರಾಜಕೀಯ ಕಾರಣಕ್ಕಾಗಿ ಈ ಗೋಜಲಿನಲ್ಲಿ ಸಿಲುಕಿಸಲಾಯಿತೆ? ಗೋಡ್ಸೆ ಮತ್ತವನ ಸಹಚರರು ಯಾವ ಕಾರಣಕ್ಕೆ ಗಾಂಧೀಜಿಯವರ ಹತ್ಯೆಯಂತಹ ಭೀಕರ ನಿರ್ಧಾರಕ್ಕೆ ಮುಂದಾದರು? ಆ ಸಂದರ್ಭದಲ್ಲಿ ಅವರ ಮನಸ್ಸಿನ ತಳಮಳ, ಭ್ರಾಂತಿ, ಗೊಂದಲಗಳೇನು…. ಹೀಗೆ ಎಲ್ಲವನ್ನೂ ಸಾದ್ಯಂತವಾಗಿ ಬಿಡಿಸುತ್ತಾ ಹೋಗುವ ಪುಸ್ತಕ ಆ ಕ್ಷಣದ ಸತ್ಯಗಳನ್ನು ಒಂದೊಂದಾಗಿ ಅನಾವರಣಗೊಳಿಸುತ್ತಾ ಹೋಗುತ್ತದೆ. ಹತ್ಯೆಯ ತನಿಖೆವಿಚಾರಣೆತೀರ್ಪುಗಳ ವಿವರಣೆಯೊಂದಿಗೆ ಮರಣದಂಡನೆಯ ತೀರ್ಪು ಹೊರಬಿದ್ದಾದ ಬಳಿಕ ಗಾಂಧೀ ಹಂತಕರ ಮನಸ್ಥಿತಿ, ವರ್ತನೆ ಹೇಗಿತ್ತು, ಅವರ ಬಂಧುಗಳ ಪ್ರತಿಕ್ರಿಯೆ ಏನಾಗಿತ್ತುಎಲ್ಲವನ್ನೂ ವಿವರವಾಗಿ ಓದಿದ ನಂತರ ನಮ್ಮ ಮನದಲ್ಲಿ ಮೂಡುವ ಒಂದು ಪ್ರಶ್ನೆಯನ್ನು ಬೆಳಗೆರೆ ತಾವೇ ಕೇಳಿದ್ದಾರೆ…. ನಾಥೂರಾಮ ಗೋಡ್ಸೆ ಮತ್ತು ನಾರಾಯಣ ಆಪ್ಟೆ ವ್ಯರ್ಥವಾಗಿ ಸತ್ತರಾ? ಉತ್ತರ ಹುಡುಕಲು ಪುಸ್ತಕವನ್ನು ನೀವೆ ಒಮ್ಮೆ ಓದಿ ನೊಡಿನಿಮಗೇನಾದರೂ ಉತ್ತರ ಹೊಳೆದರೂ ಹೊಳೆದೀತು

 

ಪುಸ್ತಕದ ಬೆಲೆ ಸ್ವಲ್ಪ ಜಾಸ್ತಿ ಅನ್ನಿಸಿದರೂ ಪುಸ್ತಕದಲ್ಲಿರುವ ಅಪರೂಪದ ದಾಖಲೆ, ಫೋಟೋ, ವಿವರಣೆಗಳಿಗೆ ತುಲನೆ ಮಾಡಿದರೆ 250 ರೂಪಾಯಿಗಳು ತೀರಾ ಜಾಸ್ತಿ ಅನ್ನಿಸೋದಿಲ್ಲ ಬಿಡಿ.

 

ಪುಸ್ತಕ                 ಅವನೊಬ್ಬನಿದ್ದ ಗೋಡ್ಸೆ

ಮೂಲ                ಮನೋಹರ ಮಳಗಾಂವಕರ್

ಕನ್ನಡಕ್ಕೆ             ರವಿ ಬೆಳಗೆರೆ

ಪ್ರಕಾಶನ            ಭಾವನಾ ಪ್ರಕಾಶನ

ಪುಟಗಳು            200

ಬೆಲೆ                   250 ರೂಪಾಯಿಗಳು

Advertisements

ಕಳೆದ ಹತ್ತು ದಿನಗಳಲ್ಲಿ ಒಂದಿಷ್ಟು ಪುಸ್ತಕಗಳನ್ನು ಗುಡ್ಡೆ ಹಾಕಿಕೊಂಡು ಕುಳಿತಿದ್ದೆ. ಶ್ರೀಧರ ಬಳೆಗಾರ ಅವರ ಕಥಾ ಸಂಕಲನ ಒಂದು ಫೋಟೋದ ನೆಗೆಟಿವ್, ಜೋಗಿಯ ರಾಯಭಾಗದ ರಹಸ್ಯ ರಾತ್ರಿ, ಬೆಳಗೆರೆಯ ಒಮರ್ಟಾ ಸುಮಿತ್ರಾ ಅವರ ಕಥಾಸಂಕಲನ ಗುಬ್ಬಿ ಹಳ್ಳದ ಸಾಕ್ಷಿಯಲ್ಲಿವುಗಳಲ್ಲಿ ಮುಖ್ಯವಾದ ಕೆಲವು ಪುಸ್ತಕಗಳು.

 

ನನಗೆ ತುಂಬಾ ಹಿಡಿಸಿದ್ದು ಒಂದು ಫೋಟೋದ ನೆಗೆಟಿವ್. ವಿಮರ್ಶೆ ಮಣ್ಣು ಮಸಿ ಅಂತ ಮಾಡೋಕೆ ನಂಗಂತೂ ಬರೊಲ್ಲ… ಕಥೆಯ ವಸ್ತು ಧ್ವನಿ, ಒಳನೋಟ, ರೂಪಕ, ತಂತ್ರಗಾರಿಕೆ ಮಂತ್ರಗಾರಿಕೆ ಅಂತೆಲ್ಲ ಬರೆದು-ಕೊರೆದು ನಿಮ್ಮ ತಲೆಗೆ ತ್ರಾಸ ಕೋಡುವಷ್ಟು ಸಾಮರ್ಥ್ಯ ದೇವರಾಣೆಗೂ ನನಗಿಲ್ಲ. ಹಾಗಾಗಿ ನೀವು ಬಚಾವ್!! ಆದ್ರೆ ಇಲ್ಲಿನ ಕಥೆಗಳು ಸೊಗಸಾಗಿದ್ದು ಸಲೀಸಾಗಿ ಓದಿಸಿಕೊಂಡು ಹೊಗುತ್ತವೆ, ಖುಶಿ ಕೋಡುತ್ತವೆ

 

ಸುಮಿತ್ರ ಅವರ ಗುಬ್ಬಿ ಹಳ್ಳದ ಸಾಕ್ಷಿ ಯಲ್ಲಿ ನನಗೆ ಹಿಡಿಸಿದ್ದು ಎರಡು-ಮೂರು ಕಥೆಗಳು ಮಾತ್ರ. ಕೆಲವೊಂದು ಕಥೆಗಳು ಮುಗಿದ ಮೇಲೆ ಇದರಲ್ಲಿ ಹೇಳೋಕೆ ಹೊರಟಿದ್ದು ಹಾಗು ಹೇಳಿರುವುದರ ಮಧ್ಯೆ ಏನೋ ಕೋಂಡಿ ಕಳಿಚಿದಂತೆ ಭಾಸವಾಗ್ತಾ ಇತ್ತು ಅಂತ ನನ್ನ ಅನಿಸಿಕೆ. ಹಾಗಂತ ಅದನ್ನು ನೀವು ನಂಬಬೇಕಾಗಿಲ್ಲ. ಯಾಕಂದ್ರೆ ನಾನು ಮೊದಲೇ ಹೇಳಿದ ಹಾಗೆ ವಿಮರ್ಶಕ ಅಲ್ಲ ಬರೇ ಓದುಗ ಅಷ್ಟೇ..

 

ರಾಯಭಾಗದ ರಹಸ್ಯ ರಾತ್ರಿಯ ಕಥೆಗಳಲ್ಲಿ ಹೆಚ್ಚಿನವು ಮೊದಲೇ ಓದಿದ್ದೆ. ಕೆಲವು ಹಳೆಯ ಕಥೆಗಳು ನಾ ಓದಿಲ್ಲದೆ ಇರುವಂತವುಗಳು ಖುಶಿ ಕೊಟ್ಟವು. ಎಡಕು ಮೇರಿಯ ರೈಲ್ವೇ ಸುರಂಗದ ಕಥೆ ತೇಜಸ್ವಿಯವರ ಬರಹದಂತೆ ರಸವತ್ತಾಗಿತ್ತು. ಆಗುಂಬೆಯ ಕಥೆ ಕೂಡಾ ಚೆನ್ನಾಗಿತ್ತು( ಕಥೆಯ ಹೆಸರುಗಳು ನೆನಪಿಲ್ಲ. ಇದನ್ನು ಬರೆಯುವಾಗ ಆ ಪುಸ್ತಕ ನನ್ನೆದುರಿಗಿಲ್ಲ. ಕ್ಷಮೆ ಇರಲಿ). ಇದೇ ಮಾತನ್ನು ಇಲ್ಲಿನ ಎಲ್ಲಾ ಕತೆಗಳ ಬಗ್ಗೆ ಹೇಳಲು ಬರುವಂತಿದ್ದಿದ್ದರೆ ಇನ್ನೂ ಚೆನ್ನಾಗಿರ್ತಿತ್ತು

 

ಇನ್ನು ಪ್ರತಿಗಳು ಮುಗಿದು ಬಹು ಕಾಲದ ನಂತರ ಮರುಮುದ್ರಣದ ಸೌಭಾಗ್ಯ ಕಂಡ ಬೆಳಗೆರೆಯ ಒಮರ್ಟಾ ಅರ್ಧ ಓದಿ ಆಯ್ತು. ಇಡೀ ಕತೆ ಬೆಂಗಳೂರಿನ ಭೂಗತ ಲೋಕದ ಸುತ್ತ ಗಿರಕಿ ಹೊಡೆಯುತ್ತದೆ. ಓದೋಕಂತೂ ತುಂಬಾ ರುಚಿಕಟ್ಟಾಗಿದೆ. ಪೂರ್ತಿ ಓದಿದ ಮೇಲೆ ಇದರ ಬಗ್ಗೆ ಇನ್ನೂ ಸವಿಸ್ತಾರವಾಗಿ ಬರೆದೇನು.

 

ಮತ್ತೆ ನೀವು ಹೊಸತಾಗಿ ಏನೇನು ಓದಿದ್ರ್ರಿ?

ಇತ್ತೀಚೆಗೆ ಒಂದು ಒಳ್ಳೆಯ ಪುಸ್ತಕ ಓದಲು ಸಿಕ್ಕಿತ್ತು. ಪೇರೂರು ಜಾರು ಅವರು ಬರೆದಿರುವ ನಿಜಗನ್ನಡ ಅನ್ನುವ ಕೃತಿ. ನಮ್ಮ ಬರಹಗಳಲ್ಲಿ ನಮಗೆ ಗೊತ್ತಿಲ್ಲದ ಹಾಗೆ ಎಷ್ಟು ತಪ್ಪುಗಳು ನುಸುಳಿರುತ್ತವೆ (ಬೆರಳಚ್ಚು ದೋಷಗಳನ್ನು ಹೊರತುಪಡಿಸಿ) ಅನ್ನುವುದು ಇದನ್ನು ಓದಿದ ಮೇಲೆ ಗೊತ್ತಾಯ್ತು. ಯಾವ ಶಬ್ದ ಸರಿ, ಅದು ಯಾಕೆ ಸರಿ, ಯಾವ ಪ್ರಭಾವದಿಂದ ಅಥವ ಕಾರಣದಿಂದ ತಪ್ಪಾದ ರೂಪ ಹುಟ್ಟಿಕೊಂಡಿದೆ… ಇವೆಲ್ಲವನ್ನು ಸೂಕ್ತ ಉದಾಹರಣೆಗಳೊಂದಿಗೆ ಸೊಗಸಾಗಿ ತಿಳಿಸಿದ್ದಾರೆ. ಕನ್ನಡದಲ್ಲಿ ಬರೆಯುವವರೆಲ್ಲರೂ ಅಗತ್ಯವಾಗಿ ಓದಲೇಬೇಕಾದ ಪುಸ್ತಕ. ಆದರೆ ಇದು ಪ್ರಕಟವಾಗಿ ಬಹಳ ಕಾಲ ಆಗಿರುವುದರಿಂದ ಪುಸ್ತಕ ಮಳಿಗೆಗಳಲ್ಲಿ ಇನ್ನೂ ಸಿಗುವುದೋ ಇಲ್ಲವೋ ಗೊತ್ತಿಲ್ಲ. ಸಿಕ್ಕಿದರೆ ಖಂಡಿತ ಕೊಂಡು ಓದಿ.

 

ಕೆಲವು ಸರಿ-ತಪ್ಪು ಪ್ರಯೋಗಗಳ ಬಗ್ಗೆ ಮಾಹಿತಿಯನ್ನು ಆ ಪುಸ್ತಕದಿಂದ ಹೆಕ್ಕಿ ನಿಮ್ಮ ಮುಂದೆ ಇರಿಸುತ್ತಿದ್ದೇನೆ….ನಿಮಗಾಗಿ…ಮತ್ತು ನನಗಾಗಿ ಕೂಡ! ಇನ್ನು ಮುಂದೆ ನನ್ನ ಬರಹಗಳಲ್ಲಿ ಈ ತಪ್ಪುಗಳು ಆದಷ್ಟು ಕಡಿಮೆ ಆಗಲಿವೆ ಅನ್ನುವ ಭರವಸೆಯೊಂದಿಗೆ….

 

ತಪ್ಪು ಪ್ರಯೋಗ                                          ಸರಿಯಾದ ರೂಪ

 

ನೆನೆಗುದಿಗೆ ಬಿದ್ದಿದೆ                                        ನನೆಗುದಿಗೆ ಬಿದ್ದಿದೆ

 

ಉಚ್ಛ                                                      ಉಚ್ಚ

 

ಅಂತಾರಾಷ್ಟ್ರೀಯ                                         ಅಂತರರಾಷ್ಟ್ರೀಯ

 

ಅಂತರ್ಜಾಲ                                              ಅಂತರಜಾಲ

 

ಜನರು                                                     ಜನ

 

ಮೆಟ್ಟಲು                                                   ಮೆಟ್ಟಿಲು

 

ಗಿಡಗಂಟೆ                                                  ಗಿಡಗಂಟಿ  ( ಗಿಡ + ಕಂಟಿ )

 

ಬಂದ್ಲು                                                     ಬಂದ್ಳು / ಬಂದಳು

 

ಹಠ                                                        ಹಟ

 

ಭತ್ತ                                                        ಬತ್ತ

 

ಗಾಭರಿ                                                    ಗಾಬರಿ

 

ಒಂಭತ್ತು                                                   ಒಂಬತ್ತು

 

ನೋಡುತ್ತಾ *                                             ನೋಡುತ್ತ

 

ಎಲ್ಲಾ *                                                    ಎಲ್ಲ

 

ಕೂಡಾ *                                                  ಕೂಡ

 

ಮೊಟ್ಟ ಮೊದಲು *                                      ಮೊತ್ತ ಮೊದಲು

 

ವಿನಃ , ವಿನಹ *                                           ವಿನಾ

 

ಜತೆ                                                       ಜೊತೆ

 

ಉಡಿಗೆ                                                    ಉಡುಗೆ  

 

ಅಡಿಗೆ                                                     ಅಡುಗೆ

 

ಯೌವ್ವನ                                                  ಯವ್ವನ / ಯೌವನ

 

ಬರ್ತಾಯಿದೆ                                               ಬರ್ತಿದೆ / ಬರುತ್ತಿದೆ

 

ಘಂಟೆ                                                     ಗಂಟೆ

 

ನಡುಗೆ                                                    ನಡಿಗೆ

 

ಒಂಥರ *                                                  ಒಂತರ   

 

ನಿಶ್ಯಬ್ಧ                                                     ನಿಶ್ಶಬ್ಧ / ನಿಶಬ್ಧ                              

 

ನಿಶ್ಯಕ್ತಿ                                                     ನಿಶ್ಶಕ್ತಿ / ನಿಶಕ್ತಿ

 

ಧಾಳಿ                                                      ದಾಳಿ

 

ಬ್ರಹ್ಮಾಚಾರಿ                                               ಬ್ರಹ್ಮಚಾರಿ

 

ನೆನ್ನೆ                                                       ನಿನ್ನೆ

 

ಹಿಂದೂಸ್ಥಾನ                                              ಹಿಂದೂಸ್ತಾನ

 

ಆಶೆ                                                       ಆಸೆ

 

ಇಂಥಾ *                                                  ಇಂಥ

 

(* – ಈ ತಪ್ಪು ನಾನು ಅನೇಕ ಬಾರಿ ಮಾಡಿದ್ದೇನೆ L)

 

ಇದರ ಜೊತೆಯಲ್ಲಿ ನನ್ನದೊಂದು ಸಂಶಯವಿದೆ. ಪೂರ್ವಗ್ರಹ ಪದ ಸರಿಯೆ ಅಥವ ಪೂರ್ವಾಗ್ರಹ ಸರಿಯೆ? ಗೊತ್ತಿರುವವರು ಸಮರ್ಪಕ ವಿವರಣೆ ಸಹಿತ ತಿಳಿಸುವಿರಾ?

 

 

 

 

 

ಉತ್ತರಕನ್ನಡ ಜಿಲ್ಲೆಗೂ ಸಣ್ಣಕತೆಗಳಿಗೂ ಅದೆಂತಹ ಅನ್ಯೋನ್ಯವೋ ಗೊತ್ತಿಲ್ಲ. ಆ ಜಿಲ್ಲೆಯ ಸೌಂದರ್ಯ, ಕಡಲು, ಘಟ್ಟ, ಮಲೆನಾಡಿನ ಮಾಧುರ್ಯವನ್ನೆಲ್ಲಾ ಹೀರಿಕೊಂಡುಬಿಟ್ಟವರಂತೆ ಇಲ್ಲಿನ ಕತೆಗಾರರು ಕತೆಗಳ ಅದ್ಭುತಲೋಕವನ್ನೇ ಕಟ್ಟಿಕೊಟ್ಟಿದ್ದಾರೆ; ಕೊಡುತ್ತಲೇ ಇದ್ದಾರೆ. ಆ ನೆಲದ ಮಣ್ಣಿನ ಸಾರದಲ್ಲಿ ಹುಲುಸಾಗಿ ಬೆಳೆದು ತೆನೆಗಟ್ಟುವ ಕತೆಗಳಿಂದಾಗಿ, ಅಲ್ಲಿನ ಪರಿಸರದಲ್ಲಿ ಮೊಗೆದಷ್ಟೂ ಬರಿದಾಗದ ಕತೆಗಳ ಕಣಜವೇ ಇರಬೇಕು. ಈ ಮಾತಿನಲ್ಲಿ ಯಾವ ಅತಿಶಯೋಕ್ತಿಯೂ ಇಲ್ಲವೆಂದು ನಿಮಗೆ ಮನವರಿಕೆಯಾಗಬೇಕಿದ್ದರೆ ಯಶವಂತ ಚಿತ್ತಾಲರ – ಕುಮಟೆಗೆ ಬಂದಾ ಕಿಂದರ ಜೋಗಿ, ಪುಟ್ಟನ ಹೆಜ್ಜೆ ಕಾಣೋದಿಲ್ಲ, ಜಯಂತ ಕಾಯ್ಕಿಣಿ ಬರೆದ – ತೆರೆದಷ್ಟೇ ಬಾಗಿಲು, ದಗಡೂ ಪರಬನ ಅಶ್ವಮೇಧ, ಅಮೃತಬಳ್ಳಿ ಕಷಾಯ, ಬಣ್ಣದ ಕಾಲು, ತೂಫಾನ್ ಮೇಲ್, ವಿವೇಕ್ ಶಾನುಬಾಗ್‌ರವರ – ಮತ್ತೊಬ್ಬನ ಸಂಸಾರ, ಹುಲಿಸವಾರಿ, ಲಂಗರು, ಅಶೋಕ ಹೆಗಡೆಯವರ – ಒಂದು ತಗಡಿನ ಚೂರು, ಒಳ್ಳೆಯವನು, ವಾಸನೆ ಬಣ್ಣ ಶಬ್ದ ಇತ್ಯಾದಿ, ಭಾಗೀರಥಿ ಹೆಗಡೆ ಬರೆದ ಗಿಳಿಪದ್ಮ, ಚಿಂತಾಮಣಿ ಕೊಡ್ಲೆಕೆರೆಯವರ – ಬಬ್ರುವಾಹನ ಎಂಬ ಇರುವೆ, ಮಹಾಬಲಮೂರ್ತಿ ಕೊಡ್ಲೆಕೆರೆ ಬರೆದ – ಯಕ್ಷಸೃಷ್ಟಿ, ಇತಿಹಾಸದ ನಂತರ, ಉಲ್ಲಾಸ ಹೆಗಡೆಯವರ – ಹಲವಾರು ಕಲರವಗಳ ಊರಗಾಥೆ… ಅಬ್ಬಾ… ಹೀಗೆ ತುದಿಮೊದಲಿಲ್ಲದಷ್ಟು ಉದ್ದಕ್ಕೆ ಬೆಳೆಯುವ ಈ ಪಟ್ಟಿಯಲ್ಲಿನ ಕತೆಗಾರರ ಕಥಾಸಂಕಲನಗಳನ್ನು ಒಮ್ಮೆ ಓದಿ ನೋಡಿ. ಆ ಕತೆಗಳು ಸೃಷ್ಟಿಸುವ ಮಾಯಲೋಕದಲ್ಲಿ ಎಲ್ಲೋ ಕಳೆದುಹೋಗಿಬಿಡುತ್ತೀರಿ. ಈ ಸಾಲಿಗೆ ಇತ್ತೀಚೆಗೆ ಸೇರ್ಪಡೆಯಾದ ಸುನಂದಾ ಪ್ರಕಾಶ್ ಕಡಮೆ ತಮ್ಮ ಪುಟ್ಟ ಪಾದದ ಗುರುತು ಕಥಾಸಂಕಲದ ಮೂಲಕ ಬಹುದೊಡ್ಡ ಹೆಜ್ಜೆಯನ್ನೇ ಇಟ್ಟಿದ್ದರು. ಇದೀಗ ಅವರ ಎರಡನೇ ಕಥಾಸಂಕಲನ ಗಾಂಧಿ ಚಿತ್ರದ ನೋಟು ಹೊರಬಂದಿದ್ದು, ಸೊಗಸಾಗಿ ಕತೆ ಹೇಳುವ ತಮ್ಮ ಬರಹದ ಸೊಗಸನ್ನು ಇಲ್ಲಿಯೂ ಜಾರಿಯಲ್ಲಿಟ್ಟಿದ್ದಾರೆ.

 

ದಿನನಿತ್ಯದ ಬದುಕಿನೊಳಗೆ ಇಣುಕಿ ನೋಡುತ್ತ, ಅಲ್ಲಿನ ಘಟನೆಗಳಲ್ಲಿ ಸ್ವಾರಸ್ಯ ಹುಡುಕಿ ಅವುಗಳ ಸುತ್ತ ಕತೆ ಹೆಣೆಯುವ ಸುನಂದಾರವರ ಕತೆಗಳಲ್ಲಿ ಸರಳತೆಯಿದೆ. ಸಿಕ್ಕಾಪಟ್ಟೆ ಪ್ರತಿಮೆ, ರೂಪಕಗಳ ಭಾರಕ್ಕೆ ನಲುಗದೆ ಹೇಳಬೇಕಾದ್ದನ್ನು ಜಿಡುಕಾಗದಂತೆ ಹೇಳುವ ಅವರ ಕತೆಗಳು ಸರಾಗವಾಗಿ ಓದಿಸಿಕೊಂಡು ಹೋಗುತ್ತವೆ. ಈ ಕಾರಣಕ್ಕೇ ಹೆಚ್ಚು ಜನಕ್ಕೆ ಇಷ್ಟವಾಗುತ್ತವೆ. ನಮ್ಮ ಸುತ್ತಮುತ್ತಲಿಂದೆದ್ದು ಬರುವ ಕತೆಗಳು ನಮ್ಮದೇ ಅನ್ನಿಸುತ್ತವೆ ಆಪ್ತವಾಗುತ್ತವೆ.  ಪತ್ರೊಡೆ, ಗಾಂಧಿ ಚಿತ್ರದ ನೋಟು, ನಿನ್ನದೊಂದು ನೋಟ ಬೇಕು… ಮುಂತಾದ ಸೊಗಸಾದ ಕತೆಗಳನ್ನು ಒಳಗೊಂಡಿರುವ ಈ ಸಂಕಲನದಲ್ಲಿ ಕೋಲು ಸಂಪಿಗೆ ಮರ, ಚೌಕ ಮತ್ತು ಗೋಲ, ಅಪ್ಪಿ, ತಂಕಿ ಮೊದಲಾದ ತಮ್ಮ ಎಂದಿನ ಶೈಲಿಗಿಂತ ವಿಭಿನ್ನವಾಗಿ ಬರೆದ ಕತೆಗಳೂ ಇವೆ. ಕತೆಗಳ ವಿಮರ್ಶೆಯನ್ನು ಮಾಡಲು ನಂಗೆ ಬರೋಲ್ಲ. ಆದರೂ ಇಷ್ಟು ಮಾತ್ರ ಹೇಳಬಲ್ಲೆ.. ಮತ್ತೆ ಮತ್ತೆ ಓದಿ ಚಪ್ಪರಿಸಬಹುದಾದಂತಹ ಕೆಲವು ಸೊಗಸಾದ ಕತೆಗಳನ್ನು ಒಳಗೊಂಡ ಈ ಸಂಕಲನ ನಿಮ್ಮ ಸಂಗ್ರಹದಲ್ಲಿ ತಪ್ಪದೇ ಇರಬೇಕಾದಂತದ್ದು. ಪುಸ್ತಕದ ಬೆಲೆ ಸ್ವಲ್ಪ ಜಾಸ್ತಿನೇ ಅನ್ನಿಸಿದ್ರೂ ಕತೆಗಳು ಕೊಡೋ ಕುಶಿಯ ಮುಂದೆ ಅದ್ಯಾವ ಮಹಾ ಬಿಡಿ.

 

ಪುಸ್ತಕ      : ಗಾಂಧಿ ಚಿತ್ರದ ನೋಟು

ಲೇಖಕಿ     : ಸುನಂದಾ ಪ್ರಕಾಶ ಕಡಮೆ

ಪ್ರಕಾಶನ    : ಅಕ್ಷರ ಪ್ರಕಾಶನ , ಹೆಗ್ಗೋಡು

ಪುಟಗಳು    : ೯೬

ಬೆಲೆ        : ಎಪ್ಪತ್ತು ರೂಪಾಯಿಗಳು

ಬರಹಗಾರನೊಬ್ಬನ ಮನಸ್ಸಿನ ಆಂದೋಳನದ ಹಾದಿಯಲ್ಲಿ ಜೋಗಿ-ಜಂಗಮನಂತೆ ಸುತ್ತಿ ಸುಳಿವ ಅವನ ಮನೋಲಹರಿಯ ಗೊಂದಲ-ದ್ವಂದ್ವ-ತಳಮಳ-ಜಿಜ್ಞಾಸೆಗಳ ಜಾಡು ಹಿಡಿಯುತ್ತಾ ಯಾಮಿನಿ ಬಂದಿದ್ದಾಳೆ. ಜೋಗಿಯ ಬರಹಗಳ ವಿಶೇಷತೆ ಅಂದ್ರೆ ಕಥೆಯೊಳಗೊಂದು ಕಥೆಯ ತರಹದ ಪುಟ್ಟ-ಪುಟ್ಟ ಅಧ್ಯಾಯಗಳ ಈ ಪುಟ್ಟ ಕಾದಂಬರಿಯನ್ನು ಕಥಾ ಸಂಕಲನ ಅಂದ್ಕೊಂಡು ಬೇಕಿದ್ರೆ ಓದಬಹುದು. ಪ್ರತಿ ಅಧ್ಯಾಯವೂ ಒಂದು ಸಣ್ಣ ಕಥೆಯೊಂತಿದೆ. ಆ ಅಧ್ಯಾಯಗಳಿಗೆ ಬಹುತೇಕ ಜನಪ್ರಿಯ ಕವನಗಳ ಸಾಲುಗಳನ್ನು ತಲೆಬರಹವಾಗಿ ಬಳಸಿದ್ದು ಮಾತ್ರವಲ್ಲದೆ ಆ ಅಧ್ಯಾಯದ ಅರ್ಥವನ್ನು ಬಿಂಬಿಸುವಂತೆ ಅದನ್ನು ಆರಿಸಿರುವುದು ಕೂಡಾ ಮೆಚ್ಚಿಕೊಳ್ಳಲೇಬೇಕು.

 

ಚಿರಾಯು ಎಂಬ ಜನಪ್ರಿಯ ಲೇಖಕನಿಗೆ ಅತಿ ಕಿರಿಯ ವಯಸ್ಸಿನಲ್ಲೇ ಜ್ಞಾನಪೀಠ ಪ್ರಶಸ್ತಿ ಬಂದಿರುತ್ತೆ. ಅವನಿಗೆ ಭಾರಿ ಮೊತ್ತದ ಆಮಿಶವೊಡ್ಡಿ ಅವನಿಂದ ಕಾದಂಬರಿಯೊಂದನ್ನು ಬರೆಯಿಸಲು ಪ್ರಕಾಶಕ ಕಂಪೆನಿಯೊಂದು ನಿರ್ಧರಿಸುತ್ತದೆ. ಅದನ್ನು ಒಪ್ಪಿಕೊಂಡು ಬರೆಯಲು ಕುಳಿತ ಚಿರಾಯುವಿನ ಚಿತ್ತಪಟದಲ್ಲಿ ನಡೆಯುವ ವ್ಯಾಪಾರಗಳನ್ನು ಬಿಚ್ಚಿಡುತ್ತಾ ಸಾಗುವ ಈ ಕಥೆಯ ಹಾದಿಯಲ್ಲಿ ಸರಸ್ವತಿ, ರೋಹಿಣಿ, ಊರ್ಮಿಳಾ, ಶ್ರದ್ಧಾ ಹೀಗೆ ಅವನ ಬದುಕಿನ ವಿವಿಧ ಕಾಲಘಟ್ಟಗಳಲ್ಲಿ ಮುಖಾಮುಖಿಯಗಿ ಅವನ ಕಥೆಯ ಪಾತ್ರಗಳಾಗಿ ಹೋಗುತ್ತಾರೆ. ಚಿರಾಯುವನ್ನು ಟೀಕಿಸುತ್ತಲೇ ಮೆಚ್ಚಿಕೊಳ್ಳುವ ಯಾಮಿನಿ ಒಂದರ್ಥದಲ್ಲಿ ಅವನ ಸಾಕ್ಷಿಪ್ರಜ್ಞೆಯ ಭಾಗವೇ ಆಗಿರುತ್ತಾಳೆ. ಜಗತ್ತಿಗೆ ಬೇರೆಯೆ ಆಗಿ ಕಾಣಿಸುವ ಚಿರಾಯು ಯಾಮಿನಿಯ ಎದುರು ತೆರೆದ ಪುಸ್ತಕದಂತೆ; ಯಾಮಿನಿ ಅವನ ಪಾಲಿಗೆ ಅವನೊಳಗನ್ನು ಅವನಿಗೇ ಕಾಣಿಸುವ ಕನ್ನಡಿಯಂತೆ.

 

ಈ ಕಾದಂಬರಿಯುದ್ದಕ್ಕೂ ಬರುವ ಚಿರಾಯುವಿನ ಚಿಂತನೆಯ ಝಲಕ್ ನೋಡಿ – ಬರೀ ಮಾಹಿತಿಯನ್ನು ತುಂಬಿಸಿಟ್ಟರೆ ಅದು ಕಲಾಕೃತಿಯಾಗದು. ತನ್ನ ತಿಳುವಳಿಕೆ, ಅರಿವಿನಿಂದ ಆ ಬರಹಕ್ಕೊಂದು ಒಳನೋಟ, ಬೆರಗು ಇದ್ದಾಗಲಷ್ಟೇ ಆ ಕೃತಿಗೊಂದು ಮೌಲ್ಯ ಬರುತ್ತದೆ ಅನ್ನುವ ಯೋಚನೆ ಮಾಡುತ್ತಾ ಕುವೆಂಪು, ಲಂಕೇಶ್ ಬರಹದ ಎದುರು ಕಾರಂತರ ಕಾದಂಬರಿ ಕಾದಂಬರಿ ಕಂಡದ್ದನ್ನು ಕಂಡ ಹಾಗೆ ಬರೆಯುವ ಡಾಕ್ಯುಮೆಂಟರಿ ತರಹ ಕಾಣಿಸಿ ಸಪ್ಪೆ ಆನ್ನಿಸಿಕೊಳ್ಳುತ್ತದೆ.

 

ದಿನೇದಿನೇ ಸಂಕೀರ್ಣವಾಗುವ ಬದುಕು, ಅದರಲ್ಲಿನ ಸಂಬಂಧಗಳ ಜಿಡುಕು ಹೀಗೆ ತಮ್ಮ ಪಾತ್ರಗಳ ಮೂಲಕವೇ ಇವೆಲ್ಲವನ್ನು ಹೇಳುತ್ತಾ ಹೋಗುವ ಯಾಮಿನಿ ಆಪ್ತವಾಗುತ್ತಾಳೆ. ಇನ್ನು ನೀವುಂಟು…. ನಿಮ್ಮ ಯಾಮಿನಿಯುಂಟು…. ಓದುವ ಸುಖ ನಿಮ್ಮದಾಗಲಿ.

 

ಪುಸ್ತಕ                               : ಯಾಮಿನಿ ( ಕಾದಂಬರಿ )

ಲೇಖಕರು                         : ಜೋಗಿ

ಬೆಲೆ                                 :  80 ರೂ.

ಪುಟಗಳು                           114

ಪ್ರಕಾಶನ್                          ಅಂಕಿತ ಪ್ರಕಾಶನ, ಗಾಂಧಿಬಜಾರ್