Posts Tagged ‘ಕುಂದಾಪ್ರ’

ಹೀಗೊಂದು ಮಾತು ನಮ್ ಕುಂದಾಪ್ರ ಕಡೆ ಇದೆ – ಕಲ್ತ್‌ದ್ ಹೆಚ್ಚಾಯ್ತ್ ಕಾಲ್ ಮೇಲಾಯ್ತ್…ಗಾಳಿ ಬರ್ಕ್ ಮನಿಗ್ ಹೋಯ್ಕ್. ಇದರ ಮೊದಲ ಭಾಗ ನೀವೂ ಕೇಳಿರಬಹುದು. ಆದರೆ ಈ ಮಾತಿಗೂ ಹಿನ್ನೆಲೆಯಾಗಿ ಒಂದು ಕತೆಯೋ ಕಟ್ಟು ಕತೆಯೋ ಇರಬೇಕಲ್ವೇ? ಈ ಮಾತನ್ನು ಯಾವ ಅರ್ಥದಲ್ಲಿ ಉಪಯೋಗಿಸುತ್ತಾರೆ ಅಂತ ಗೊತ್ತಿದ್ದರೂ ಕೂಡಾ ಇದರ ಹಿಂದಿನ ಕತೆ ಗೊತ್ತಿರಲಿಲ್ಲ. ಮೊನ್ನೆ ಒಂದು ಹಾಸ್ಯ ಯಕ್ಷಗಾನ ಪ್ರಸಂಗ ಕೇಳ್ತಾ ಇದ್ದೆ. ಅದರಲ್ಲಿನ ಪಾತ್ರಧಾರಿಯೊಬ್ಬರು ಸಂದರ್ಭೋಚಿತವಾಗಿ ಈ ಮಾತನ್ನು ಬಳಸಿದಾಗ ಅದರ ಹಿನ್ನೆಲೆಯನ್ನು ಕೂಡಾ ವಿವರಿಸಿದರು.

ಕಥೆಯ ಮೂಲ ಹೀಗಿದೆಯಂತೆ

ಒಬ್ಬನಿಗೆ ಒಮ್ಮೆ ಎರಡೂ ಕಾಲಿಗೆ ಏಟು ಬಿದ್ದು ನಡೆಯೋಕೆ ಸಾಧ್ಯ ಆಗ್ತಾ ಇರ್ಲಿಲ್ಲವಂತೆ. ಎರಡು ಕೋಲುಗಳ ಸಹಾಯದಿಂದ ಅವನು ನಡೆಯುತ್ತಿದ್ದನಂತೆ. ಹೀಗೆ ಒಮ್ಮೆ ಸುತ್ತಾಡೋಕೆ ಅಂತ ಅವನು ಕೋಲಿನ ಆಸರೆಯಲ್ಲಿ ನಡೆದು ಹೋಗ್ತಾ ಇದ್ನಂತೆ. ದಾರೀಲಿ ಅವನೊಂದು ಮಾವಿನ ಮರ ನೋಡಿದ. ಮಾವಿನ ಹಣ್ಣಿನ ಸೀಸನ್. ನೋಡ್ತಾನೆ ಒಳ್ಳೇ ರಸಭರಿತ ಹಣ್ಣುಗಳು. ಹಣ್ಣು ತಿನ್ನೋಕೆ ಆಸೆಯಾಯ್ತು. ಆದ್ರೆ ಏನು ಮಾಡೋದು ಸುತ್ತಮುತ್ತ ಯಾವ ಕಲ್ಲೂ, ಕೋಲೂ ಇರಲಿಲ್ಲ. ಸರಿ ಇನ್ನೇನು ಮಾಡೋದು ಅಂತ ತನ್ನ ಆಸರೆಗಿಟ್ಟುಕೊಂಡಿದ್ದ ಕೋಲನ್ನೇ ಹಣ್ಣಿಗೆ ಗುರಿಯಿಟ್ಟು ಹೊಡೆದನಂತೆ. ಅವನ ದುರಾದೃಷ್ಟಕ್ಕೆ ಅದು ಮರದಲ್ಲೇ ಸಿಕ್ಕಿಹಾಕಿಕೊಂದಿತು. ಇಲ್ಲೇ ಅವನ ಅತೀ ಬುದ್ಧಿವಂತಿಕೆ ಕೆಲಸ ಮಾಡೋದು.(ಕಲ್ತದ್ ಹೆಚ್ಚಾದದ್). ಹೋಗ್ಲಿ ಅಂತ ಒಂದು ಕೋಲೂರಿಕೊಂಡು ಸುಮ್ನೆ ಮನೆಗೆ ಹೋಗ್ಬೇಕಾ ಬೇಡ್ವಾ. ಅವ್ನು ಅದನ್ನು ಬಿಟ್ಟು, ಸಿಕ್ಕಿಕೊಂಡ ಕೋಲು ಉದುರಿಸಲು ತನ್ನ ಕೈಲಿದ್ದ ಇನ್ನೊಂದು ಕೋಲು ಎಸೆದನಂತೆ. ಅವನ ಗ್ರಾಚಾರಕ್ಕೆ ಅದೂ ಮರದ ಮೇಲೆ ಸಿಕ್ಕಿ ಬೀಳಬೇಕೆ. ಹಾಗಾಗಿ ಅವನ ಎರಡೂ ಕಾಲು ಮರದ ಮೇಲೆ ಸಿಕ್ಕಿ ಬದ್ದ ಹಾಗಾಯ್ತು ( ಕಾಲ್ ಮೇಲಾಯ್ತ್) .ಈಗ ಅವನಿಗೆ ಉಳಿದದ್ದು ಒಂದೇ ದಾರಿ, ಜೋರಾಗಿ ಗಾಳಿ ಬೀಸಿ ಕೋಲು ಉದುರುತ್ತಾ ಅಂತ ಕಾಯೋದು. ಗಾಳಿ ಬಂದು ಕೋಲು ಬಿದ್ದರಷ್ಟೇ ಅವನು ಕೋಲೂರಿಕೊಂಡು ಮನೆಗೆ ಹೋಗೋಕೆ ಸಾಧ್ಯ. ( ಗಾಳಿ ಬರ್ಕ್ ಮನಿಗ್ ಹೋಯ್ಕ್). ಅದಕ್ಕೇ ಬಂದಿದ್ದಂತೆ ಈ ಮಾತು…

ಇದು ಯಕ್ಷಗಾನ ಪಾತ್ರಧಾರಿಯು ಮಾತಿನ ಚಾಲಾಕಿತನದಲ್ಲಿ ಹೆಣೆದ ಕಥೆಯೋ ಅಥವಾ ಇದೇ ಇದರ ನಿಜವಾದ ಹಿನ್ನೆಲೆಯೋ ನಂಗೂ ಗೊತ್ತಿಲ್ಲ. ಆದರೆ ಕಥೆಯಂತು ಈ ಮಾತಿನ ಹಿಂದಿರುವ ಅರ್ಥಕ್ಕೆ ಸಮನಾಗಿಯೇ ಇದೆ.

ನಾನು ಚಿಕ್ಕವನಿದ್ದಾಗ ಕೇಳಿದ ಒಂದು ಪದ್ಯ ಇದು. ಇದು ಬಾಯಿಂದ ಬಾಯಿಗೆ ಹರಿದು ಬರುವಾಗ ಇದರ ರೂಪದಲ್ಲಿ ಅನೇಕ ಬದಲಾವಣೆಗಳಾಗಿರಬಹುದು. ಚಿಕ್ಕ ಮಕ್ಕಳಲ್ಲಿ ಕುತೂಹಲ, ಆಸಕ್ತಿ ಕೆರಳಿಸುವ, ನೆನಪಿನ ಶಕ್ತಿಯನ್ನು ಉತ್ತಮ ಪಡಿಸಿಕೊಳ್ಳಲು ನೆರವಾಗುವ ಈ ಪದ್ಯ ಯಾರು ಸೃಷ್ಟಿಸಿದ್ದೋ ಗೊತ್ತಿಲ್ಲ. ನನಗೆ ಚಿಕ್ಕಂದಿನಲ್ಲಿ ಕೇಳಿದ್ದು ಇನ್ನೂ ಬಾಯಿಪಾಠ ಇದೆ.

 

ಈ ಪದ್ಯದಲ್ಲಿ ಸಿಂಡಿಕೇಟ್ ಬ್ಯಾಂಕು ಬರುತ್ತೆ. ಅದ್ಯಾವುದೋ ಕಮಲಾ ಸರ್ಕಸ್ ಅನ್ನೋ ಸರ್ಕಸ್ ಬರುತ್ತೆ. ಹಾಗೆಯೇ ಬಡ್ಡಿ ಕಮಲ ಅನ್ನೋ ಹೆಂಗಸಿನ ಪ್ರಸ್ತಾಪವೂ ಬರುತ್ತೆ. ಯಾರೀಕೆ ಕಮಲ? ಆಕೆ ಬಡ್ಡಿ ವ್ಯವಹಾರ ಮಾಡ್ತಾ ಇದ್ದಳಾ? ಯಾವೂರಿನವಳು? ಅದ್ಯಾವುದು ಕಮಲಾ ಸರ್ಕಸ್? ಅದು ಈಗಲೂ ಇದ್ಯಾ? ಈ ಹಾಡು ರಚಿತವಾದ ಕಾಲ ಯಾವುದಿರಬಹುದು? ಯಾರಿದನ್ನು ಬರೆದಿರಬಹುದು..ಇದು ಜನರ ಬಾಯಿಂದ ಬಾಯಿಗೆ ಹೀಗೆ ಹರಿದು ಬಂತೆ..? ಹೀಗೆ ಅನೇಕ ಪ್ರಶ್ನೆಗಳು ಹುಟ್ಟುತ್ತವೆ. ಬಹುಶಃ ನಮ್ಮೂರು ಕುಂದಾಪ್ರ-ಉಡುಪಿ ಕಡೆಯ ಪದ್ಯ ಇರಬೇಕು ಅನ್ನೋದು ನನ್ನ ಊಹೆ. ಕೊನೆಯಲ್ಲಿ ದೇಶಪ್ರೇಮದ ಒಂದು ಝಲಕ್ ಕೂಡಾ ಇದೆ. ನಿಮಗೇನಾದ್ರೂ ಈ ಕುರಿತು ಗೊತ್ತಿದ್ರೆ ಹೇಳಿ…ಇಲ್ಲವಾದ್ರೂ ಹಾಡನ್ನಂತೂ ಓದಿ ಖುಶಿ ಪಡಲು ಅಡ್ಡಿಯಿಲ್ಲ.

 

ಮಗು ಮಗು ಪಾಠ ಕಲಿ..

ಯಾವ ಪಾಠ?

ಕೃಷ್ಣ ಪಾಠ

ಯಾವ ಕೃಷ್ಣ?

ಬಾಲ ಕೃಷ್ಣ

ಯಾವ ಬಾಲ?

ಕುದುರೆ ಬಾಲ

ಯಾವ ಕುದುರೆ?

ಸರ್ಕಸ್ ಕುದುರೆ

ಯಾವ ಸರ್ಕಸ್?

ಕಮಲಾ ಸರ್ಕಸ್

ಯಾವ ಕಮಲಾ?

ಬಡ್ಡಿ ಕಮಲ

ಯಾವ ಬಡ್ಡಿ?

ಬ್ಯಾಂಕಿನ ಬಡ್ಡಿ

ಯಾವ ಬ್ಯಾಂಕು?

ಸಿಂಡಿಕೇಟ್ ಬ್ಯಾಂಕು

ಯಾವ ಸಿಂಡಿ?

ಭಟ್ಟರ ಸಿಂಡಿ

ಯಾವ ಭಟ್ಟರು?

ಪೂಜೆ ಭಟ್ಟರು

ಯಾವ ಪೂಜೆ?

ಗಣಪನ ಪೂಜೆ

ಯಾವ ಗಣಪ?

ಸೊಂಡಿಲ ಗಣಪ

ಯಾವ ಸೊಂಡಿಲು?

ಆನೆ ಸೊಂಡಿಲು

ಯಾವ ಆನೆ?

ಕಾಡು ಆನೆ

ಯಾವ ಕಾಡು?

ನಮ್ಮ ಕಾಡು

ಯಾವ ನಮ್ಮ?

ನಮ್ಮ ದೇಶ ನಮ್ಮ

ಯಾವ ದೇಶ?

ಭಾರತ ದೇಶ

ಯಾವ ಭಾರತ?

ನಮ್ಮ ಭಾರತ

 

 

ನಾವೆಲ್ಲ ಚಿಕ್ಕವರಾಗಿದ್ದಾಗ ಅನೇಕ ಕಥೆ, ಗಾದೆ ಒಗಟು ಇವನ್ನೆಲ್ಲಾ ಕೇಳಿಯೇ ಇರುತ್ತೇವೆ. ಅವುಗಳಲ್ಲಿ ಕೆಲವು ಎಷ್ಟು ಕಾಲವಾದರೂ ಹಸಿ ಗೋಡೆಯಲ್ಲಿ ನೆಟ್ಟ ಹರಳಿನಂತೆ ಗಟ್ಟಿಯಾಗಿ ಮನಸ್ಸಿನಲ್ಲಿ ಅಂಟಿಕೊಂಡಿರುತ್ತವೆ. ಅಂಥಾ ಒಂದು ನೆನಪು ಈ ಸುಕ್ರನ ಕಥೆ. ನೀವು ಕುಂದಾಪ್ರ ಕಡೆಯವರಾಗಿದ್ರೆ ಕಂಡಿತಾ ಈ ಕಥೆ ಕೇಳೇ ಇರುತ್ತೀರಿ. ಇಲ್ಲವಾದಲ್ಲಿ ಕೂಡಾ ನಿಮ್ಮ ಕಡೆಯದೇ ಆದ ಇದಕ್ಕೆ ಹತ್ತಿರವಾದ ಕಥೆಯನ್ನಾದ್ರೂ ಕೇಳಿರಬಹುದು.

 

ಕಥೆ ಏನಪ್ಪಾ ಅಂದ್ರೆ …

 

ಸುಳ್ ಹೇಳೋ ಸುಕ್ರಾ ಅಂದ್ರೆ.. ವಾಟಿ ಅಂಡಿಯೊಳ್ಗೆ ಒಂಬತ್ ಆನಿ ಹೋಯಿ, ಮರಿಯಾನಿ ಬಾಲ ಸಿಕ್ಕಂಡ್ ಬಿದ್ದಿತ್ತ್ ಅಂದ ಅಂಬ್ರ್

 

ಇದು ಸುಳ್ಳು ಹೇಳುವುದರ ಪರಮಾವಧಿಯನ್ನು ಸೂಚಿಸುವ ಒಂದು ನುಡಿಕಟ್ಟು ಅಥವಾ ಕಟ್ಟು ಕಥೆ ಅನ್ನಬಹುದು. ಇದರ ಅರ್ಥ ಇಷ್ಟೇ.. ಸುಕ್ರ ಅನ್ನುವ ಒಬ್ಬ ಮಹಾ ಸುಳ್ಳುಗಾರನ ಹತ್ರ ಹೋಗಿ ಸುಳ್ಳು ಹೇಳಪ್ಪಾ ಅಂತ ಅಂದ್ರೆ.. ವಾಟೆ ಅಂಡೆಯ ( ಒಲೆ ಊದಲು ಬಳಸುವ ಬಿದಿರಿನ ಕೊಳವೆ… ಲೋಹದ ಕೊಳವೆ ಅಂತ ಬೇಕಾದ್ರೂ ಇಟ್ಟುಕೊಳ್ಳಬಹುದು) ಒಳಗೆ ಒಂಬತ್ತು ಆನೆಗಳು ತೂರಿ ಹೋಗಿ, ಮರಿಯಾನೆ ತೂರಿ ಹೋಗುವಾಗ ಅದರ ಬಾಲ ಸಿಕ್ಕಿ ಹಾಕಿಕೊಂಡಿತ್ತು ಅಂತಾ ಹೇಳಿದನಂತೆ. ಇಲ್ಲಿ ಸುಕ್ರನ ಸುಳ್ಳಿನ ಪವರ್ ಎಷ್ಟಿದೆ ಅಂದ್ರೆ.. ವಾಟೆ ಅಂಡೆಯ ಒಳಗೆ ಆನೆ ತೂರಿ ಹೋಗುವುದೇ ಅಸಾಧ್ಯ ಪರಿಕಲ್ಪನೆ. ಅಂಥಾದ್ರಲ್ಲಿ ಒಂಬತ್ತು ಆನೆ ಸಲೀಸಾಗಿ ತೂರಿ ಹೋಗಿ, ಗಾತ್ರದಲ್ಲಿ ಚಿಕ್ಕದಾದ ಮರಿ ಆನೆ ತೂರಿ ಹೋಗೋವಾಗ ಅದರ ಬಾಲ ಸಿಕ್ಕಿಹಾಕಿಕೋಡಿತು… ಅಂತ ಬುರುಡೆ ಬಿಡ್ತಾನೆ.

ಗುರು ಕಿರಣ್ ಅವರ ಬಂಡಲ್ ಬಡಾಯಿ ಮಾದೇವ…ನೂ ಸುಕ್ರನಿಂದ ಸ್ಫೂರ್ತಿ ಪಡೆದಿದ್ದಾನೆ ಅನ್ನೋದು ಶುದ್ದ ಶುಂಠಿ.

ನಿಮ್ಮಲ್ಲೂ ಇಂಥಹ ಕಥೆಗಳಿವೆಯೆ…ಇದ್ರೆ ಹಂಚಿಕೊಳ್ಳಿ. ಎಲ್ಲಾರು ಓದಿ ಖುಷಿ ಪಡೋಣ.