Posts Tagged ‘ಹನಿ’

ನನ್ನೆದೆಯ ‘ಬ್ಲಾಗ್-ಸ್ಪಾಟ’ ನ್ನು

ನಿನ್ನ ಪ್ರೀತಿಯ ವರ್ಡ್ – ಪ್ರೆಸ್ ಮಾಡಿದೆ…

ಇಂಪ್ರೆಸ್ ಮಾಡಿದೆ!!
——————————————–

ನಿನ್ನ ನಿರಾಕರಣದ

ಸುತ್ತಿಗೆಯೇಟಿಗೆ

ನನ್ನೆದೆಯಲಿ ನೆಟ್ಟು ಹೋದ

ನೆನಪಿನ ಮೊಳೆಗಳು

ಚುಚ್ಚುತಲೇ ಇವೆ…

ಬಿಟ್ಟೂ ಬಿಡದೇ

ಕ್ಷಮಿಸೋಣವೆಂದು ನಾ

ಹೆಣಗಿದೆ ಏಸೋ

ಕ್ಷಮಿಸು…

ನಾ ಆಗಲಾರೆ ಯೇಸು… 🙂

——————————————–

ಮನಸಿನ ಪುಟಗಳ ನಡುವೆ
ಖಾಲಿ ಹಾಳೆಗಳಿವೆ ಕೆಲವು..
ನೀ ಬರೆಯದೇ ಹೋದ
ಒಲವಿನ ಸಾಲುಗಳವು…
————————————
ನಿನ್ನ ನೆನಪುಗಳಿಂದ
ನನ್ನಲಿ ಮೂಡಿದ ಸಂಚಲನಗಳ ಸಂಕಲಿಸಿ
ಕವಿತೆ ಎಂದು ಹೆಸರಿಟ್ಟೆ…
ನಿಟ್ಟುಸಿರಿಟ್ಟೆ !!
————————————-
ಈ ಹನಿಗಳೆಲ್ಲ ನನ್ನವಲ್ಲ ಗೆಳತಿ,
ನೀನೇ ಬರೆಸಿದ್ದು…ಮತ್ತು ನೀನೇ ಬರಿಸಿದ್ದು                             
ನಾನೋ ಬರಿ ನೆಪಮಾತ್ರದವ
ಬರೆದಿದ್ದು ಮತ್ತು ಭರಿಸಿದ್ದು !!
————————————
ನಾನೇ ಬಯಸಿ ಪಡೆದರೆ ಅದು
ದಿವ್ಯ ಏಕಾಂತ…
ನೀನಿಲ್ಲದ ಒಂಟಿತನದಲಿ ಅನಿಸೋದು
ಈ ಬದುಕು ಏಕಂತ?
————————————
ಬರೆದು ಬರಿದಾಗಿಹೆನು ನಾ,
ಬರಿದೆ ನೆನಪಾಗುತಿಹೆ ನೀ,
ಬರದೆ ಹೋದರಿನ್ನು ನೀ,
ಬರದ ಬಯಲಂತೆ  ನಾ
—————————————-

ಎಡೆಬಿಡದೆ ಸುರಿವ ಮಳೆಯ ಕಂಡರೇಕೋ ಭೀತಿ…
ಹೀಗೆಯೇ  ಸುರಿದಿತ್ತಲ್ಲ ಧಾರೆಯಾಗಿ ನಿನ್ನ ಪ್ರೀತಿ…
ಒಮ್ಮೆಲೇ ಸುರಿದು ಬರಿದಾದ ನಂತರ…
ಬರಡಾದೀತಲ್ಲವೆ ಈ ಭೂಮಿಯೂ ನನ್ ತರ !!
ನನ್ನ ಉಸಿರುಸಿರಲೂ
ನೀನಿರುವೆ ಅಂತೇನಿಲ್ಲ
ನಿಟ್ಟುಸಿರಲಿ ನೀನಿರೋದು
ನಿಂಗೇ ಗೊತ್ತಲ್ಲ…
———————————
ಹುಟ್ಟಿ ಸಾಯೋ ನೂರಾರು ಸಾಲುಗಳ ಬಿಟ್ಟು ಬಿಡು,
ನಡುವಿನ ನಿಟ್ಟುಸಿರಿನಂತಹ ಮೌನಕ್ಕೆ ಕಿವಿಗೊಡು,
ಅಂತಾದರೂ ನಿನ್ನ ಮುಟ್ಟಿ ತಟ್ಟೀತು..
ಹಾಡಾಗದೆ ಎದೆಯೊಳಗುಳಿದ ಪುಟ್ಟ ಸಾಲು
————————————-
ಪ್ರೀತಿಯ ಮುಗಿಲ ಸಾಲು ಕರಗಿ ಮಳೆಯಾಗಲೇ ಇಲ್ಲ..
ಪದಗಳ ಜೋಡಿಸಿ ಬರೆದ ಸಾಲು ಕವಿತೆಯಾಗಲೇ ಇಲ್ಲ..
ಮುಗಿಲು ಇನ್ನೆಲ್ಲೋ ಮಳೆಯಾಗಿರಬೇಕು..
ಕವಿತೆ ಕಣ್ಣಲ್ಲೇ ಹೊಳೆಯಾಗಿರಬೇಕು
————————————————
ನಿನ್ನ ನೆನಪೇ ಬರದ ಜಾಗಕ್ಕೆ
ಹೋಗೋಣವೆಂದು ಹೊರಟಿರುವೆ,
ಜೊತೆಗೆ ನೀನೂ ಬರ್ತೀಯಾ
ಕೇಳೋಕೆ ಬಂದಿರುವೆ !!!
————————————-
ಪ್ರೇಮ ರಾಗದ ಪಲುಕುಗಳು…
ಮಧುರ ಸಹಚರ್ಯದ ಮೆಲುಕುಗಳು
ಅಡಕವಾಗಿವೆ ಎದೆಯ ಮುದ್ರಿಕೆಯೊಳಗೆ
ಎಂದೂ ಮರೆಯದ ಹಾಡಿನ ಸಾಲುಗಳಂತೆ
————————————

ಗುರುತಿಲ್ಲದೂರಿನಲಿ ಗುರಿಯಿಲ್ಲದಂತಲೆದು
ನಾ ಗುರುತಿಲ್ಲದಂತಾಗಿ ಹೋದೆ
ಗುರುತೇ ಇಲ್ಲದವಳಂತೆ ನೀ ಮುಖ ತಿರುವಿ ಹೋದೆ
ಎದೆಯಲಿ ಎಂದೂ ಮಾಯದ ಗುರುತೇ ನೀನಾದೆ
—————————————

ಮುಗಿಲು ಮೌನದಲಿ ರೋಧಿಸುತ್ತಿತ್ತು…

ಅಂತ್ಯವೇ ಇಲ್ಲದ ದುಃಖಕೆ ಮುನ್ನುಡಿಯೋ ಎಂಬಂತೆ

ವಸುಧೆಯಾದರೋ ತಣ್ಣಗೆ ನಿದ್ರಿಸುತ್ತಿಹಳು

ಕಾರಣವೇ ಹೇಳದೆ ಹೋದ ಹುಡುಗಿಯಂತೆ

 ——————————–

ಜಗತ್ತಿನ ಮೊತ್ತ ಮೊದಲ ವಂಚನೆಯೇನಲ್ಲ ಇದು

ಆದರೂ ನನ್ನ ಪಾಲಿಗಿದು ಮೊದಲನೆಯದು ಅಲ್ವಾ?

ಜಗತ್ತಿನ ಕಟ್ಟ ಕಡೆಯವಳೇನು ನೀನಲ್ಲ

ಆದರೂ ಅವರ್‍ಯಾರೂ ನೀನಾಗಲಾರರು ಅಲ್ವಾ?

——————————————–

ಎರಡು ನಿರೀಕ್ಷೆ.. ಎರಡು ಮೌನ..

ಮತ್ತೆರಡು ದಿವ್ಯ ಏಕಾಂತಗಳ

ನಡುವೆ ಬಂದು ಹೋದ

ಎರಡು ಕನಸುಗಳ ನೆನಪುಗಳೇ

ಸಾಕಲ್ಲವೆ…

ಹೊಸ ಕನಸುಗಳೆರಡರ

ಬೀಜಾಂಕುರಕ್ಕೆ