Posts Tagged ‘hani kavite’

ಕವಿತೆ ಬರೆಯಬೇಕೆಂದುಕೊಂಡು ಕುಳಿತರೆ
ಪದಗಳೇ ಸಿಕ್ಕದೇ ತಡವರಿಸುತ್ತಿಹೆ
ಇರಬೇಕೆಂದುಕೊಂಡೆ
ಬರೆದ ಸುಸ್ತಿಗಿರಬೇಕೆಂದು

ಅಲ್ಲವೆಂದಿತು ಒಳಮನಸ್ಸು
ಬರೆಯಲಾಗದಂತ ಅಶಿಸ್ತಿಗಿರಬೇಕು

ಉಹೂಂ…

ಬದುಕಿನ ಹಾಡಿನ ಪದ-ದನಿ-ನಿಸಗೆಳೆಲ್ಲಾ
ಚೆಲ್ಲಾಪಿಲ್ಲಿಯಾಗಿ ಹರಡಿಕೊಂಡಿವೆ
ಬಾಳ ಹೆದ್ದಾರಿಯುದ್ದಗಲಕ್ಕೂ

ಹೆಕ್ಕಿ ಹೆಕ್ಕಿ ಸುಸ್ತಾಗಿ ಬರೆದಿದ್ದು
ನನಗೆ ದಕ್ಕಿದ್ದೆಷ್ಟೋ ಅಷ್ಟು

ಮಿಕ್ಕಿದ್ದು….?!
ಅಳಿದುಳಿದ ನನ್ನ ನಿನ್ನ ನೆನಪಿನ ಸಂಚಿಯೊಳಗಿಷ್ಟು!!

aboutworkingmemory

 

 

 

 

 

 

 

 

 

 

 

ಕವಿತೆ ಕುಡಿಯೊಡಯಬೇಕು
ಕಾನನದಿ ಕವಿದ ಕತ್ತಲೆಯೊಳಗೆ
ಕಣ್ದೆರೆದು

ರಾತ್ರಿ ಮೊಗ್ಗಾಗಿದ್ದ ಮಲ್ಲಿಗೆ
ಮುಂಜಾವದ ಮಂಜಲಿ
ಮೆಲ್ಲನೆ ಮುಗುಳ್ನಕ್ಕಂತೆ…

ನಟ್ಟಿರುಳ ನಿದ್ದೆಯಲ್ಲಿಯೂ
ನೆಪವಿಲ್ಲದೆ ನಿನ್ನ
ನಗೆಯ ನೆನಪಾದಂತೆ…

ಬಲವಂತಕೆ ಬಸಿರ ಬಗೆದರೆ
ಬಿಡುಗಡೆಯಲ್ಲವದು…
ಭ್ರೂಣ ಹತ್ಯೆ

ವ್ಯತ್ಯಾಸ ಇಷ್ಟೇ…
ಒಲುಮೆಯ ತುದಿಬೆರಳ
ಸ್ಪರ್ಶದ ನವಿರು ಪುಳಕ
ತೆವಲು-ತೀಟೆಗೆ ತಡಕಾಡುವ
ಕರಗಳ ಚಳಕ

ತಣ್ಣಗಿದ್ದರೂ ಒಳಗೊಳಗೇ ದಹಿಸಿ
ಕೊರೆವ ಮಂಜಿನಂತೆ…
ನಿನ್ನ ತಂಪು ನೆನಪೂ
ನನ್ನ ಸುಡುತಿದೆ ಬೆಂಕಿಯಂತೆ
———————————–
ಕವಿತೆ ಅನ್ನುವರೇನು ಸಖಿ
ಪೋಣಿಸಿದ ಪದಗಳ ಸಾಲಿಗೆ?
ಕವಿತೆಯ ಅರ್ಥವೇ ಬೇರೆ ಇದೆ
ಗೆಳತಿ ನನ್ನ ಪಾಲಿಗೆ
ಅದು…
ಮುರಿದು ಹೋದ ಕನಸೊಂದರ ತುಣುಕು
ಮುಗಿದು ಹೋದ ಕ್ಷಣವೊಂದರ ಮೆಲುಕು
ಮರೆಯಲಾಗದ ನಿನ್ನೊಂದು ಮಧುರ ನೆನಪು
—————————————-
ಕನಸಿನ ಕನ್ನಡಿಯ ಬಿಂಬಗಳೆಲ್ಲಾ
ಮನಸಿನೊಳಗೆಯೇ ಬೆತ್ತಲಾಯ್ತು
ನಿನ್ನ ಕಣ್-ಬೆಳಕಿಗೆ ಬೀಳುವ ಮೊದಲೇ
ಮರೆಯಾಗಿ ಕತ್ತಲಾಯ್ತು
————————————
ನನ್ನ ಯಾತನೆಗಳನೆಲ್ಲ
ನಿನ್ನ ಬಳಿ ಹೇಳಿಕೊಂಡು
ಹಗುರಾಗೋಣವೆಂದಿದ್ದೆ..
ಹ್ಮ್.. ಹಗುರಾಗಲು ಹೋಗಿ…
ಹಗುರವಾಗಿಬಿಟ್ಟೆ  ನೋಡು !!
————————————