Posts Tagged ‘kavite’

ನನ್ನೆದೆಯ ‘ಬ್ಲಾಗ್-ಸ್ಪಾಟ’ ನ್ನು

ನಿನ್ನ ಪ್ರೀತಿಯ ವರ್ಡ್ – ಪ್ರೆಸ್ ಮಾಡಿದೆ…

ಇಂಪ್ರೆಸ್ ಮಾಡಿದೆ!!
——————————————–

ನಿನ್ನ ನಿರಾಕರಣದ

ಸುತ್ತಿಗೆಯೇಟಿಗೆ

ನನ್ನೆದೆಯಲಿ ನೆಟ್ಟು ಹೋದ

ನೆನಪಿನ ಮೊಳೆಗಳು

ಚುಚ್ಚುತಲೇ ಇವೆ…

ಬಿಟ್ಟೂ ಬಿಡದೇ

ಕ್ಷಮಿಸೋಣವೆಂದು ನಾ

ಹೆಣಗಿದೆ ಏಸೋ

ಕ್ಷಮಿಸು…

ನಾ ಆಗಲಾರೆ ಯೇಸು… 🙂

——————————————–

ನಿನ್ನೆಯ ನೆನಪುಗಳ ಗಲ್ಲಿಗಳಲಿ
ನಿನ್ನಯ ನಿರೀಕ್ಷೆಗಳ ನಾಳೆಗಳಲಿ
ಸರಿದು ಹೋಗುತಿದೆ ಸದ್ದೇ ಇಲ್ಲದೆ…
ನಿಲ್ಲದೇ ನೀ-ನಿಲ್ಲದೇ ವರ್ತಮಾನ
-+-+-+-+-+-+-+-+-+-+-+-+-+-+-+-
ಹಿಡಿಯಷ್ಟು ಪ್ರೀತಿ ಬಯಸಿ
ಕೈಚಾಚಿದೆ ನಿನ್ನೆದುರು ಸಖಿ…
ಬೊಗಸೆಯಷ್ಟು ಕಂಬನಿ ತುಂಬಿಸಿ
ನಿನ್ನ ಲೋಕದಿ ನೀನು ಸುಖಿ…
-+-+-+-+-+-+-+-+-+-+-+-+-+-+-+-
ಹೇಳದೆ ಕೇಳದೆ ಎದೆಯ ಕೊಳದೊಳಗಿಳಿದು
ಜೊತೆಯಲೇ ನನ್ನನೂ ಪ್ರೀತಿಯಾಳಕ್ಕೆಳೆದು
ನಡುನೀರಲಿ ನನ್ನ ಬಿಟ್ಟು ಹೋದ ನೀರೆ
ನಿನ್ನ ಪ್ರೀತಿ ಬಯಸಿದ ನನಗೆ ಮುಳುಗು ನೀರೆ?
-+-+-+-+-+-+-+-+-+-+-+-+-+-+-+-

ಗಮ್ಯವೆತ್ತಲೋ… ಗುರಿ ಯಾವುದೋ

ಗೊತ್ತಿಲ್ಲ… ಓಡುತ್ತಿದ್ದೇವೆ

ಮುಗ್ಗರಿಸಿ ಬಿದ್ದರೂ ಸಾವರಿಸಿಕೊಂಡೆದ್ದು

ಮತ್ತೆ ಓಡುತ್ತಿದ್ದೇವೆ

ಕಾಲಕ್ಕೆ ತಕ್ಕಂತೆ ಕೋಲ… ಬೆಂಕಿ ಹಚ್ಚಿದ ಬಾಲ

ದಿಕ್ಕೆಟ್ಟು ಓಡುತ್ತಿದ್ದೇವೆ

ಸಂಬಂಧ-ಬಂಧ ಅನುರಾಗ ಅನುಬಂಧ

ಧಿಕ್ಕರಿಸಿ ಓಡುತ್ತಿದ್ದೇವೆ

ಸ್ಪರ್ಧೆಯೋ ಜಿದ್ದೋ…ಅರಿಯದೆಯೋ ಅರಿತಿದ್ದೋ

ಒಟ್ಟಾರೆ ಓಡುತ್ತಿದ್ದೇವೆ

ಗೆಲ್ಲುವುದೆಂಬುದೇ ಇಲ್ಲ, ಬರಿ ಮೈಲಿಗಲ್ಲುಗಳೇ ಎಲ್ಲ

ದಾಟಿ ಮುನ್ನುಗ್ಗಿ… ಓಡುತ್ತಿದ್ದೇವೆ

ಕೊನೆಯಿಲ್ಲದ ಈ ಓಟ… ಕೊನೆಯ ನಿಲ್ದಾಣದ ತನಕ

ನಿಲ್ಲದೇ ಓಡುತ್ತಿದ್ದೇವೆ

ನೀ ಬಳಿಯಲಿರಲು ಗೆಳತಿ

ಈ ಬದುಕಲಿ ಅಷ್ಟೇ ಸಾಕು

ನೀ ದೂರವಾದರೆ…

ಈ ಬದುಕು ಸಾಕು ಅಷ್ಟೇ..!!

– – – – – – – – – – – – – – – – – — – – – – – – – – – – – – – – –

ನಿನ್ನ ಮರೆಯಬೇಕೆಂಬ ಮನಸಿನ ಮನವಿಯ

ಮನ್ನಿಸಿ ನಾ ಮರೆತೇಬಿಟ್ಟೆ

ಮರುಘಳಿಗೆಯಲೇ ಮಧುರ ನೆನಪುಗಳ ಆಲಾಪವ

ಆಲಿಸುತ ಮೈ ಮರೆತೇಬಿಟ್ಟೆ

– – – – – – – – – – – – – – – – – — – – – – – – – – – – – – – – –

ಬದುಕಿನ ಕವನ ಸಂಕಲನದಲಿ..

ನೀನೊಂದು ಪುಟ್ಟ ಕವಿತೆ

ಬಾಳಿನ ಭಾವಗೀತೆಯಲಿ ನೀ

ಸ್ವರವಾಗಿ ಕುಳಿತೆ

ಪ್ರೇಮದ ಪಿಸುಮಾತಲಿ ನೀ

ಪದವಾಗಿ ಅವಿತೆ

ಬರುವೆಯ ನನ್ನ ತಮದ ಬಾಳಿಗೆ

ನೀನಾಗಿ ಒಂದು ಪುಟ್ಟ ಹಣತೆ?

– – – – – – – – – – – – – – – – – — – – – – – – – – – – – – – – –

ಚಿತ್ತ ಭಿತ್ತಿಯ ನಡುವೆ.. ಕನಸುಗಳ ಕೋಣೆಯಲಿ

ನಿನ್ನ ನೆನಪುಗಳ ಚಾದರವ ಬಿಚ್ಚಿಟ್ಟಿರುವೆ…

ಮಧುರ ಸ್ಮೃತಿಗಳ ಸುಂದರ ಮೆಲ್ವಾಸಿನಡಿಯಲಿ

ಕಣ್ಣೀರ ಕರೆಗಳನೆಲ್ಲ ಬಚ್ಚಿಟ್ಟಿರುವೆ

– – – – – – – – – – – – – – – – – — – – – – – – – – – – – – – – –

ಮರೆತೂ ಕೂಡ ಕಾಲಿಡಬೇಡ ಗೆಳತಿ

ನನ್ನೆದೆಯ ಅಂಗಳದಲಿ ..

ಹಾಳಾದೀತು ಎಂದೋ ನೀನೇ ಬಿಡಿಸಿಟ್ಟ

ಒಲವಿನ ರಂಗವಲ್ಲಿ

– – – – – – – – – – – – – – – – – — – – – – – – – – – – – – – – –

ಭಾವ ಬಿಂದಿಗೆಯ ತುಂಬೆಲ್ಲಾ ನಿನ್ನೊಲವಿನ ತಿಳಿ ನೀರು

ಸ್ಪೂರ್ತಿ ಪಾತ್ರೆಯಲೂ ಗೆಳತಿ ಭರ್ತಿ ನೀನೇ ನೀನು

ಕಣ್ಮುಚ್ಚಿಕೊಂಡರೆ ಕನಸಲಿ ಬರ್ತಿ ನೀನು

ಕಣ್ತುಂಬಿ ಬಂದಾಗ ಕಣ್ಣಂಚಿನ ಹನಿಯಲೂ ಇರ್ತಿ ನೀನು

– – – – – – – – – – – – – – – – – — – – – – – – – – – – – – – – –