Posts Tagged ‘software’

‘ವಿಕ್ಟರಿ’ಯ ಯೋಗರಾಜ್ ಭಟ್ರ ಕಿಕ್-(ಸ್ಟೋ)ರೀ ಹಾಡು ಇಲ್ಲಿ IT ಉದ್ಯೋಗಿಯ ‘ಹಿಸ್-ಸ್ಟೋರಿ’ ಆಗಿದೆ 🙂


ಯಾವತ್ತೂ ಕೆಲ್ಸಾ… ಕ್ಲೈಂಟು ಪಿಸಾಚಿ ಅಲ್ವಾ?
ಟೀ..ಮ್ ಮ್ಯಾನೇಜರ್ಸು ಅಂತೂ… ಸೊಳ್ಳೇ ತಿಗಣೆ… ಎಲ್ಲಾ … ಸೊಳ್ಳೇ ತಿಗಣೆ… ಎಲ್ಲಾ…

ಹಾಲಿ ಕ್ವಾರ್ಟ್ರು ಅಪ್ರೈಸಲ್ಲು ರೇಟು
ಕಡಿಮೆ ಹಾಕವ್ರೇ ಬಾಸು
ಹಾಲಿ ಕ್ವಾರ್ಟ್ರು ಅಪ್ರೈಸಲ್ಲು ರೇಟು
ಕಡಿಮೆ ಹಾಕವ್ರೇ ಬಾಸು

ಬಾಸ್ತುಂಬಾ ಜೋರು… ಕ್ಲೈಂಟಂದ್ರೆ ದೇವ್ರು
ಬಾಸ್ತುಂಬಾ ಜೋರು… ಕ್ಲೈಂಟಂದ್ರೆ ದೇವ್ರು

ನಿಜ್ವಾಗ್ಲೂ… ನಿಜ್ವಾಗ್ಲೂ… ನಿಜ್ವಾಗ್ಲೂ ಜೋರು ಡೆಡ್ಲೈನ್ ಪ್ರೆಷರು
ಡೆಡ್ಲೈನ್ ಪ್ರೆಷರು… ಡೆಡ್ಲೈನ್ ಪ್ರೆಷರು
ಡೆಡ್ಲೈನ್ ಪ್ರೆಷರು… ಡೆಡ್ಲೈನ್ ಪ್ರೆಷರು

ಹಾಲಿ ಕ್ವಾರ್ಟ್ರು ಅಪ್ರೈಸಲ್ಲು ರೇಟು
ಕಡಿಮೆ ಹಾಕವ್ರೇ ಬಾಸು
ಕಟ್ಟು ಮಾಡವ್ರೇ… ನಮ್ ಹೈಕು…ಉ

ಕೆಲಸಾ…ಮಾಡದೇ ಇದ್ರೂ ಉಗಿತಾರೆ
ಸ್ವಲುಪಾ… ತಪ್ಪಾದ್ರೂನೂ ಉಗಿತಾರೆ
ಮುಚ್ಕೊಂಡೇ ಇರ್ತೀನ್ ನಾನು…ಉಗದ್ರೂನೇ
ಕೆಲಸಾ… ಕೆಲಸಾ…ಕೆಲಸಾ…ಕೆಲಸಾ

ಕೋಡಿಗ್-ಕೋಡೇ ಬದಲಾಯ್ಸು
ಕೋಡಿಗ್-ಕೋಡೇ ಬದಲಾಯ್ಸು
ಎಂಡು ಆದ ಮೇಲೆ…ಸಾವಿರಾರು ಚೇಂಜು

ಮಾಡಿ ಫ್ರೀಜು ದಯವಿಟ್ಟು
ಹೇ ಮಾಡಿ ಫ್ರೀಜು ದಯವಿಟ್ಟು
ಡೆಲಿವರಿ ಟೈಮಲ್ಲೂ…ಕೇಳಬೇಡಿ ಚೇಂಜಸು

ಕಂಪನಿ ಒಳ್ಳೇದು…ಡ್ಯೂಟಿ ತುಂಬಾ ಕಷ್ಟದ್ದು
ಹಿಂಗೆ ದುಡಿಯೋದು…ತಮ್-ಹೆಲ್ತ್ಗೆ ಕೆಟ್ಟದ್ದು

ವರ್ಷಕ್ಕೆ ಮೂರು… ಕಂಪನೀಗೆ ಹಾರು
ವರ್ಷಕ್ಕೆ ಮೂರು… ಕಂಪನೀಗೆ ಹಾರು

ನಿಜ್ವಾಗ್ಲೂ…ಗುರುವೇ… ನಿಜ್ವಾಗ್ಲೂ… ನಿಜ್ವಾಗ್ಲೂ ಓಲ್ದು ಕಂಪ್ನೀನೆ ಬೆಟ್ರು
ಕಂಪ್ನೀನೆ ಬೆಟ್ರು… ಕಂಪ್ನೀನೆ ಬೆಟ್ರು
ಕಂಪ್ನೀನೆ ಬೆಟ್ರು… ಕಂಪ್ನೀನೆ ಬೆಟ್ರು

ಹಾಲಿ ಕ್ವಾರ್ಟ್ರು ಅಪ್ರೈಸಲ್ಲು ರೇಟು
ಕಡಿಮೆ ಹಾಕವ್ರೇ ಬಾಸು…ಉ

ಹೈಕು-ಭಡ್ತಿ ಎರಡೂ
ಅವ್ಳಿ-ಜವ್ಳಿ ಇದ್ದಂಗೆ
ಅಪ್ರೈಸಲ್ಲು ಇತ್ಯಾದಿ
ಮೂಗಿಗ್ ತುಪ್ಪ ಹಚ್ದಂಗೆ

ಟ್ಯಾಕ್ಸು ಹೋದ್ರೆ ಅದೇ ಸ್ಯಾಲ್ರಿ
ಹೆಸ್ರು ಬದಲು ಹಳೇ ಡ್ಯೂಟಿ
ಹೊಸ ಟೀಮು ಅದೇ ಕ್ಲೈಂಟು
ಕಿತ್ತೋಗಿರೋ ಹಳೇ ಬಾಸು

ಅದೇ ಪ್ರೆಷರ್ ದಿನಾ ಲೇಟು
ವೀಕೆಂಡಲ್ಲೂ ನೈಟು-ಔಟು
ಕ್ಲೈಂಟು ಕಾಲ್ಸು ಮಧ್ಯೆ ಮೀಟಿಂಗ್
ಮೀಟಿಂಗಲ್ಲಿ ಬಾಸಿನ್ ಲೆಕ್ಚರ್

ಗೋಳು ಎಲ್ಲಾ ಯಾರ ಹತ್ರ ಹೇಳಲಿ?
ಪ್ರೋಮೋಶನ್ನೇ ಇಲ್ದೇ ಹಿಂಗೇ ಸಾಯಲೇ?

ಸಿಕ್ಕಲ್ವೆ ಬೇರೆ… ನೌಕ್ರಿ ಆಫರ್ರು
ಬಿಟ್ಟು ಹೋಗೋಕೆ… ಮನ್ಸ್-ಮಾಡಿ ಚೂರು

ನಿಜ್ವಾಗ್ಲೂ…ನಿಜ..ವಾಗ್ಲೂ… ನಿಜ್ವಾಗ್ಲೂ ಹುಡ್ಕಿದ್ರೆ ಬೇಜಾನೈತೆ ಆಫರು
ಬೇಜಾನೈತೆ ಆಫರು… ಬೇಜಾನೈತೆ ಆಫರು
ಬೇಜಾನೈತೆ ಆಫರು… ಬೇಜಾನೈತೆ ಆಫರು

ಹಾಲಿ ಕ್ವಾರ್ಟ್ರು ಅಪ್ರೈಸಲ್ಲು ರೇಟು
ಕಡಿಮೆ ಹಾಕವ್ರೇ ಬಾಸು
ಹೇ…ಹಾಲಿ ಕ್ವಾರ್ಟ್ರು ಅಪ್ರೈಸಲ್ಲು ರೇಟು
ಕಡಿಮೆ ಹಾಕವ್ರೇ ಬಾಸು
ಕಟ್ಟು ಮಾಡವ್ರೇ… ನಮ್ ಹೈ….ಕು…ಉ

___________________________________________________________
ಮೂಲ ಹಾಡು ‘ವಿಕ್ಟರಿ’ ಚಿತ್ರಕ್ಕೆ ಯೋಗರಾಜ್ ಭಟ್ ಬರೆದ ‘ಖಾಲಿ ಕಾರ್ಟ್ರು ಬಾಟ್ಲಿ ಹಂಗೆ ಲೈಫು’

ಯಾವತ್ತೂ ಮನ್ಸಾ…. ಒಂಟಿ ಪಿಸಾಚಿ ಅಲ್ಲ
ಬಾ..ರ್ ಸಪ್ಲೈಯರಿಗಿಂತ… ಒಳ್ಳೇ ಗೆಳೆಯಾ…ಇಲ್ಲಾ… ಒಳ್ಳೇ ಗೆಳೆಯಾ… ಇಲ್ಲಾ….

ಖಾಲಿ ಕಾರ್ಟ್ರು ಬಾಟ್ಲಿ ಹಂಗೆ ಲೈಫು
ಆಚೇಗ್ ಹಾಕವ್ಳೇ ವೈಫು
ಖಾಲಿ ಕಾರ್ಟ್ರು ಬಾಟ್ಲಿ ಹಂಗೆ ಲೈಫು
ಆಚೇಗ್ ಹಾಕವ್ಳೇ ವೈಫು

ಕಣ್ತುಂಬಾ ನೀರು… ಬಾಯ್ತುಂಬಾ ಬೀರು
ಕಣ್ತುಂಬಾ ನೀರು… ಬಾಯ್ತುಂಬಾ ಬೀರು

ನಿಜ್ವಾಗ್ಲೂ… ನಿಜ್ವಾಗ್ಲೂ… ನಿಜ್ವಾಗ್ಲೂ ಬಾರು ಗಂಡ್ಮಕ್ಳ ತವರು
ಗಂಡ್ಮಕ್ಳ ತವರು…ಗಂಡ್ಮಕ್ಳ ತವರು
ಗಂಡ್ಮಕ್ಳ ತವರು…ಗಂಡ್ಮಕ್ಳ ತವರು

ಖಾಲಿ ಕಾರ್ಟ್ರು ಬಾಟ್ಲಿ ಹಂಗೆ ಲೈಫು
ಆಚೇಗ್ ಹಾಕವ್ಳೇ ವೈಫು
ಒದ್ದು ಓಡ್ಸವ್ಳೇ… ನಮ್ ವೈಫು…ಉ

ಕುಡುಕಾ…ಕುಡಿದೇ ಇದ್ರೂ ಕುಡುಕಾನೇ
ಕುಡುಕಾ…ಕುಡ್ಕೊಂಡಿದ್ರೂ ಕುಡುಕಾನೇ
ಕುಡ್ಕೊಂಡೇ ಇರ್ತೀನ್ ನಾನು…ಕುಡುಕಾನೇ
ಕುಡುಕಾ… ಕುಡುಕಾ…ಕುಡುಕಾ…ಕುಡುಕಾ

ಊರಿಗ್-ಊರೇ ಸುಡುಗಾಡು
ಊರಿಗ್-ಊರೇ ಸುಡುಗಾಡು
ಎಣ್ಣೇ ಅಂಗ್ಡಿ ಒಂದೇ…ಸಾವಿಲ್ಲದ ಪ್ಲೇಸು

ಬಾರು ಬಾಗ್ಲು ದಯವಿಟ್ಟು
ಹೇ ಬಾರು ಬಾಗ್ಲು ದಯವಿಟ್ಟು
ಟ್ವೆಂಟಿಫೋರು ಹವರ್ಸು…ಮುಚ್ಚಬೇಡಿ ಪ್ಲೀಸು

ಕುಡುಕ್ರು ಒಳ್ಳೇವ್ರು…ಎಣ್ಣೆ ತುಂಬಾ ಕೆಟ್ಟದ್ದು
ಡೈಲಿ ಕುಡಿಯೋದು…ತಮ್-ತಮ್ಗೇ ಬಿಟ್ಟಿದ್ದು

ದುಃಖಕ್ಕೆ ನೀರು…ಕುಡಿತಾರೆ ಯಾರು
ದುಃಖಕ್ಕೆ ನೀರು…ಕುಡಿತಾರೆ ಯಾರು

ನಿಜ್ವಾಗ್ಲೂ…ಗುರುವೇ… ನಿಜ್ವಾಗ್ಲೂ… ನಿಜ್ವಾಗ್ಲೂ ಬಿಲ್ಲು ಕಟ್ಟೋನೇ ದೇವ್ರು
ಕಟ್ಟೋನೇ ದೇವ್ರು…ಕಟ್ಟೋನೇ ದೇವ್ರು
ಕಟ್ಟೋನೇ ದೇವ್ರು…ಕಟ್ಟೋನೇ ದೇವ್ರು

ಖಾಲಿ ಕಾರ್ಟ್ರು ಬಾಟ್ಲಿ ಹಂಗೆ ಲೈಫು
ಆಚೇಗ್ ಹಾಕವ್ಳೇ ವೈಫು…ಉ

ಲವ್ವು-ನೋವು ಎರಡೂ
ಅವ್ಳಿ-ಜವ್ಳಿ ಇದ್ದಂಗೆ
ಮದುವೆ-ಮಕ್ಳು ಇತ್ಯಾದಿ
ಹಾವು ಬಿಟ್ಟುಕೊಂಡಂಗೆ

ಮನೆಗೋದ್ರೆ ಅದೇ ಹೆಂಡ್ತಿ
ಹಸ್ರು ಕಲರ್ ಹಳೇ ನೈಟಿ
ಬ್ಯಾಂಕು ಸಾಲ ಕಾರು ಗ್ಯಾಸು
ಮನೆ ಬಾಡ್ಗೆ ಮಕ್ಳು ಫೀಸು

ಅದೇ ಕುಕ್ಕರ್ ಅನ್ನ ಸಾರು
ಮಕ್ಳ ಕೈಲಿ ಪ್ಲಾಸ್ಟಿಕ್ ಕಾರು
ಮಿಡಲ್ ಕ್ಲಾಸು ಹಳೇ ಸ್ಕೂಟರ್
ಯಾವಾಗಂದ್ರೆ ಆವಾಗ್ ಪಂಕ್ಚರ್

ಬಾಳು ಅಂದ್ರೆ ಏನು ಅಂತ ಹೇಳಲೇ
ಮೆಡಿಸನ್ನೇ ಇಲ್ದೇ ಇರೋ ಖಾಯಿಲೇ

ಇಲ್ಲಿಲ್ಲ ಯಾರೂ…ಔಷ್ದಿ ಕೋಡೋರು
ಬಿಟ್ಟುಕೊಂಡೋರು…ಬಿಟ್ಟೇಳಿ ಚೂರು

ನಿಜ್ವಾಗ್ಲೂ…ನಿಜ..ವಾಗ್ಲೂ… ನಿಜ್ವಾಗ್ಲೂ ಕುಡುಕ್ರೇ ಸಮಾಜಕ್ಕೆ ಡಾಕ್ಟ್ರು
ಸಮಾಜಕ್ಕೆ ಡಾಕ್ಟ್ರು…ಸಮಾಜಕ್ಕೆ ಡಾಕ್ಟ್ರು
ಸಮಾಜಕ್ಕೆ ಡಾಕ್ಟ್ರು…ಸಮಾಜಕ್ಕೆ ಡಾಕ್ಟ್ರು

ಖಾಲಿ ಕಾರ್ಟ್ರು ಬಾಟ್ಲಿ ಹಂಗೆ ಲೈಫು
ಆಚೇಗ್ ಹಾಕವ್ಳೇ ವೈಫು
ಹೇ…ಖಾಲಿ ಕಾರ್ಟ್ರು ಬಾಟ್ಲಿ ಹಂಗೆ ಲೈಫು
ಆಚೇಗ್ ಹಾಕವ್ಳೇ ವೈಫು
ಒದ್ದು ಓಡ್ಸವ್ಳೇ… ನಮ್ ವೈ….ಫು…ಉ

ಯಾವ ಮೋಹನ ಮುರಳಿ… ಧಾಟಿಯಲ್ಲಿ ಸಾಫ್ಟ್-ವೇರಿಗನ ಹಾಡು-ಪಾಡು ( ಹೊಸಾ ವರ್ಶನ್ 🙂 )
ಮೊದಲೊಮ್ಮೆ ಬರೆದಿದ್ದೆ, ಅದನ್ನು ಮೂಲ ಸಾಹಿತ್ಯಕ್ಕೆ ಅನುಗುಣವಾಗಿ ಪರಿಷ್ಕರಿಸಿ ತಿದ್ದಿ ತೀಡಿದ ಹಾಡು 🙂


ಯಾವ ಸಾಫ್ಟ್‌ವೇರ್ ಕಂಪನಿ ಕರೆಯಿತು… ಬೆಂಗಳೂರಿಗೆ ನಿನ್ನನು
ಯಾವ ಸಂಬಳದಾಸೆ ಕುಕ್ಕಿತು… ನಿನ್ನ ಆಸೆಯ ಕಣ್ಣನು
ಯಾವ ಸಾಫ್ಟ್‌ವೇರ್ ಕಂಪನಿ ಕರೆಯಿತು… ಬೆಂಗಳೂರಿಗೆ ನಿನ್ನನು
ಯಾವ ಸಂಬಳದಾಸೆ ಕುಕ್ಕಿತು… ನಿನ್ನ ಆಸೆಯ ಕಣ್ಣನು

ಫೋಮು ಹಾಸಿಗೆ ಟೀವಿ ಫ್ರಿಜ್ಜಿದೆ…
ಏ.ಸಿ, ತಂಪಿನ ರೂಮಿದೆ
ಫೋಮು ಹಾಸಿಗೆ ಟೀವಿ ಫ್ರಿಜ್ಜಿದೆ…
ಏ.ಸಿ, ತಂಪಿನ ರೂಮಿದೆ

ಬರಿದೆ ತುಂಬಿಹೆ ಮನೆಯ ಒಳಗೆ
ಆಫೀಸು ಅಲ್ಲವೆ ನಿಮ್ಮನೆ

ಯಾವ ಸಾಫ್ಟ್‌ವೇರ್ ಕಂಪನಿ ಕರೆಯಿತು… ಬೆಂಗಳೂರಿಗೆ ನಿನ್ನನು
ಯಾವ ಸಂಬಳದಾಸೆ ಕುಕ್ಕಿತು… ನಿನ್ನ ಆಸೆಯ ಕಣ್ಣನು

ಹೊಸೂರ್ ರೋಡಿನ ಆಚೆ ಎಲ್ಲೋ…
ನಿನ್ನ ಕಂಪನಿ ಬೇಸಿದೆ
ಟ್ರಾಫಿಕ್ ಜಾಮಿನಲಿ ಸಿಲುಕಿಕೊಂಡಿಹ…
ನಿನ್ನ ಬರುವಿಕೆ ಕಾದಿದೆ

ಯಾವ ಸಾಫ್ಟ್‌ವೇರ್ ಕಂಪನಿ ಕರೆಯಿತು… ಬೆಂಗಳೂರಿಗೆ ನಿನ್ನನು
ಯಾವ ಸಂಬಳದಾಸೆ ಕುಕ್ಕಿತು… ನಿನ್ನ ಆಸೆಯ ಕಣ್ಣನು

ವಿವಶನಾದನು ಜಾಣ… ಹ್ಮಾ…
ವಿವಶನಾದನು ಜಾಣ…
ಪರದೇಶಿಯ ಜೀತ ಜೀವನ…
ವಿವಶನಾದನು ಜಾಣ…
ಪರದೇಶಿಯ ಜೀತ ಜೀವನ…
ಸೃಜನಶೀಲತೆಯ ಬಿಟ್ಟು ಕೆರಿಯರ-ಏಳಿಗೆ
ದುಡಿಮೆಯೇ ಜೀವನಾ

ಯಾವ ಸಾಫ್ಟ್‌ವೇರ್ ಕಂಪನಿ ಕರೆಯಿತು… ಬೆಂಗಳೂರಿಗೆ ನಿನ್ನನು
ಯಾವ ಸಂಬಳದಾಸೆ ಕುಕ್ಕಿತು… ನಿನ್ನ ಆಸೆಯ ಕಣ್ಣನು

(ಗೋಪಾಲಕೃಷ್ಣ ಅಡಿಗರ ಕ್ಷಮೆ ಕೋರಿ)

——————————————————————————-
ಮೂಲ ಹಾಡು ‘ಅಮೇರಿಕಾ ಅಮೇರಿಕಾ’ ಚಿತ್ರದ ‘ಯಾವ ಮೋಹನ ಮುರಳಿ ಕರೆಯಿತು…’
ಕೃಪೆ: kannadalyrics.com
ಸಾಹಿತ್ಯ: ಗೋಪಾಲ ಕೃಷ್ಣ ಆಡಿಗ

ಯಾವ ಮೋಹನ ಮುರಳಿ ಕರೆಯಿತು… ದೂರ ತೀರಕೆ ನಿನ್ನನು
ಯಾವ ಬೃಂದಾವನವು ಸೆಳೆಯಿತು… ನಿನ್ನ ಮಣ್ಣಿನ ಕಣ್ಣನು

ಯಾವ ಮೋಹನ ಮುರಳಿ ಕರೆಯಿತು… ದೂರ ತೀರಕೆ ನಿನ್ನನು
ಯಾವ ಬೃಂದಾವನವು ಸೆಳೆಯಿತು… ನಿನ್ನ ಮಣ್ಣಿನ ಕಣ್ಣನು

ಹೂವು ಹಾಸಿಗೆ ಚಂದ್ರ ಚಂದನ…
ಬಾಹು ಬಂಧನ ಚುಂಬನ
ಹೂವು ಹಾಸಿಗೆ ಚಂದ್ರ ಚಂದನ…
ಬಾಹು ಬಂಧನ ಚುಂಬನ
ಬಯಕೆ ತೋಟದ ಬೇಲಿಯೊಳಗೆ…
ಕರಣ ಗಣದೀ ರಿಂಗಣ

ಯಾವ ಮೋಹನ ಮುರಳಿ ಕರೆಯಿತು… ದೂರ ತೀರಕೆ ನಿನ್ನನು
ಯಾವ ಬೃಂದಾವನವು ಸೆಳೆಯಿತು… ನಿನ್ನ ಮಣ್ಣಿನ ಕಣ್ಣನು

ಸಪ್ತ ಸಾಗರದಾಚೆ ಎಲ್ಲೊ…
ಸುಪ್ತ ಸಾಗರ ಕಾದಿದೆ
ಮೊಳೆಯದಲೆಗಲ ಮೂಕ ಮರ್ಮರ…
ಇಂದು ಇಲ್ಲಿಗೂ ಹಾಯಿತೇ

ಯಾವ ಮೋಹನ ಮುರಳಿ ಕರೆಯಿತು…ದೂರ ತೀರಕೆ ನಿನ್ನನು
ಯಾವ ಬೃಂದಾವನವು ಸೆಳೆಯಿತು…ನಿನ್ನ ಮಣ್ಣಿನ ಕಣ್ಣನು

ವಿವಶವಾಯಿತು ಪ್ರಾಣ… ಹ್ಮಾ…
ವಿವಶವಾಯಿತು ಪ್ರಾಣ…
ಪರವಶವು ನಿನ್ನೀ ಚೇತನ
ವಿವಶವಾಯಿತು ಪ್ರಾಣ…
ಪರವಶವು ನಿನ್ನೀ ಚೇತನ
ಇರುವುದೆಲ್ಲವ ಬಿಟ್ಟು ಇರದುದರೆಡೆಗೆ…
ತುಡಿವುದೇ ಜೀವನ

ಯಾವ ಮೋಹನ ಮುರಳಿ ಕರೆಯಿತು… ದೂರ ತೀರಕೆ ನಿನ್ನನು
ಯಾವ ಬೃಂದಾವನವು ಸೆಳೆಯಿತು… ನಿನ್ನ ಮಣ್ಣಿನ ಕಣ್ಣನು

ಆರ್ಥಿಕ ಕುಸಿದ ಹಿನ್ನೆಲೆಯಲ್ಲಿ, ಕೆಲ್ಸ ಕಳೆದುಹೋಗುವ ಭೀತಿಯಲ್ಲಿ ಮಿಲನ ಚಿತ್ರದ ನಿನ್ನಿಂದಲೇ… ನಿನ್ನಿಂದಲೇ… ಹಾಡನ್ನು ಹೀಗೆ ಹಾಡಿದ್ರೆ ಹೇಗಿರುತ್ತೆ…?

ಇದಕ್ಕೆ ನಾನು ಇಟ್ಟ ಟೈಟಲ್ – ಪುನರ್ಮಿಲನ… ಅಂದ್ರೆ ಮಿಲನದ ರಿಮೇಕು ಅಂತ 🙂

 

ನಿನ್ನೆಯಿಂದಲೇ… ನಿನ್ನೆಯಿಂದಲೇ…

ಫೈರಿಂಗು ಶುರುವಾಗಿದೆ…

ನಿನ್ನೆಯಿಂದಲೇ… ನಿನ್ನೆಯಿಂದಲೇ…

ಭಯವೊಂದು ಮನೆಮಾಡಿದೆ…

 

ಎದೆಯಲ್ಲಿ ಏನೇನೋ ಕೋಲಾಹಲ…

ಕಣ್ಣೆದುರಲ್ಲೇ ಫೈರಿಂಗು ನಡೆವಾಗಲೇ

ಐ.ಟಿ. ಸಿಟಿಯಲ್ಲಿ ಕೆಲ್ಸ ಹೋಗುವ ಸಂಭವ

ನಾ ನಿಂತಲ್ಲೇ ಬೆವರಾದೆ ನಿನ್ನೆಯಿಂದಲೇ…

 

ನಿನ್ನೆಯಿಂದಲೇ… ನಿನ್ನೆಯಿಂದಲೇ…||

 

ಮನೆಸಾಲದ ಬಾಕಿ… ತೀರ್ಸಿಲ್ಲ ಇನ್ನೂ…

ಕಾರ್ ಲೋನು ತುಂಬುವ ದಾರಿಯೇನು…?

ಶೇರ್ಸ್‌ನಲ್ಲಿ ಹಣ ಹಾಕಿ ಬೀದಿಗೆ ಬಂದೆ…

ಕೆಲ್ಸ ಹೋದ್ರೆ ಮುಂದೆ ಗತಿಯೇನು…?

 

ದುಡ್ಡಿಲ್ಲದೇ… ಕೆಲಸವಿಲ್ಲದೇ… ಮುಖವೀಗ ಕಳೆಗುಂದಿದೆ…

 

ನಿನ್ನೆಯಿಂದಲೇ… ನಿನ್ನೆಯಿಂದಲೇ…||

 

ಯಾವ್ ಕಂಪ್ನಿಗ್ ಹೋದ್ರು ಕೆಲ್ಸ ಖಾಲಿ ಇಲ್ಲ…

ಆರ್ಥಿಕ ಕುಸಿತದ ಪರಿಣಾಮ…

ಚಳಿಜ್ವರ ನಡುಕ ಶುರುವಾಗ್ತದಿಲ್ಲಿ…

ಕೆಡ್ತಂದ್ರೆ ಅಮೇರಿಕದ ಹವಮಾನ…

 

ಭಡ್ತಿ ಇಲ್ದಿದ್ರೂ… ಸಂಬ್ಳ ಕಟ್ಟಾದ್ರೂ… ಕೆಲ್ಸ ಉಳಿದ್ರೆ ಸಾಕಾಗಿದೆ…

ನಿನ್ನೆಯಿಂದಲೇ… ನಿನ್ನೆಯಿಂದಲೇ…||

ಕಡಲತೀರ ಬ್ಲಾಗ್‌ನಲ್ಲಿ ಸಹಬ್ಲಾಗಿಗ ಸಂದೀಪ್ ಕಾಮತ್ ಒಂದೊಳ್ಳೆ ಬರಹ ಹಾಕಿದ್ದಾರೆ… ಎಲ್ಲದಕ್ಕೂ ಐ.ಟಿ., ಬಿ.ಟಿ. ಕಾರಣ ಅಂತ ಬೊಬ್ಬೆ ಹೊಡೆಯೋ ಮಂದಿಯ ಕಣ್ತೆರೆಸುವoತಿದೆ ಈ ಲೇಖನ ಪುರ್ಸೊತ್ತಾದ್ರೆ ಓದಿ ನೋಡಿ…

http://kadalateera.blogspot.com/2009/01/blog-post_12.html

ಅಂದ ಹಾಗೆ ಈದಿ ಅಮಿನ್‌ಮುಂದಿನ ಭಾಗ ಬರೋದು ಸ್ವಲ್ಪ ತಡವಾಯ್ತು… ಸಧ್ಯದಲ್ಲೇ ಬರ್ತಾನೆ ಅವನು ವಾಪಸ್.

ಈ ಪ್ರಶ್ನೆಯನ್ನು ಇಲ್ಲಿಯವರೆಗೆ ಕಡಿಮೆಯೆಂದರೂ ನೂರು ಜನರಾದರೂ ನನ್ನ ಬಳಿ ಕೇಳಿದ್ದಾರೆ. ಅದೆಂತದೋ ಪ್ರಾಜೆಕ್ಟ್ ಅಂತಾರಲ್ಲ, ಕೋಡ್ ಬರೆಯೋದು ಹಾಗಂದ್ರೇನು, ಪ್ರೋಗ್ರಾಮ್ ಅಂದ್ರೆ ಏನು… ಹೀಗೆ ಸಾಫ್ಟ್‌ವೇರ್ ಜಗತ್ತಿನ ಬಗ್ಗೆ ಕುತೂಹಲದಿಂದ ಪ್ರಶ್ನೆ ಕೇಳಿದವರು ಅನೇಕ ಮಂದಿ ಇದ್ದಾರೆ. ಅಸಲಿಗೆ ಹಗಲು-ರಾತ್ರಿ ಕೆಲಸ ಕೆಲಸ ಅಂತ ಸಾಫ್ಟ್‌ವೇರ್ ಮಂದಿ ಮಾಡುವ ಕೆಲಸ ಯಾವ ಸ್ವರೂಪದ್ದು ಅನ್ನುವ ಕುರಿತಾದ ಬಹುತೇಕರ ಪ್ರಶ್ನೆಗೆ ಸರಳವಾಗಿ ವಿವರಿಸಲು ಯಾಕೆ ಪ್ರಯತ್ನಿಸಬಾರದೆಂದು ಇದನ್ನು ಬರೆಯಲು ಹೊರಟಿದ್ದೇನೆ. ಆದಷ್ಟು ಕಡಿಮೆ ತಾಂತ್ರಿಕ ಪದಗಳನ್ನು ಬಳಸಲು ಯತ್ನಿಸಿದ್ದೇನೆ.

ಇದನ್ನು ಬರೀ ವಾಕ್ಯಗಳಲ್ಲಿ ವಿವರಿಸುವುದಕ್ಕಿಂತ, ಒಂದು ಸರಳ ಉದಾಹರಣೆಯೊಂದಿಗೆ ನೋಡಿದರೆ ಅರ್ಥೈಸಿಕೊಳ್ಳಲು ಸುಲಭ. ಒಂದು ಇನ್ಶೂರೆನ್ಸ್ ಕಂಪೆನಿಯ ಉದಾಹರಣೆ ಗಮನಿಸೋಣ. ಇಲ್ಲಿಯ ತನಕ ಅವರ ವಿವಿಧ ಯೋಜನೆಗಳು, ಅದರ ಪ್ರೀಮಿಯಂ ನಿರ್ಧಾರ… ಮೊದಲಾದ ಕಾರ್ಯಗಳೆಲ್ಲಾ ಲೆಡ್ಜರ್‌ಗಳಲ್ಲಿ ಮಾಹಿತಿ ಸಂಗ್ರಹಿಸುವುದರ ಮೂಲಕ ಹಾಗೂ ಪೆನ್ನು, ಪೇಪರ್, ಕ್ಯಾಲ್ಕುಲೇಟರ್ ಬಳಸಿ ಲೆಕ್ಕ ಹಾಕುವುದರ ಮೂಲಕ ನಿರ್ವಹಿಸುತ್ತಿದ್ದರು. ಈಗ ತನ್ನ ವ್ಯವಹಾರಗಳನ್ನೆಲ್ಲ ಸುಗಮವಾಗಿ ನಿರ್ವಹಿಸಲು ಒಂದು ಕಂಪ್ಯೂಟರ್ ಸಾಫ್ಟ್‌ವೇರ್ ಬೇಕೆಂದು ನಿರ್ಧರಿಸಿತು ಅಂತಿಟ್ಟುಕೊಳ್ಳೋಣ. ಅದಕ್ಕಾಗಿ ಅನೇಕ ಸಾಫ್ಟ್‌ವೇರ್‌ ಕಂಪೆನಿಗಳನ್ನು ಸಂಪರ್ಕಿಸಿ, ಯಾರು ಅತೀ ಕಡಿಮೆ ಅವಧಿಯಲ್ಲಿ, ಅತೀ ಕಡಿಮೆ ಖರ್ಚಿನಲ್ಲಿ ಅಂತಹ ಸಾಫ್ಟ್‌ವೇರ್ ನಿರ್ಮಿಸಿಕೊಡಲು ಒಪ್ಪುತ್ತಾರೋ ಅವರಿಗೆ ಈ ಕೆಲಸ ವಹಿಸಿಕೊಡಲಾಗುತ್ತದೆ.    (ಕೆಲವೊಮ್ಮೆ ನಿರ್ಮಾಣ ವೆಚ್ಚ ಹೆಚ್ಚಾಗಿದ್ದರೂ ಕೂಡಾ ಕಂಪೆನಿಯ ‘ಬ್ರ್ಯಾಂಡ್ ನೇಮ್’ ನೋಡಿ ನಿರ್ಧಾರವಾಗುವುದೂ ಇದೆ). ಹೀಗೆ ಕಸ್ಟಮರ್ ಒಬ್ಬರಿಂದ ಸಾಫ್ಟ್‌ವೇರ್ ಕಂಪೆನಿ ಪಡೆಯುವ ಈ ಕೆಲಸದ ಆರ್ಡರೇ ‘ಪ್ರಾಜೆಕ್ಟ್’. ಈ ಪ್ರಾಜೆಕ್ಟ್ ಮುಗಿಸಿಕೊಡುವ ಕೊನೆಯ ದಿನಾಂಕದ ಕುರಿತು ಮೊದಲೇ ಕರಾರು ನಡೆದಿರುತ್ತದೆ. ಹಾಗಾಗಿಯೇ ಸಾಫ್ಟ್‌ವೇರ್ ಮಂದಿ ಸದಾ ಈ ‘ಡೆಡ್‌ಲೈನ್‌’ನ ಬಿಸಿಗೆ ‘ಕುಂಡೆಸುಟ್ಟ ಬೆಕ್ಕಿನಂತೆ ಆಡುವುದು.

ಈಗ ಪ್ರಾಜೆಕ್ಟ್ ಏನೋ ಬಂತು. ಅದನ್ನು ಯಶಸ್ವಿಯಾಗಿ ಪೂರೈಸುವುದು ಹೇಗೆ? ಮೊಟ್ಟ ಮೊದಲನೆಯದಾಗಿ ಇನ್ಶೂರೆನ್ಸ್ ಕಂಪೆನಿಯು ತನ್ನ ಸಾಫ್ಟ್‌ವೇರ್‌ನಲ್ಲಿ ಯಾವ ಯಾವ ಅಂಶಗಳು ಇರಲು ಬಯಸುತ್ತದೆ ಅನ್ನುವುದನ್ನು ಸರಿಯಾಗಿ ತಿಳಿದುಕೊಳ್ಳಬೇಕಲ್ಲ. ಹಾಗಾಗಿ ಅವರ ಬೇಡಿಕೆ ಯಾ ಅಗತ್ಯಗಳ (ರಿಕ್ವಾಯರ್‌ಮೆಂಟ್) ಕುರಿತು ಮಾಹಿತಿ ಸಂಗ್ರಹಿಸುವುದು ಪ್ರಾಜೆಕ್ಟ್‌ನ ಮೊದಲ ಹಂತ. ಈ ಪ್ರಕ್ರಿಯೆಯಲ್ಲಿಯೇ ಪರಿಣಿತರಾಗಿರುವ ‘ರಿಕ್ವಾಯರ್‌ಮೆಂಟ್ ಅನಲಿಸ್ಟ್’ ಅಥವಾ ‘ಬ್ಯುಸಿನೆಸ್ ಅನಲಿಸ್ಟ್’ಗಳು ಈ ಕಾರ್ಯಕ್ಕೆ ನಿಯೋಜಿಸಲ್ಪಡುತ್ತಾರೆ. ಇನ್ಶೂರೆನ್ಸ್ ಕಂಪೆನಿಯ ಅಧಿಕಾರಿಗಳೊಂದಿಗೆ ವಿಚಾರ ವಿನಿಮಯ ನಡೆಸಿ, ಅವರು ನೀಡುವ ಮಾಹಿತಿಗಳನ್ನು, ಅವರ ಬೇಡಿಕೆಗಳನ್ನೆಲ್ಲಾ ವ್ಯವಸ್ಥಿತವಾಗಿ ದಾಖಲಿಸಲಾಗುತ್ತದೆ. ಒಂದು ಪ್ರಾಜೆಕ್ಟ್‌ನ ಯಶಸ್ಸಿನಲ್ಲಿ ಈ ಹಂತ ತುಂಬಾ ಪ್ರಮುಖವಾಗಿದ್ದು, ಇಲ್ಲೇನಾದರೂ ತಪ್ಪು ನುಸುಳಿಕೊಂಡರೆ ಗಣೇಶನನ್ನು ಮಾಡಲು ಹೋಗಿ ಅವರಪ್ಪನನ್ನು ಮಾಡಿದಂತಾಗುತ್ತದೆ. ಹಾಗಾಗಿ ಇಡೀ ಪ್ರಾಜೆಕ್ಟ್‌ನ ಒಟ್ಟು ಅವಧಿಯಲ್ಲಿ ಕಾಲು ಭಾಗ ಈ ಪ್ರಕ್ರಿಯೆಗೇ ಮೀಸಲಾಗಿರುತ್ತದೆ.

ಕೆಲವೊಮ್ಮೆ ಈ ಪ್ರಕ್ರಿಯೆಗೆ ಪೂರಕವಾಗಿ ಅಂತಿಮ ಹಂತದಲ್ಲಿ ಆ ತಂತ್ರಾಂಶವು ಹೇಗೆ ಕಾಣಿಸುತ್ತದೆ ಅನ್ನೋದನ್ನು ತೋರಿಸಲು ‘ಪ್ರೊಟೋಟೈಪ್’ ಒಂದನ್ನು ಸಿದ್ಧಪಡಿಸಿ ಕಸ್ಟಮರ್‌ಗೆ ತೋರಿಸಲಾಗುತ್ತದೆ. ಇದಕ್ಕೊಂದು ಸಾದೃಶ್ಯ ಕೊಡುವುದಾದರೆ, ಮನೆ ಕಟ್ಟುವ ಮುನ್ನ ಅದು ಹೇಗೆ ಕಾಣಿಸಬಹುದೆಂದು ಅದರ ಪುಟ್ಟ ಪ್ರತಿಕೃತಿ ಅಥವಾ ಡ್ರಾಯಿಂಗ್ ಅನ್ನು ಇಂಜಿನಿಯರ್ ತೋರಿಸ್ತಾರಲ್ಲ ಹಾಗೆ.

ಹೀಗೆ ಮಾಹಿತಿ/ಬೇಡಿಕೆ/ಅಗತ್ಯಗಳನ್ನೆಲ್ಲಾ ಕಲೆಹಾಕಿ ದಾಖಲಿಸಿಟ್ಟ ಬಳಿಕ ಅನಾಲಿಸಿಸ್ ಮತ್ತು ಡಿಸೈನ್ ಶುರುವಾಗುತ್ತೆ. ಮೊದಲ ಈ ಕ್ರಿಯೆಯಲ್ಲಿ ವಿಶೇಷ ಪರಿಣತಿಯುಳ್ಳ ತಂಡವೊಂದು ಈ ಕೆಲಸಕ್ಕಾಗಿ ನಿಯೋಜಿಸಲ್ಪಡುತ್ತದೆ. ಸಿದ್ಧಪಡಿಸಬೇಕಾದ ಸಾಫ್ಟ್‌ವೇರ್‌ನಲ್ಲಿರಬೇಕಾದ ಅಂಶಗಳು, ಲಕ್ಷಣಗಳಿಗೆ ಅನುಗುಣವಾಗಿ ಅದನ್ನು ವಿವಿಧ ವಿಭಾಗಗಳಾಗಿ ವಿಂಗಡಿಸಿ, ಪ್ರತೀ ವಿಭಾಗವೂ ಮಾಡುವ ಕೆಲಸ, ಅದನ್ನು ರಚಿಸುವುದು ಹೇಗೆ ಅನ್ನುವುದನ್ನು ಈ ಹಂತದಲ್ಲಿ ನಿರ್ಧರಿಸಲಾಗುತ್ತದೆ. ಇನ್ಶೂರೆನ್ಸ್ ಕಂಪೆನಿಯ ಉದಾಹರಣೆಯನ್ನು ಗಮನಿಸುವುದಾದರೆ ಅದರಲ್ಲಿ ಗ್ರಾಹಕರನ್ನು ಸೇರಿಸಲು/ತೆಗೆದು ಹಾಕಲು ಒಂದು ವಿಭಾಗ, ಪ್ರಿಮಿಯಂ ಲೆಕ್ಕ ಹಾಕಲು ಒಂದು ವಿಭಾಗ, ಕಟ್ಟಿದ ಪ್ರಿಮಿಯಂಗಳ ದಾಖಲಾತಿಗೆ ಒಂದು… ಹೀಗೆ ಅನೇಕ ವಿಭಾಗಗಳನ್ನಾಗಿ ವಿಂಗಡಿಸಿ, ಪ್ರತೀ ವಿಭಾಗವು ಮಾಡುವ ಕೆಲಸ, ಆ ವಿಭಾಗವನ್ನು ಹೇಗೆ ರಚಿಸಬೇಕು ಅನ್ನುವುದನ್ನು ನಿರ್ಧರಿಸಲಾಗುತ್ತದೆ. ಈ ಕಾರ್ಯದಲ್ಲಿ ಇದಕ್ಕೆಂದೇ ರಚಿತವಾದ ಅನೇಕ ವಿಶೇಷ ತಂತ್ರಾಶ(ಸಾಫ್ಟ್‌ವೇರ್)ಗಳನ್ನು ಬಳಸಲಾಗುತ್ತದೆ. ಡೆಸೈನ್ ಪ್ರಕ್ರಿಯೆಯನ್ನು ಸ್ಥೂಲವಾಗಿ ಕಟ್ಟಡದ ನೀಲನಕ್ಷೆ ಹಾಗು ಅದಕ್ಕೆ ಸಂಬಂಧಿಸಿದ ಡ್ರಾಯಿಂಗ್‌ಗಳಿಗೆ ಹೋಲಿಸಬಹುದು. ಈ ಹಂತಕ್ಕೂ ಕೂಡಾ ಹೆಚ್ಚು ಕಡಿಮೆ ಕಾಲು ಭಾಗದಷ್ಟು ಸಮಯ ಮೀಸಲಾಗಿರುತ್ತದೆ.

ಡಿಸೈನ್ ಹಂತ ಮುಗಿಯುವಷ್ಟರಲ್ಲಿ (ಕೆಲವೊಮ್ಮೆ ಮೊದಲೇ) ಈ ಸಾಫ್ಟ್‌ವೇರ್ ನಿರ್ಮಾಣದಲ್ಲಿ ಬಳಸಬೇಕಾದ ತಂತ್ರಜ್ಞಾನ, ತಂತ್ರಾಂಶಗಳನ್ನು ನಿರ್ಧರಿಸಲಾಗುತ್ತದೆ. ಇದರಲ್ಲಿ ಸ್ಥೂಲವಾಗಿ ಎರಡು ವಿಭಾಗಗಳಿರುತ್ತವೆ. ಮಾಹಿತಿ ಸಂಗ್ರಹಣೆಗೆ ಬಳಸುವ ಡೇಟಾಬೇಸ್ ಮತ್ತು ಕಾರ್ಯನಿರ್ವಹಿಸಲು ಕಂಪ್ಯೂಟರ್‌ಗೆ ಆದೇಶ ನೀಡಲು ಬಳಸುವ ಭಾಷೆ. (ವಾಸ್ತವವಾಗಿ ಇದು ಇಲ್ಲಿ ಹೇಳಿದಷ್ಟು ನೇರ ಮತ್ತು ಸರಳವಾಗಿಲ್ಲ. ಸುಮ್ಮನೆ ಸ್ಥೂಲವಾಗಿ ವಿವರಿಸಿದ್ದೇನೆ ಅಷ್ಟೆ)

ಈ ಭಾಷೆಯನ್ನು ‘ಪ್ರೊಗ್ರಾಮಿಂಗ್ ಲಾಂಗ್ವೇಜ್’ ಎಂದೂ, ಇದನ್ನು ಬಳಸಿ ಬರೆಯುವ ಸಂಕೇತ/ಆದೇಶಗಳ ಸಮೂಹವನ್ನು ‘ಪ್ರೋಗ್ರಾಮ್’ / ಕೋಡ್’ ಎಂದೂ ಕರೆಯಲಾಗುತ್ತದೆ.

ಈ ಕೆಲಸವನ್ನು ನಿರ್ವಹಿಸಲು ಪ್ರೋಗ್ರಾಮಿಂಗ್ ಭಾಷೆಯಲ್ಲಿ ಪರಿಣತಿಯನ್ನು ಪಡೆದ ತಂಡವನ್ನು ಕಟ್ಟಲಾಗುತ್ತದೆ. ತಂಡದ ವಿವಿಧ ಸದಸ್ಯರಿಗೆ ಡಿಸೈನ್‌ನಲ್ಲಿ ಸೂಚಿಸಿದ ಪ್ರಕಾರ ವಿವಿಧ ವಿಭಾಗಗಳನ್ನು ನಿರ್ಮಿಸಲು ಕೊಡಲಾಗುತ್ತದೆ. ಈ ಪ್ರಕ್ರಿಯೆಗೆ ‘ಕೋಡಿಂಗ್’ ಅಂತ ಹೆಸರು. ತಮಗೆ ನಿಗದಿಪಡಿಸಿದ ಅವಧಿಯೊಳಗೆ, ಡಿಸೈನ್‌ಗೆ ಅನುಗುಣವಾಗಿ ಮಾಡ್ಯುಲ್‌(ಘಟಕ)ಗಳನ್ನು ಮುಗಿಸಬೇಕಾಗುತ್ತದೆ. ಪ್ರತಿಯೊಬ್ಬನೂ ತಾನು ನಿರ್ಮಿಸಿದ ಪ್ರೋಗ್ರಾಂ/ಘಟಕವನ್ನು ಬಿಡಿ ಬಿಡಿಯಾಗಿ ಟೆಸ್ಟ್ ಮಾಡುತ್ತಾನೆ. ಉದಾಹರಣೆಗೆ ಇನ್ಶೂರೆನ್ಸ್ ಕಂಪೆನಿಯ ಪ್ರಿಮಿಯಂ ಲೆಕ್ಕ ಹಾಕುವ ಮಾಡ್ಯೂಲನ್ನು ಗಮನಿಸಿದರೆ, ಅದು ಕೊಟ್ಟ ಮಾಹಿತಿಗಳನ್ನೆಲ್ಲಾ ಬಳಸಿ, ಸರಿಯಾದ ಪ್ರಿಮಿಯಂ ಲೆಕ್ಕ ಹಾಕಿ ಕೊಡಬೇಕು. ಅದನ್ನು ಇನ್ಶೂರೆನ್ಸ್ ಕಂಪೆನಿ ನೀಡಿದ ಮಾಹಿತಿಯೊಂದಿಗೆ ತಾಳೆ ಹಾಕಿ ತಪ್ಪಿದ್ದಲ್ಲಿ ಅದನ್ನು ಹುಡುಕಿ ಸರಿಪಡಿಸಬೇಕು.

ಹೀಗೆ ಬಿಡಿಬಿಡಿಯಾಗಿ ರಚಿತವಾದ ಮಾಡ್ಯೂಲ್‌ಗಳನ್ನೆಲ್ಲಾ ಒಟ್ಟಾಗಿಸಿ ಒಂದೇ ಸಾಫ್ಟ್‌ವೇರ್ ಘಟಕವನ್ನಾಗಿಸಲಾಗುತ್ತದೆ. ಇದಕ್ಕೆ ಇಂಟಿಗ್ರೇಶನ್ ಅನ್ನುತ್ತಾರೆ. ಹೀಗೆ ತಯಾರಾದ ಸಾಫ್ಟ್‌ವೇರ್ ಇನ್ನೆರಡು ಹಂತದ ಟೆಸ್ಟಿಂಗ್‌ಗೆ ಒಳಗಾಗುತ್ತದೆ. ಅದೆಂದರೆ ‘ಇಂಟಿಗ್ರೇಶನ್ ಟೆಸ್ಟಿಂಗ್’ಹಾಗೂ ‘ಸಿಸ್ಟಮ್ ಟೆಸ್ಟಿಂಗ್’. ‘ಸಿಸ್ಟಮ್ ಟೆಸ್ಟಿಂಗ್’ ಹಂತದಲ್ಲಿ ಕಸ್ಟಮರ್ ಸಲ್ಲಿಸಿದ ಬೇಡಿಕೆಗನುಗುಣವಾಗಿ ತಂತ್ರಾಂಶವು ಕಾರ್ಯ ನಿರ್ವಹಿಸುತ್ತಿದೆಯೇ ಅನ್ನುವುದನ್ನು ಪರೀಕ್ಷಿಸಲಾಗುತ್ತದೆ. ಈ ಯಾವುದೇ ಹಂತದಲ್ಲಿ ದೋಷಗಳೇನಾದರೂ ಬಂದಲ್ಲಿ ಅದನ್ನು ಸರಿಪಡಿಸಿ ಮತ್ತೆ ಪರೀಕ್ಷೆಗೊಳಪಡಿಸಲಾಗುತ್ತದೆ.

ಇಷ್ಟೆಲ್ಲಾ ಮುಗಿದ ಬಳಿಕ ಸಾಫ್ಟ್‌ವೇರ್ ಬಳಕೆಗೆ ನೆರವಾಗುವ ಕೈಪಿಡಿಯೊಂದನ್ನು ಸಿದ್ಧಪಡಿಸಿ, ಅದನ್ನು ಕಸ್ಟಮರ್‌ಗೆ ರವಾನಿಸಲಾಗುತ್ತದೆ. ಈ ಪ್ರಕ್ರಿಯೆಗೆ ‘ಡೆಲಿವರಿ’ ಅನ್ನಲಾಗುತ್ತದೆ. ಹೀಗೆ ರಚಿತವಾದ ಸಾಫ್ಟ್‌ವೇರ್‌ನ ಕಾರ್ಯವಿಧಾನವನ್ನು ಇನ್ಶೂರೆನ್ಸ್ ಕಂಪೆನಿಯವರು ಪರೀಕ್ಷೆಗೆ ಒಳಪಡಿಸಿ ದೋಷವಿದ್ದರೆ, ಅಥವಾ ಬದಲಾವಣೆ ಬೇಕಿದ್ದರೆ ಅದನ್ನು ಸೂಚಿಸುತ್ತಾರೆ. ಅವರು ಸೂಚಿಸಿದ ಬದಲಾವಣೆಗಳನ್ನು, ಗುರುತಿಸಿದ ದೋಷಗಳಿಗೆ ಅನುಗುಣವಾಗಿ ಸೂಕ್ತವಾದ ಬದಲಾವಣೆ ಮಾಡಿ ಪುನಃ ಕಸ್ಟಮರ್ ಬಳಿ ಸಾಫ್ಟ್-ವೇರನ್ನು ಕಳಿಸಲಾಗುತ್ತದೆ. ಈ ಪ್ರಕ್ರಿಯೆಯು ಕಸ್ಟಮರ್‌ಗೆ ಅದರ ಕಾರ್ಯವಿಧಾನದ ಕುರಿತು ತೃಪ್ತಿಯಾಗುವವರೆಗೆ ಪುನರಾವರ್ತನೆಯಾಗುತ್ತಲಿರುತ್ತದೆ.

ಅಂತೂ ಕೊನೆಗೂ ಸಾಫ್ಟ್‌ವೇರ್ ಬಳಕೆಗೆ ಸಿದ್ಧವಾಗುತ್ತದೆ. ಬಳಕೆ ಶುರುವಾದ 3-6 ತಿಂಗಳವರೆಗೆ ಕರಾರಿನಂತೆ ಅದರ ನಿರ್ವಹಣೆ (ಮೇಂಟೆನೆನ್ಸ್) ಜವಾಬ್ದಾರಿಯಿರುತ್ತದೆ. ಬಳಕೆಯ ವೇಳೆ ಯಾವುದಾದರೂ ದೋಷ ಬಂದಲ್ಲಿ ಅದನ್ನು ಸರಿಪಡಿಸಿ ಅಂತೂ ಕೊನೆಗೂ ಸಾಫ್ಟ್‌ವೇರ್ ರಚನೆಯ ಪ್ರಕ್ರಿಯೆ ಮುಕ್ತಾಯವಾಗುತ್ತದೆ.

ಇದು ನೋಡಿ ಸ್ವಾಮಿ ನಾವು ಮಾಡೋ ಕೆಲಸದ ಒಂದು ಕಿರು ಪರಿಚಯ. ಇಲ್ಲಿ ಮಾಹಿತಿಯನ್ನು ಸರಳಗೊಳಿಸುವ ಸಲುವಾಗಿ ಮುಖ್ಯವಾದ ಅಂಶಗಳನ್ನಸ್ಟೇ ಇಲ್ಲಿ ಹೇಳಿದ್ದೇನೆ. ಇದು ಪೂರ್ಣವಾದ ಪರಿಚಯ ಅಲ್ಲವಾದರೂ ಸಾಫ್ಟ್‌ವೇರ್ ಜಗತ್ತಿನ ಬಗ್ಗೆ ಒಂದು ಇಣುಕು ನೋಟ ನಿಮಗೆ ಸಿಕ್ಕಿದಲ್ಲಿ ನಾನು ಬರೆದಿದ್ದೂ ಸಾರ್ಥಕ.

ಕೊನೆಯಲ್ಲೊಂದು ವ್ಯಂಗ್ಯ ಸಾಫ್ಟ್-ವೇರ್ ಕುರಿತು. ಕೃಪೆ: ಇಂಟರ್ನೆಟ್

SDLC_(P2)